Ermənistanın 3-cü prezidenti Serj Sarkisyan deyib ki, Ermənistan silahlı qüvvələri Tavuşdakı uğurlu (?) əməliyyatları Naxçıvan istiqamətində də təkrarlamalı idi: “Dördgünlük Aprel müharibəsini və Tavuşdakı hadisələri müqayisə edə bilməzsiniz.
Əlbəttə ki, Tavuşda silahlı qüvvələrimiz ən yaxşı tərəflərini göstərdi və son dərəcə vacib bir məsələni (söhbət görəsən hansı məsələdən gedir?) həll etdi. Silahlı qüvvələrimiz təbrik edilməlidir. Ancaq eyni şey 2018-ci ilin may-iyun aylarında Naxçıvan istiqamətində aparılmalı idi. Bu, zərurət idi”.
Bununla belə, S.Sarkisyan onu da qeyd edib ki, erməni cəmiyyəti 71 nəfərin belə yüksək mükafata – “Döyüş xaçı”na hansı səbəbdən layiq görüldüyünü daha ətraflı öyrənməlidir: “Xüsusilə, bu, mənim üçün çox vacibdir”.
Məlumat üçün qeyd edək ki, Tovuzla sərhəddə baş verən döyüşlərdə Azərbaycanın 12 hərbçisi və bir mülki vətəndaşı şəhid olub. Erməni tərəfdən qurbanların sayı rəsmi olaraq 5 nəfər göstərilsə də, əslində, itkilərin həqiqi sayı gizlədilir. Ermənilərdən ölən və yaralananlar daha çoxdur.
Sabiq prezidentin sərsəmləmələrinə gəldikdə isə, birincisi, Ermənistanın Naxçıvana hücumunun necə nəticələnəcəyini yəqin S.Sarkisyan da daxil olmaqla, Paşinyan hakimiyyəti yaxşı bilir. İkincisi də rəsmi İrəvan, görəsən, Tavuşda hansı qələbə əldə edib ki, bu haqda belə ağızdolusu danışırlar? Fakt odur ki, ermənilər həmin döyüşlərdə Azərbaycan ərazisinin bir qarışını belə ələ keçirə bilməyiblər. O zaman nədən danışırlar?
“Serj Sarkisyan hələ aprel sindromunu yaddan çıxarmayıb”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara toxundu: “S.Sarkisyanın ordu barədə dedikləri əsasən onun ordunun potensialından gələcəkdə istifadə edib, hakimiyyəti qəsb etməyə hesablanıb. Qeyd edim ki, Ermənistan ordusu Tovuz rayonunda ciddi məğlubiyyətə uğradı və demək olar ki, ciddi itkilərə məruz qaldı. Hesab edirəm ki, belə bəyanatlar verilməsi, sadəcə, siyasi spekulyasiyadan irəli gəlir. S.Sarkisyan hələ aprel sindromunu yaddan çıxarmayıb, bununla bağlı istintaqa çağırılır. Belə olan təqdirdə verilən bəyanatlar, sadəcə, gülüncdür. Ermənistan ordusu, ümumiyyətlə, Naxçıvan istiqamətində ciddi təzyiqlərlə üzləşib. Demək olar ki, Əlahiddə Qoşunun bölmələri Ermənistan ordsundan qat-qat güclüdürlər. Bu gün Ermənistan ordusunun silah təchizatı Rusiyanın hesabınadır. Amma, ordunun döyüş qabiliyyəti və şəxsi heyət arasında subordinasiya qaydaları aşağı səviyyədədir. Belə bir ordunun hansısa qələbəsindən danışmaq özünü aldatmaqdır. Ermənistan ordusu bu gün regionda döyüş qabiliyyətinə görə ən axırıncı yerdədir. Sadəcə, Rusiya faktoru Azərbaycanı bir qədər gözləməyə sövq edib. Hesab edirəm ki, Sarkisyan və Paşinyanın ordu barədə dedikləri yalnız manipulyasiyadır”.
Politoloqun fikrincə, sabiq prezidentin dedikləri reallıqdan uzaqdır.
Vidadi ORDAHALLI
