Beyrutda yüzlərlə insanın ölümü ilə nəticələnən dəhşətli partlayış və onun nəticələri bu ölkədəki 200 minlik erməni icmasının da canını təşvişə salıb. Bəlli olduğu kimi, partlayış nəticəsində Beyrutdakı erməni məhəllələri, o cümlədən, Müqəddəs Gevork kilsəsi, Livandakı Ermənistan səfirliyinin binası da zərər çəkib.
Ölən ermənilərdən biri Livan "Əl-Kataib” partiyasının baş katibi Nizar Najaryandır. Ümumilikdə, hadisə zamanı 15-ə yaxın erməninin öldüyü, yüzə yaxın yaralının olduğu bildirilir. Baş verən partlayışdan qorxuya düşən ermənilərin Ermənistana köç etmələri barədə mətbuatda informasiyalar yayılmaqdadır.
Bu arada Rusiyanın “Vestnik Kafkaza” nəşri Livandakı ermənilərin Ermənistana gəlməsi perspektivini analiz edib. Qeyd olunur ki, Ermənistanın bu məsələdə aktivlik göstərməsinin arxasında bir sıra məqsədlər gizlənib. Erməni hakimiyyəti bununla Yaxın Şərqdəki varlı ermənilərin ölkəyə gəlməsinə çalışır. Digər tərəfdən, dərinləşən demoqrafik böhranın qarşısını bu yolla almaq istəyirlər. Məqalədə daha sonra belə bir sual verilir - bəs görəsən hakimiyyət əhalinin sürətlə ölkəni tərk etməsi qarşılığında respublikanı necə cəlbedici etməyə çalışır?
BMT Sosial və iqtisadi məsələlər departamentinin məlumatına görə, ötən il Ermənistanı 2 min insan tərk edib. Bu il ölkəni tərk edənlərin sayı bir qədər azalıb. Hakimiyyət buna görə koronavirus pandemiyasına minnətdar olmalıdır: “Paşinyan hökumətindən olan “inqilabçılar”, əvvəlkilər kimi, Ermənistanın rəqabətədavamlılıq səviyyəsi ilə bağlı saxta məlumatlar ortaya atırlar. Lakin onlar yeni miqrantları cəlb etməkdənsə, ölkəyə gələn qaçqınların minimal da olsa ehtiyaclarını təmin etsinlər. Bunu belə ödəyə bilmirlər”.
Ermənistan hakimiyyətinin bütün bunlardan müəyyən məqsədlər üçün istifadə etdiyi bəllidir. Ancaq bununla bağlı qarşıya qoyulan hədəflərə Ermənistan çata bilərmi?
“İşğalçı ölkə iqtisadi baxımdan sözügedən tələbləri qarşılamaq qüdrətində deyil”
Məsələyə münasibət bildirən AMİP funksioneri Əli Orucov bunu istisna etdi: “Bunun bir neçə səbəbi var. Əsas səbəb Ermənistanın iqtisadi baxımdan sözügedən tələbləri qarşılamaq qüdrətində olmamasıdır. Otuz ilə yxındır Dağlıq Qarabağ və ətraf rayonlar işğal altındadır. Bu müddət ərzində Ermənistan kütləvi şəkildə Qarabağda məskunlaşma siyasəti apara bilməyib. Hansı ki, bu onların ən böyük arzusudur. Problem ondadır ki, illərdir əhali Ermənistanı tərk edir. Ermənilər elə bir bic millətdirlər ki, harada daha yaxşı yaşayış varsa, ora can atırlar. Tarixən bu belə olub. O baxımdan, düşünmürəm ki, Livandan olan varlı ermənilər uzun müddət Ermənistanda və yaxud da işğal altında olan Qarabağda yaşasınlar. Paşinyan hökuməti onları həvəsləndirməklə istəyir ki, sözügedən ermənilər Ermənistana vəsait qoysunlar. Çünki belədə xarici sərmayədarları Ermənistana investisiya qoymağa həvəsləndirmək mümkün deyil. Baxmayaraq ki, Paşinyan bununla bağlı dəfələrlə boğazdan yuxarı yağlı vədlər verib. Ancaq bu sahədə nəyisə dəyişə bilmir. Gör vəziyyət nə səviyyəyə gəlib çatıb ki, hətta Rusiya mətbuatı Livan ermənilərinin Ermənistana köçürülməsinə ciddi yanaşmır və bunun müəyyən siyasi məqsədlərə hesablandığını qeyd edir. Bütün bunlarla yanaşı, Livandan ermənilər köçsə belə, Ermənistanda müşahidə olunan demoqrafik böhranı önləmək mümkün olmayacaq. Çünki bu sahədə vəziyyət çox kritik səviyyədədir”.
Ekspertin fikrincə, Paşinyan bu kimi addımlara əl atmaqla ölkədə gözlənilən sosial təbəddülatları önləmək istəyir.
Vidadi ORDAHALLI
