Müşahidələr göstərir ki, ermənilər “Böyük Turan”a doğru ümumtürk inteqrasiyasından bərk narahat olmağa başlayıblar. Bu səbəbdən Rusiyanı qıcıqlandırmağa çalışırlar.
Erməni mətbuatı yazır ki, guya Türkiyə Prezidenti Rəcəb Tayyib Ərdoğanın yürütdüyü təcavüzkar siyasət son zamanlar beynəlxalq təşkilatlarda özünü büruzə verir. Qeyd olunur ki, 2009-cu ildə Türkiyənin səyi ilə Türk Şurası və ya Türkdilli Dövlətlərin Əməkdaşlıq Şurası - müasir Asiya türk dövlətlərini birləşdirən beynəlxalq təşkilat yaradıldı. İddia edirlər ki, Türk Şurasının yaradılması haqqında rəsmi Sazişdə əksini tapan hədəflər guya qurumun bütün niyyətlərini əks etdirmir: “Əslində, "Türk Şurasının yaradılması başqa, gizli məqsədlər güdür. İlk növbədə, bu təşkilatda üstün mövqeyə malik olan Türkiyə pantürkçülük ideologiyasını yayır. Bu xəritəyə baxdıqda aydın olur ki, bu proqramın genişlənməsində əsas maneələr Gürcüstan və Ermənistandır. Ancaq əgər hazırda Türkiyə-Azərbaycan tandemi bu ölkədəki türk əhalisinin tədricən artması ilə, eləcə də iqtisadi və siyasi qolları ilə Gürcüstanı zərərsizləşdirməyə çalışırsa, Ermənistan bu vəziyyətdə gücsüzdür. Ankara siyasi, iqtisadi və mədəni rıçaqlardan istifadə edərək, türkdilli Asiya xalqlarının yumşaq assimilyasiya siyasətini yürütməyə çalışır. Onları "birləşdirməyə", habelə “Böyük Turan” layihəsini həyata keçirmək arzusunu reallaşdırmaq üçün başqa ölkələrdən müşahidəçiləri cəlb etməyə çalışır. Bu istiqamətdə atılan addımlardan biri də Türk Şurasının yaradılması idi”.
İddia edilir ki, sözügedən proses nəticəsində guya Orta Asiya ölkələri öz dövlətçiliklərini itirə bilərlər. Əslində, bütün bu uydurmalarının kökündə Ermənistanın türk dövlətlərinin inteqrasiyasından keçirdiyi narahatlıq dayanır. Rusiyanı da qıcıqlandırırlar ki, guya bu tək Ermənistan üçün deyil, Rusiya üçün də potensial təhdid mənbəyidir.
“Türkdilli dövlətlərin ümumi inteqrasiyası Rusiya üçün təhdid deyil”
Məsələyə münasibət bildirən keçmiş diplomat, politoloq Fikrət Sadıqovun fikrincə, türkdilli ölkələrin inteqrasiyası ilə bağlı ermənilərin Rusiyanı qıcıqlandırmaq cəhdləri fiaskoya məhkumdur. O bunu bir sıra arqumentlərlə əsaslandırdı: “Məsələ ondadır ki, türkdilli ölkələr Türk Şurasında təmsil olunsalar da, hər bir ölkənin öz xarici prioritetləri var. Sözügedən ölkələr bir sıra beynəlxalq təşkilatlarda təmsil olunurlar. Məsələn, bəzi türkdilli ölkələr Avrasiya İqtisadi İttifaqında, KTMT-də təmsil olunurlar. Belə olan halda, Rusiya sözügedən prosesdən niyə narahat olsun ki?
Başqa bir tərəfdən, Tovuz döyüşlərində türkdilli dövlətlər, demək olar, Azərbaycanın mövqeyini dəstəklədilər. Məsələnin ikinci tərəfi ondan ibarətdir ki, erməni təbliğat maşını bundan istifadə edərək, Rusiya-Azərbaycan münasibətlərini pozmaq istəyir. Bu minvalla göstərmək istəyirlər ki, guya Türk Şurası Rusiya üçün təhlükədir. Hesab edirəm ki, bütün bunlar ermənilərin boş illüziyalarıdır. Türkdilli dövlətlərin ümumi inteqrasiyası Rusiya üçün təhdid deyil. Bu ölkələrin Rusiya ilə olan münasibətləri, əlaqələri inkişafdadır. Eyni zamanda, biz öz maraqlarımız çərçivəsində bu xarici siyasəti aparırıq. Çoxvektorlu və maraqlarımıza uyğun siyasi addımlarımızı atırıq. Bizim zərbəmiz Ermənistana qarşı yönələcək. Çünki torpaqlarımızı Ermənistan işğal edib”.
Politoloqun fikrincə, erməni tərəfi müəyyən uydurmalarla Rusiyanı Türk Şurasına qarşı qıcıqlandıra bilməz.
Vidadi ORDAHALLI
