ABŞ-ın Ermənistandakı səfirliyi və müxalifət partiyalarından biri ölkədəki vəziyyəti öyrənmək və Baş nazir Nikol Paşinyanın reytinqini müəyyənləşdirmək üçün rəy sorğusu keçirib. Rəy sorğusunun nəticələri açıqlanmasa da, belə məlumatlar var ki, sözügedən məsələ ilə bağlı Paşinyanın nüfuzu kritik səviyyədə aşağı düşüb.
Ermənistanın tanınmış “Past” qəzeti yazır ki, sorğu daxili istifadə üçün nəzərdə tutulub və nəticələri ictimaiyyətə açıqlanmayıb. Buna baxmayaraq, qəzet bəzi məlumatları əldə edə bilib. Məlum olub ki, sözügedən rəy sorğusunun nəticələrinə əsasən, Ermənistan Baş naziri Nikol Paşinyanın və bütövlükdə, hökumətin reytinqi sürətlə azalır. Belə ki, N.Paşinyanın reytinqi tarixi antirekord vurub. Məlumata görə, respondentlərin yalnız 17,2 faizi Baş naziri dəstəkləyib. Qəzet onu da qeyd edib ki, əslində, bu, Paşinyanın siyasi iflası ilə bağlı çox ciddi siqnaldır. Belə məlum olur ki, bunun sonu Paşinyan üçün yaxşı olmayacaq.
Maraqlıdır, bəs ekspertlər bütün bunları necə dəyərləndirirlər? Paşinyanın reytinqinin belə sürətlə aşağı düşməsi onun siyasi karyerasına nə vəd edir? Bu yöndə proseslər hansı istiqamətdə inkişaf edə bilər?
“Ermənistanın sosial-iqtisadi çöküşü, pandemiya, ölkənin ağır durumu onu bu vəziyyətə çatdırdı”
Sözügedən məsələni “Bakı-Xəbər”ə şərh edən AMİP sədrinin müavini Afsəddin Nəbiyev bununla bağlı bir sıra məqamlara toxundu. Onun fikrincə, bu gözlənilən idi: “Əslində, Ermənistanın Baş naziri Nikol Paşinyanın reytinqinin belə biabırçı nəticələrə gətirib çıxaracağı gözlənilən idi. Məsələ ondadır ki, Paşinyan küçə mitinqlərində Ermənistana demokratiya vəd etsə də, sonrakı proseslərdə erməni xalqı bunun tam əksini gördü. O, seçkidən öncə erməni xalqının rifahını ən yüksək səviyyəyə çatdıracağı ilə bağlı populist və real əsaslara söykənməyən vədlərindən çəkinmədi. Bu minvalla, erməni cəmiyyətini aldatmağa nail ola bildi. Soros Fondunun dəstəyilə hakimiyyətə gələn Paşinyan düşünürdü ki, qarşısında duran məsələləri həll edə biləcək. Təbii ki, bu mümkün olan iş deyildi. Çünki mövcud reallıq başqadır və bunları görməzdən gəlmək mümkün deyil. Ermənistanın sosial-iqtisadi çöküşü, pandemiya, ölkənin ağır durumu Paşinyanı bu vəziyyətə çatdırdı. Vəziyyətdən çıxmaq üçün “Qarabağ kartı”na da əl uzatmaqdan çəkinmədi. Pandemiya dövründə müxalifətə qarşı təzyiqləri artırdı, müxalif fəalları həbs etdirdi. Keçirilən sorğular bir daha təsdiq edir ki, qarşıdakı aylar Nikol Paşinyan üçün asan olmayacaq. Soros Fondu Paşinyanı hakimiyyətə gətirəndə ona böyük ümidləri vardı. Artıq həmin ümidlər puç olub. Paşinyan bu prosesləri idarə edəcək gücdə deyil”.
Partiya funksionerinin fikrincə, yaxın vaxtlarda Ermənistanda hakimiyyət böhranının şahidi olacağıq.
Vidadi ORDAHALLI
