20/09/2020 10:48
728 x 90

Ermənilər bütün Qafqazın şeyxinə qarşı - səbəb “Nobel”...

Əhməd Qəşəmoğlu: “Ermənilər bu gün Allahşükür Paşazadəyə qarşı qara piar aparırlar ki...”

img

Məlum olduğu kimi, Qafqaz Müsəlmanları İdarəsinin (QMİ) rəhbəri, bütün Qafqazın şeyxi Hacı Allahşükür Paşazadə “Nobel” sülh mükafatına ekspert qrupu tərəfindən namizəd kimi artıq təsdiqlənib. Bütün Qafqazın şeyxinin “Nobel” sülh mükafatına namizədliyinin təsdiq edilməsi ermənilərin kürkünə birə salıb. Şeyxin namizədliyinin təsdiq edilməsi elan edilən kimi ermənilər ona qarşı qara piar kampaniyasına start veriblər.

Sosial şəbəkələrdə və erməni mətbuatında gerçəkləşdirilən şər-böhtan kampaniyasının təşkilatçıları bütün Qafqazın şeyxi ilə bağlı həqiqətə uyğun olmayan fikirlər, qarayaxmalar həyata keçirirlər. Ermənilərin məqsədi isə bütün vasitələrdən istifadə edərək Hacı Allahşükür Paşazadənin “Nobel” sülh mükafatı almasının qarşısını almaqdır. Şeyxin “Nobel” sülh mükafatına namizədliyinin qeydə alınmasını həzm edə bilməyən ermənilər ona qarşı, dolayısı ilə isə Azərbaycana qarşı kütləvi hücuma keçiblər.

Azərbaycanda isə sosial şəbəkə istifadəçiləri ermənilərin apardığı qara piar kampaniyasını ciddi şəkildə tənqid edərək, bütün xalqımızı erməni təbliğatına qarşı həmrəy olmağa çağırırlar. Ermənilər əllərində olan bütün informasiya resurslarından istifadə edərək, öz çirkin kampaniyalarını günü-gündən daha da genişləndirirlər. 

Erməni jurnalistlərin, blogerlərin bütün Qafqazın şeyxini “erməni düşməni”, “millətçi”, “qanunsuz beynəlxalq gizli ticarətçi” kimi adlandırması, əlbəttə ki, əsassızdır. Yenə də qeyd edirik ki, bu kampaniyanın arxasında ermənilərin məlum çirkin niyyətləri dayanır.

Ekspertlər qeyd edirlər ki, bütün mümkün mexanizmləri işə salıb Qafqazın şeyxinə qarşı hücumlar təşkil edən ermənilərin cavabı bizim həmrəyliyimizlə verilə bilər.

  • “Həmrəyliyimizi qorumalıyıq”

Tanınmış sosioloq, professor Əhməd Qəşəmoğlu “Bakı-Xəbər”ə bildirdi ki, ermənilərin bizə qarşı məqsədi aydındır və onlar hansısa bir azərbaycanlının, Azərbaycan vətəndaşının “Nobel” sülh mükafatına namizədliyinin qeydə alınmasını həzm edə bilmirlər. Ə.Qəşəmoğlunun sözlərinə görə, istənilən azərbaycanlının bu mükafata rəsmi namizəd kimi təsdiqlənməsi, yaxud bu mükafata layiq görülməsi ölkəmizin adınadır və buna müsbət yanaşmalıyıq. “Təbii ki, “Nobel” sülh mükafatına namizədlər sırasında azərbaycanlının, eləcə də bizə doğma xalqın nümayəndəsinin adının olması təqdirəlayiqdir. Bütün Qafqazın şeyxinin namizədliyi rəsmən təsdiqlənsə də, bu o demək deyil ki, o, yüz faiz bu mükafatı alacaq. Ən azından, təsdiqlənən siyahıda Azərbaycan təmsilçisinin adının olması müsbət haldır. Ermənilərin bu məsələyə belə ağrılı reaksiyalar verməsinin, şeyxin ətrafında qara piar kampaniyası aparmasının məqsədi aydındır. Təbii ki, ermənilər həmişə Azərbaycanın, azərbaycanlıların beynəlxalq aləmdə müsbət mənada tanınmasını, qəbul edilməsini istəmirlər. Onlar bütün mümkün vasitələrdən yararlanaraq, bizi “geridə qalmış” xalq kimi təqdim edirlər. Ermənilər Azərbaycanda gedən bütün proseslərə həmişə mənfi don geydirmək, bizi mədəni səviyyəcə aşağı xalq kimi  göstərmək məqsədi güdüblər. Buna görə də ermənilər şeyxə qarşı qara piar aparıb, onu beynəlxalq aləmə mənfi yöndə təqdim etməyə cəhd göstərirlər. Bu, erməni xislətindən irəli gələn məsələdir. Bilirik ki, Azərbaycanın özündə də şeyxə qarşı münasibət birmənalı deyil. Mən məsləhət görərdim ki, azərbaycanlılar şeyxlə bağlı erməniləri fərəhləndirən yazılar verməsinlər, çıxışlar etməsinlər. Kimin şeyxə qarşı şəxsi ədavəti, münasibəti varsa, onu sonraya da saxlaya bilər, indiki halda bunları qabartmaq olmaz”.

Ə.Qəşəmoğlunun sözlərinə görə, indiki zamanda azərbaycanlıların şeyxlə bağlı hər hansı bir mənfi fikri ermənilərə dəstək kimi görsənə bilər. “Ona görə də bu məsələdə biz həmrəyliyimizi qorumalıyıq. Ermənilər bu gün Allahşükür Paşazadəyə qarşı qara piar aparırlar ki, o, bu mükafatı almasın. Onlar nəinki şeyxə, ümumiyyətlə, “Nobel”ə namizəd olan istənilən azərbaycanlıya qarşı bu şəkildə qara piar aparacaqlar, çalışacaqlar ki, bu ödülü alanlar içində azərbaycanlı olmasın. Sabah mənim namizədliyim təsdiqlənsə, mənə qarşı da ermənilər bu şəkildə qara piar aparacaqlar. Odur ki, indiki vaxtda bizdən erməni təxribatına qarşı mübarizədə həmrəy olmaq tələb olunur” - deyə bildirən Ə.Qəşəmoğlunun sözlərinə görə, ermənilər bizimlə bağlı istənilən məsələyə qarşı təxribat edirlər, biz isə bu təxribatlara öz birliyimizlə cavab verməliyik.

İradə SARIYEVA

Son xəbərlər