Son günlərin hələ də ən çox diqqət çəkən əsas mövzuları sırasında Ermənistanın məqsədyönlü siyasəti nəticəsində müxtəlif terrorçu qruplaşmaların Azərbaycanın işğal edilmiş ərazilərinə axın etməsi yer alır. Bu xüsusda PKK ilə bağlı məqamların getdikcə daha ön plana çıxması da aydın müşahidə olunur.
Xatırladaq ki, Ermənistanın Livan ermənilərini Azərbaycanın işğal edilmiş ərazilərinə köçürməyə davam etdiyi bir vaxtda PKK terror təşkilatının “xüsusi təyinatlı qüvvələri”nin Dağlıq Qarabağ bölgəsinə gətirildiyinə dair məlumatlar yayıldı. Türkiyənin “Cumhuriyyet” qəzeti bölgədəki təhlükəsizlik qüvvələrindən əldə etdiyi məlumatlarda göstərdi ki, PKK-nın qeyd edilən qüvvələri Dağlıq Qarabağda ermənilərə hərbi təlim keçir. Özü də PKK Qarabağda yeni hücum dalğası başlatmağa hazırlaşır və bu arada 250-yə yaxın erməni əsgəri də Suriyada PYD-YPG terror təşkilatının sıralarına qatılmaq üçün göndərilib. O da bildirilirdi ki, erməni əsgərlərlə PKK arasındakı bu işbirliyi Fransanın vasitəçiliyi ilə baş tutub. Erməni əsgərləri Fransanın müşahidəsi və vasitəçiliyi altında PKK ilə danışıqlar aparıb.
Bununla yanaşı, yayılan məlumatlardan o da bəlli olur ki, Ermənistan həm də Türkiyənin Azərbaycana hərbi dəstəyinə cavab olaraq PKK qruplaşması ilə işbirliyinə başlayıb. Elə bu səbəbdən iyul ayında Tovuz istiqamətində baş vermiş toqquşmaların ardınca PKK yaraqlılarını Qarabağa daşımağa başlayıb. İraq hökumətinə yaxın qaynaqlardan isə mətbuata məlumat daxil olmuşdu ki, Ermənistanın bu ölkədəki səfiri Qraçya Poladyanın vasitəçiliyi ilə bu ilin yayında İrəvan PK ilə əlaqələri dərinləşdirməyə başlayıb. Bu fonda Dağlıq Qarabağda PKK kürd terror təşkilatının yaraqlılarının yerləşdirilməsi haqda razılaşma əldə edilib. Ermənistanın İraqdakı səfiri işlədiyi iki ildən də az müddətdə dəfələrlə İraq kürd muxtariyyətinə bu məqsədlə səfər edib. Səfir kürd administrasiyası rəhbərliyini inandırmağa çalışırdı ki, PKK yaraqlıları Qarabağda Türkiyəyə qarşı fəaliyyət göstərəcək. Poladyan PKK-nın dayağı olan Süleymaniyyədə bu prosesdə istədiyi nəticələri əldə edə bilib. Burada ona erməni xüsusi xidmət orqanlarının və hərbi kəşfiyyatının İraqa qonşu İran ərazisindən keçən nümayəndələri də yardım edib. Poladyan Kürd Vətənpərvərlər İttifaqı -Türkiyə ilə qatı düşmənçilik münasibətlərində olan marksist yönümlü siyasi partiya ilə əlaqələr yaradıb. Bütün bunlar fonunda İraqın şimalından yüzlərlə PKK yaraqlısı Süleymaniyyədən yola çıxıb, daha sonra İraqın Kala-Çivalan, Pencivan, Arbat-Ava, Diala və Başmax yaşayış məntəqələrindən keçməklə İranla sərhəd Seyran Bənd şəhərciyinə çatıblar. Sərhədi piyada keçən PKK yaraqlıları İranın Saqiz yaşayış məntəqəsinə daxil olub, oradan isə İnqilab Keşikçiləri Korpusunun dəstəyi ilə Kirmanşahdan keçərək Ermənistan və Azərbaycanın işğal edilmiş əraziləri istiqamətində yola düşüblər. Qeyd edilənlər Misirin “cairo24.com” portalında yer alan məlumatlarda da öz əksini tapır.
