Ermənilər Azərbaycanın İnterpol axtarışına verdiyi erməni zabitləri barədə yanıldıcı xəbər yaydılar...
Məlum olduğu kimi, Azərbaycan Ermənistan ordusunun iki zabitini beynəlxalq axtarışa verib. Baş Prokurorluğun Mətbuat Xidmətindən verilən açıqlamada qeyd olunub ki, bu gün Ermənistan yeni təxribat planları hazırlayaraq ən yüksək siyasi səviyyələrdə əsl niyyətinin münaqişənin sülh vasitəsilə həlli deyil, Azərbaycan torpaqlarının qanunsuz işğalının davam etdirilməsi olduğunu nümayiş etdirməkdədir.
Son aylar Ermənistan tərəfinin cəbhədə törətdiyi təxribatlar işğalçı ölkənin, nəinki danışıqlar aparmağa, əksinə, hər vəchlə vəziyyəti yenidən gərginləşdirməyə çalışdığından xəbər verir. Qeyd edək ki, bu məlumat Ermənistanın diversiya-kəşfiyyat qrupunun komandiri, baş leytenant, 1989-cu il təvəllüdlü Alaverdyan Qurgen Vladimiroviçin əsir götürülməsindən sonra yayılıb. Bildirilir ki, qeyd edilənlərə əsasən təqsirləndirilən şəxs qismində cəlb olunmaqla barəsində həbs qətimkan tədbiri seçilmiş Qurgen Alaverdyanın ifadəsi və digər istintaq sübutlarına əsasən, Q.Alaverdyanın Azərbaycan Respublikasının işğal olunmuş ərazisində qanunsuz yaradılmış silahlı birləşmədə kəşfiyyat bölüyündə tağım komandiri olmaqla cinayətkar birliyin tərkibində təcavüzkar müharibənin aparılmasında iştirak etməsinə, habelə işğalçı Ermənistan tərəfindən yaradılmış cinayətkar birlikdə (təşkilatda) struktur bölməsinə rəhbərlik etməsinə, 23 avqust 2020-ci il tarixdə xidmət etdiyi qanunsuz silahlı birləşmənin komandiri Vazgen Vartanyanın göstərişi ilə 2 nəfər erməni hərbçisi - Armen Camalyan və istintaqın hazırkı mərhələsində şəxsiyyəti məlum olmayan digər şəxslə birlikdə bu addımı atıb.
İstintaq idarəsi tərəfindən qeyd edilən şəxslər barəsində beynəlxalq axtarışın elan edilməsinə dair müvafiq qərarlar qəbul edilməklə, icra edilməsi üçün Daxili İşlər Nazirliyi, Dövlət Təhlükəsizliyi Xidməti, həmçinin “İnterpol”-un Milli Mərkəzi Bürosuna göndərilib.
Çox maraqlıdır ki, erməni mediası bununla bağlı yayındırıcı xəbərlər tirajlayır. Onlar qeyd edirlər ki, İnterpolun erməni milli bürosu həmin adda şəxslərin deyilən xətt üzrə axtarışa verilmədiyini bəyan edib.
Erməni KİV-nin bu iddiasını nə dərəcədə əsaslı saymaq olar?
Hüquqşunas, Azərbaycan Vəkillər Kollegiyasının üzvü Mehman Muradlı “Bakı-Xəbər”ə açıqlamasında bildirdi ki, bu məsələdə müəyyən prosedurlar həyata keçirilməlidir: “Yəni hansısa ölkənin müraciəti əsasında şəxslər həmin dəqiqə İnterpol xəti ilə axtarışa verilmir. İnterpolun Mərkəzi Bürosuna daxil olan məlumatların heç də hamısı üzrə axtarış elan edilmir. Əvvəlcə istənilən bürodan daxil olan sənədlərin beynəlxalq hüquqa uyğunluğu yoxlanmalıdır. Əgər siyasi baxışları, dini etiqadı və ya irqi məsələlərlə bağlı təqib olunma faktı yoxdursa, yalnız bundan sonra İnterpolun baş katibi məlumatları bazaya yerləşdirmək üçün işçi qrupuna təqdim edir. Yəni İnterpola müraciət etmək hələ şəxslərin dərhal axtarışa verilməsi demək deyil. İnterpolun Mərkəzi Bürosu hələ bu şəxslər haqqında daxil olan məlumatları araşdırmalıdır. Müraciətlərin düzgün tərtib olunub-olunmaması kimi detallara da baxılmalıdır. Yalnız bundan sonra məlumat bazaya yerləşdirilir və şəxs haqqında dünyanın 194 ölkəsində axtarış başlanır.
Bu, "İnterpol"un həmin ölkələrdə olan Milli Büroları tərəfindən həyata keçirilir. Təbiidir ki, Azərbaycan tərəfi də əldə olan ciddi əsaslara söykənərək, həmin hərbçilər barədə müraciət edib. Ermənistanın bu istiqamətdəki təkzibinin heç bir əsası yoxdur. Ola bilər ki, həmin sənədlər, prosedura uyğun olaraq, ilkin araşdırma mərhələsindədir. Bu baxımdan da, Ermənistanın cəhdləri ictimai rəyi çaşdırmağa hesablanıb. Həmin hərbçilərin beynəlxalq axtarışa verilməsinə mane olan heç bir amil nəzərə çarpmır”.
Qeyd edək ki, analoji məzmunlu əməllərinə görə bir çox erməni hərbçisi bizim müraciətimiz əsasında beynəlxalq axtarışa verilib. Bu hərbçilərin də həmin xətt üzrə axtarılacağına qəti şübhə ola bilməz.
Məhəmmədəli QƏRİBLİ
