Məlum olduğu kimi, Prezident, Silahlı Qüvvələrin Ali Baş Komandanı İlham Əliyevin göstərişinə əsasən Prezidentin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev və Müdafiə nazirinin müavini, general-leytenant Kərim Vəliyev ön xətdə yerləşən bir sıra hərbi hissələrdə olub.
Belə ki, düşmənlə üzbəüz yüksək dağlıq şəraitdə döyüş növbətçiliyi aparan şəxsi heyətin xidməti ilə maraqlanan H.Hacıyev komanda-müşahidə məntəqəsindən düşmən mövqelərini müşahidə edib. Sonra Horadiz şəhərində yerləşən Aprel şəhidlərinin xatirəsinə ucaldılmış abidə ziyarət edilib, önünə gül dəstələri qoyulub, ölkəmizin müstəqilliyi və ərazi bütövlüyü uğrunda canından keçən şəhidlərin xatirəsi hörmət və ehtiramla yad edilib.
Ön xətdə olan qonaqlar döyüş mövqelərində xidmət edən hərbi qulluqçularla görüşüb, onların xidmət şəraiti ilə maraqlanıb. Görüş zamanı Ali Baş Komandanın salamlarını şəxsi heyətə çatdıran H.Hacıyev Azərbaycan Ordusunun döyüş qabiliyyətinin yüksəldilməsi və hərbi qulluqçuların sosial şəraitinin yaxşılaşdırılması ilə bağlı cənab Prezident İlham Əliyevin verdiyi tapşırıqların icrası istiqamətində fəaliyyətlərin davam etməsindən danışaraq, bu məsələlərin ölkə rəhbərliyinin daim diqqət mərkəzində olduğunu da xüsusi vurğulayıb. Sonra ön xətdə döyüş növbəsi çəkən hərbi qulluqçularla birgə nahar edilib və çay süfrəsi arxasında söhbət aparılıb.
Cəbhəboyu kəndlərdən birində yerli sakinlərlə də görüşən H.Hacıyev ölkə başçısının salamlarını onlara çatdırıb və əhalinin qayğıları ilə maraqlanıb. Yaradılan şəraitdən məmnunluqlarını ifadə edən kənd sakinləri onların minnətdarlığının ölkə rəhbərliyinə çatdırılmasını xahiş ediblər.
Bütün bu deyilənlərin fonunda, ümumilikdə Hikmət Hacıyev kimi ideoloji-təbliğat gücü olan məmurların ön cəbhədə əsgərlərlə görüşü nə kimi əhəmiyyətli təsirlər doğura bilər? Bunun əsgərlərə, düşmənə və həmin ərazidə yaşayan yerli sakinlərə nə kimi təsiri olacaq?
“Hikmət müəlləmin son səfəri ordu quruculuğu sahəsində yeni bir mərhələnin başlanğıcı kimi dəyərləndirilə bilər”
Məsələyə münasibət bildirən ehtiyatda olan polkovnik-leytenant, hərbi ekspert İbrahim Rüstəmli buna bir neçə aspektdən yanaşaraq, bu səfərin əhəmiyyətini yüksək dəyərləndirdi: “Məsələ ondadır ki, ordu quruculuğunu yalnız hərbçilərin öhdəsinə buraxmaq düzgün deyil. Yəni bütün tərəflər ordu quruculuğu prosesində bu və ya digər dərəcədə iştirak etməlidir. Prezidentin köməkçisi Hikmət Hacıyevin cəbhə bölgəsinə səfəri, hərbiçilərlə, yerli sakinlərlə görüşməsi və oradaki vəziyyətlə maraqlanması mühüm əhəmiyyət kəsb edir. Çünki H.Hacıyev kimi ranqlı bir şəxsin cəbhə bölgəsinə səfəri adi bir səfər deyil. Bunun çox böyük əhəmiyyəti var. Sözügedən səfər sayəsində döyüş postunda xidmət edən əsgərlərin ruh yüksəkliyi artacaq. Bu onların mənəvi əhval-ruhiyyəsinə müsbət təsir göstərəcək. Əsgərlərə belə ranqlı məmurların səfəri əlavə ruh yüksəkliyi verir. Mənəvi nöqteyi-nəzərdən onları daha da cəsarətləndirir. Bununla ordu öz arxasında bir daha dövlətini görür. Etiraf etmək lazımdır ki, bu istiqamətdə dövlət çox böyük işlər görür. Bunun nəticəsidir ki, Azərbaycan ordusu dünyada güclü olan 50 ordudan biridir. Digər tərəfdən, bu, cəbhə bölgəsində yaşayan yerli sakinlərə də çox müsbət təsir bağışlayır. Onlar üçün belə səfərlərin xüsusi əhəmiyyəti var. Bu, onların torpağa olan bağlılığını daha da artırır. Ən nəhayət, sözügedən səfər qarşı tərəfdə dayanan düşmən əsgərlərində narahatlıq yaradır. Düşmən əsgərlərində ruh düşgünlüyünün yaranmasına zəmin yaradır. Hikmət müəlləmin son səfəri ordu quruculuğu sahəsində yeni bir mərhələnin başlanğıcı kimi dəyərləndirilə bilər. Çünki Hikmət müəllim dövlət məmuru olmaqla yanaşı, çox ziyalı bir adamdır. Ona görə də bu səfər ordumuzda yeni bir ab-hava yaradır. Bu ab-hava yeni bir mərhələnin başlanğıcına səbəb ola bilər”.
Hərbi ekspertin fikrincə, bütün mənalarda, məlum səfər faydalı nəticələrə gətirib çıxaracaq.
Vidadi ORDAHALLI
