Ermənistanla bağlı mühüm qərarların bu ölkə xaricində qəbul edildiyi heç kimə sirr deyil. Xüsusən də Nikol Paşinyan hakimiyyətə gətirildikdən sonra Ermənistana dair əsas qərarlar Corc Soros və ona bağlı qurumlar tərəfindən qəbul edilərək icraya yönləndirilir.
Qeyd olunan məqamlara Prezident İlham Əliyev yerli telekanallara müsahibəsində də ətraflı toxundu: “Müstəqillik Ermənistanda formal xarakter daşıyır. Sən necə müstəqil ölkəsən ki, öz qərarını qəbul edə bilmirsən. Necə müstəqil ölkəsən ki, səni idarə edən Sorosdur. Paşinyan Soros rejiminin məhsuludur. Bu gün Ermənistanda söz sahibi Sorosdur. Baxın Paşinyanın hakimiyyət komandasının tərcümeyi-halına. Hamısı ya Sorosdan, ya “Transperensy”dən, ya da ki, o biri insan hüquqları təşkilatlarındandır. Onlar bu gün Ermənistanda baş vermiş despotik hərəkətlərə göz yumurlar. Ermənistanda bir jurnalist aclıq edib həbsxanada ölüb, heç bir təşkilat məsələ qaldırmayıb. İndi Ermənistanda iki prezident məsuliyyətə cəlb edilib, cinayət işi açılıb, iki keçmiş prezident, sırf onların siyasi fəaliyyətlərinə görə, bunu hər kəs bilir, buna göz yumulur. Əsas müxalifət partiyasının liderinin deputat toxunulmazlığı götürülüb, buna heç bir reaksiya vermirlər. Avropa Şurası niyə susur? Ermənistan üzrə məruzəçilər niyə susurlar? “Freedom House”, “Human Rights Watch”, “Amnesty International” niyə susur? Sorosa görə. Soros Ermənistanın başçısıdır. Soros həmin bu dırnaqarası hüquq müdafiəsi təşkilatlarının sponsorudur. Onların sponsoru birdir”. Bu açıqlamalar eyni zamanda Azərbaycan və Ermənistana münasibətdə hansı sıbəbdən ikili standartlarla yanaşıldığını da üzə çıxarır.
Digər tərəfdən, baş verənlər Ermənistanın yaxın tezlikdə Soros əsirliyindən xilasını mümkünsüz hala gətirir. Bunu erməni siyasi şərhçi Yervand Bozoyan da xüsusi olaraq vurğulayır. O qeyd edir ki, Soros və ona bağlı olanlar hər keçən gün Ermənistanda mövqelərini daha da gücləndirir. O, bu halda Ermənistanın daxili və xarici həyatında ağır bir durumun yarandığını da xüsusi olaraq vurğulayır: “Xarici müstəvidə vəziyyət gərginləşir. Məlumdur ki, Aleksey Navalni və Belarus ətrafındakı inkişaflar Moskva və Qərb arasında münasibətlərin kəskin şəkildə ağırlaşa biləcəyi bir vəziyyətə gətirib çıxarıb. Bu halda Moskvanın sorosçuların və digər məşhur dairələrin Paşinyan hakimiyyətinə təsirinin davamına dözməyəcəyi yeni vəziyyət yaranacaq. Sorosa görə Kreml təzyiqlərini artıracaq. Sorosa bağlı olanlar isə ölkə daxilində daha çox problemlər yaratmağa başlayıb”. Ekspert qeyd edir ki, indi hakimiyətdə təmsil edilənlərin əksəriyyəti məhz sorosçulardır. Məsələn, Ermənistanın ali siyasi dairələrində iddialı fiqur sayılan Ədliyyə Nazirliyinin rəhbəri Rustam Badasyan Sorosa bağlıdır. Onun namizədliyini Soros fondunun Ermənistandakı icraçı direktoru Larisa Minasyan dəstəkləyib. “Transparency International” təşkilatının seçki proqramlarının keçmiş əlaqələndiricisi Armen Qriqoryan Milli Təhlükəsizlik Şurasının rəhbəri vəzifəsinə təyin edilib. Dövlət nəzarət xidmətinin keçmiş rəisi David Sanasaryan qərbpərəst amerikalı Raffi Ovannisyanın başçılıq etdiyi “İrs” partiyasının yetirməsidir.
Milli Təhlükəsizlik Xidmətinin keçmiş rəhbəri Artur Vanesyan da bundan əvvəl bildirib ki, Sorosun fəaliyyəti Ermənistan üçün təhlükədir. Onu da xatırladaq ki, Sorosun və onun strukturlarının Ermənistanın siyasi və ictimai həyatında iştirakını tənqid edən VETO təşkilatının fəalları əslində Paşinyanın güc orqanları tərəfindən repressiyaya məruz qalırlar. VETO-nun təsisçisi Narek Malyan və müxalifətçi “Adekvat” partiyasının görkəmli funksioneri Konstantin Ter-Nakalyan hələ də qanunsuz olaraq silah saxlamaqda və gəzdirməkdə ittiham edilirlər. Bu xüsusda aparılan istintaqın onların həbsi ilə yekunlaşacağı istisna edilmir.
Hazırda Soros kadrlarının Ermənistanı fəlakətə sürükləməsi ciddi ajiotaj yaradır. Bu halda Ermənistanda Nikol Paşinyan iqtidarına qarşı da narazılıq artır. Lakin görünən budur ki, sorosçular hakimiyyəti asanlıla vermək istəmir. Bundan əvvəl də qeyd edilən xüsusda “168.am” saytı maraqlı məlumat yayıb: “Ermənistan hakimiyyəti payızdakı siyasi gərginləşməyə ciddi hazırlaşır. Kiçik gərginlik olacağı halda Ermənistanın əsas şəhərlərinin küçələri sorosçularla doldurulacaq. Payızdakı gərginlik belə olacaq: bir tərəfdən sorosçular Ermənistanda söz azadlığının təminatını imitasiya edəcək, digər tərəfdən isə müxalifətin sərt həbslərinə tamaşa edəcəklər. Polis isə, guya nizamı dəstəklədiyini nümayiş etdirəcək. Ermənistanda payızda Sorosun təşkil edəcəyi böyük siyasi partlayışın olacağı ilə bağlı dəqiq məlumatlar var. Beləliklə, Soros ölkədə ona qarşı olanlara öz gücünü göstərəcək”. Bütün bu qeyd edilənlər Soros və onun Ermənistanda olan uzantıları barədə Azərbaycan tərəfinin dediklərini bir daha təsdiq edir. Belə görünür ki, Ermənistanda indiki hakimiyyət dönəmində Soros əsas söz sahibi olaraq qalmaqda davam edəcək. Bu isə Ermənistanda bir çox siyasi qüvvələrdə və cəmiyyətdə artıq ciddi narazılıq yaradır.
Tahir TAĞIYEV