Nəşr yazır ki, Ermənistanla Azərbaycan arasında iyul ayında baş vermiş toqquşmalardan sonra PKK yaraqlılarının Ermənistan ordusunun sıralarına inteqrasiya edilməsi əməliyyatı fəallaşıb: “PKK-nın bir qrup yaraqlısı və komandirləri İraq və Suriyadan tranzit keçməklə Ermənistan ərazisinə atılıb. Ermənistana gətirilən PKK yaraqlılarının birinci qrupu 25 nəfərdən ibarətdir. Onlar Türkiyə ərazisindən İraqa gediblər və PKK-nın əməliyyat mərkəzi olan Qəndil düşərgəsində təlim keçiblər”. Bildirilir ki, həmin qrup hərbi hazırlıq keçmək və diversiya əməliyyatlarının aparılması üzrə ixtisaslaşıb. Qrup iyul ayında əvvəlcə İranın Urmiyə şəhərinə aparılıb, orada İnqilab Keşikçiləri Korpusunun “Əl-Qüds” xüsusi təyinatlı qüvvələrinin “Həmzə” batalyonunun qərargahında bir neçə gün qalıblar və daha sonra Ermənistana keçiblər. Bundan əlavə, hazırda İran və Suriya ərazisində Ermənistana keçmək üçün gözləyən daha iki PKK qrupu var. Bütün bunlar həm də o deməkdir ki, PKK-nın Qarabağa gəlişinə İran da yardım edir. İndi Ermənistana gəlmək istəyən birinci qrup PKK-nın Suriya qolu olan YPG-nin 250 yaraqlısından ibarətdir. Həmin qrup Suriyanın şimalındakı Qamışlı rayonundadır. Qrupun İraq ərazisində hərəkəti və daha sonra İrana keçirilməsi ilə Tehrana loyal olan “Bədr” təşkilatı məşğuldur. Plana əsasən, birinci mərhələdə və sentyabrın əvvəllərində həmin qrupdan 165 nəfər İranın İlam əyalətindəki sərhəd-keçid məntəqəsindən bu ölkəyə daxil olub və Mehran şəhərində yerləşib, yaxın günlərdə isə Ermənistana keçməyə hazırlaşır. Məlumata əsasən, həmin qrup hücum əməliyyatlarının keçirilməsi üzrə ixtisaslaşıb, bu da erməni ordusunun Azərbaycan ordusunun mövqelərinə diversiya və terrorçu metodlardan istifadə etməklə hücuma keçməyə hazırlaşdığını göstərir.
İkinci qrup isə Ərbildən cənubda, PKK-nın Mahmur bazasında yerləşir və 25 nəfərdən ibarətdir. Bu dəstə partizan müharibəsi aparmaq təcrübəsi olan yaraqlılardan təşkil olunub. Qrup bu ilin avqust ayında iki avtobusla “Hizbullah”ın İraq qolu olan “Hərəkat əl-Nucaba” qruplaşmasının qərargahına, Bağdadın Sədr-siti rayonuna aparılıb. Sentyabrın əvvəllərində isə qrup İlam əyalətindən keçirilməklə İrana atılıb, həmin qrupdan 17 nəfər daha sonra Kirmanşaha göndərilib. Qalan 8-i İlam şəhərində qalıb. 17 nəfərlik qrup Kirmanşahda bir neçə gün qaldıqdan sonra Ermənistana keçmək üçün Urmiyəyə aparılıb. 8 PKK yaraqlısı isə Tehrana gedib, oradan təyyarə ilə İrəvana uçub. İraqdan İrana keçmək üçün isə PKK yaraqlıları İranın Mandaziya, Pərvizxan və Xanacini qəsəbələrindən tranzit məntəqəsi kimi istifadə edirlər. Kürd yaraqlıları Ermənistan ordusunun sıralarına qoşulur. Belə bir məlumat da var ki, erməni tərəfi PKK yaraqlılarının Azərbaycana qarşı əməliyyatlarda istifadə olunmasının əvəzində Türkiyənin pilotsuz təyyarələri ilə mübarizə aparmaq üçün bu terror təşkilatına Rusiya istehsalı olan raket kompleksləri verməyə razılaşıb. Bütün bunlar Ermənistanın PKK planlarının artıq təhlükəli bir həddə çatmaqda olduğunu göstərir. Digər tərəfdən, proseslər belə davam edərsə. Ermənistan-PKK işbirliyi nəticəsində sözügedən terror təşkilatının qərargahının Qəndildən Qarabağa köçürülməsi belə istisnalıq təşkil etmir. Məhz belə vəziyyətdə Azərbaycan və Türkiyənin Qarabağda birlikdə antiterror əməliyyatına başlaması qaçılmaz sayılır. Azərbaycanın işğal edilmiş torpaqlarında terror yuvası məhz bu yolla dağıdıla bilər.
Nahid SALAYEV
