Məlum olduğu kimi, gənc yazar Kəramət Böyükçöl yaşadığı evdə polis tərəfindən həbs edilmişdi. Həbsindən əvvəl Kəramət içkili vəziyyətdə öz sosial şəbəkə səhifəsindən canlı yayımlara çıxaraq bir çox tanınmış ziyalıların və dövlət adamlarının ünvanına təhqirlər, söyüşlər səsləndirmişdi.
Onun saxlanmasını bəzi radikal dairələr güya etdiyi həmin çıxışlarla izah etməyə çalışsalar da, sonra məlum olub ki, saxlanma motivi tamamilə başqa olub. Avqustun 19-da qonşuların şikayəti əsasında kirayədə qaldığı mənzildə saxlanıb 28-ci Polis bölməsinə aparılan gənc yazar Kəramət Böyükçöl sərbəst buraxılıb. Bu barədə xəbəri yazarın atası, şair-publisist Qəşəm Nəcəfzadə verib. Polis şöbəsində aparılan araşdırma zamanı K.Böyükçölün əməlində cinayət motivi olmadığı müyyən edilib.
Gənc yazar Kəramət Böyükçöl hüquq-mühafizə orqanları tərəfindən avqustun 18-də saxlanmışdı. Daxili İşlər Nazirliyinin mətbuat xidmətindən verilən açıqlamada Kəramət Böyükçölün qonşularının və kirayədə qaldığı mənzilin sahibinin şikayətləri əsasında saxlandığı bildirilib:"Onun kirayədə yaşadığı binanın sakinləri və mənzilin sahibi ərazi üzrə Polis bölməsinə müraciət edərək, iki gündür həmin mənzildən səs-küy gəldiyini və bu halın qonşuları ciddi narahat etdiyini bildiriblər".
Qeyd edək ki, həmin vaxt Kəramətlə birgə onun mənzilində olan dostları Murad Köhnəqala və Ramil Zeynalov da saxlanmışdı. Digər iki nəfər də sərbəst buraxılıb. Kəramət sərbəst buraxılandan sonra Daxili işlər naziri Vilayət Eyvazov onun atası, şair Qəşəm Nəcəfzadəyə zəng edib. Bu barədə Q.Nəcəfzadə özü “Facebook” hesabında paylaşım edib. V.Eyvazova təşəkkürünü bildirən şair belə yazıb:“Oğlum Kəramət Böyükçöl içkili olduğuna görə qeyri-etik hərəkətlər etdiyi üçün dünən, ayın 18-də saxlanmışdı. Bu gün isə sərbəst buraxıldı. Cənab nazir, istedadlı bir gəncə həssaslıqla yanaşdığınıza, onun əsərlərini və publisistik yazılarını dəyərləndirdiyinizə və bu barədə mənə telefon açdığınıza görə sizə təşəkkür edirəm!”
Nazir Vilayət Eyvazovun bu jestini necə dəyərləndirmək olar?
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, sıradan bir vətəndaş kimi Kəramətin hərəkətlərini təqdir etmir:“Son günlər etdiyi hərəkətlər onun nüfuzunu aşağı salan addımlar idi. Onunla bağlı yazılan bütün statusları, məqalələri oxudum. Bəzən deyirlər ki, sözə bağışlamaq lazımdır. Bu adam sözün qədrini gərək bilsin ki, cəmiyyət də ona hörmət qoysun da. İçib sərxoş vəziyyətdə söyüş söyüb, başqasının ləyaqətini alçaltmaq söz adamına yaraşan hərəkət deyil. Bu məsələdə polis üzərinə düşən funksiyanı qanuni şəkildə yerinə yetirib. Bütün dünyada da belədir ki, polis öz fəaliyyətini daxil olmuş məlumatlar əsasında qurur. Daxil olmuş məlumatlar kitaba qeyd edilir, bundan sonra onun icrası ilə bağlı fəaliyyətə keçilir. Kəramətin evinə polisin daxil olmasını məhkəmənin qərarı ilə əsaslandırmaq istəyənlər yanılır. Əməliyyat Axtarış Fəaliyyəti Haqqında Qanuna dəyişikliklər olub. Orada göstərilir ki, polis bəzi hallarda məhkəmənin qərarı olmadan da mənzilə girə bilər. Biz videodan da gördük ki, polis nəzakətlə qapını döyür, sonra özünü təqdim edir. Gərək Kəramət də savadlı adam kimi sakitcə onların tələblərinə riayət edəydi. Onda heç bu səs-küy də olmayacaqdı. Kəramətdən edilən şikayətin təfsilatı ona yerində izah edilməməlidir. Aparıb ərazi üzrə polis bölməsində izahatını almalıdırlar. Bu məsələdə polis nazirindən tutmuş, adı işçisinə kimi çox nəzakətli davranış ortaya qoydu. Nazir səviyyəsində məsələnin çözülməsinə addımlar atıldı. Bununla nazirin timsalında Azərbaycan ziyalısına hansı qiymətin verildiyinin şahidi olduq. Kəramət 20 yaşında roman yazıb, atası tanınmış şairdi. Naziri onlara zəng etməyə vadar edən onların ziyalılığı olub. Hesab edirəm ki, bu diqqətdən və davranışdan sonra Kəramət bəy də özü üçün müəyyən çıxarışlar etməlidir. Bir daha elə addımlar atmamalıdır. Bir adamın əsərlərini oxuyurlarsa, o özünə ciddi qiymət verməlidir. Bəzi qüvvələr bu hadisənin eskalasiyasını genişləndirməyə çalışsalar da, istəklərinə nail ola bilmədilər. Bilməlidirlər ki, harada kiçik də olsa hüquqpozma varsa, orda polis var. Polis bu məsələyə vaxtında reaksiya verməsəydi, biz bəlkə də başqa faciələrin şahidi olardıq”.
İstənilən halda, bu gərginlik polisin müdaxiləsindən sonra yoluna düşdü. Yəqin Kəramətin özü də anlayır ki, bu məsələdə ona ən böyük yaxşlılığı elə polisimiz etdi.
Məhəmmədəli QƏRİBLİ
