Ermənistanın baş naziri Nikol Paşinyan BBC-nin “HARD Talk” proqramına verdiyi müsahibə zamanı səriştəsiz siyasətçi olmasını bir daha nümayiş etdirməsi onun öz ölkəsi daxilində də ciddi tənqid hədəfinə çevrilməsi ilə müşayiət edilir. Məsələ burasındadır ki, 20 dəqiqəlik söhbət zamanı aparıcının kəskin suallarını cavablandırmağa çalışarkən Paşinyan həqiqətən də siyasi biabırçılıq hesab oluna biləcək açıqlamalar verib. Məsələn, o, Dağlıq Qarabağ münaqişəsi zamanı Ermənistanın əvvəlki rəhbərliyinin törətdiyi hərbi cinayətlərini etiraf edib-etməməsi xahişini cavabsız qoyub. Ermənistanda koronavirus pandemiyası ilə mübarizədə ciddi səhvlərin olduğu bir məqamda bunu etiraf etməkdən imtina edib. Paşinyan faktlardan yayınmağa çalışaraq məntiqdən və həqiqətdən kənar cavablar vermək məcburiyyətində qalıb.
Bütün bunlar indinin özündə də Paşinyanı Ermənistanda sərt tənqid hədəfinə çevirməkdədir. Ermənistanın “Adekvat” ictimai təşkilatının təsisçisi Artur Danielyan bu xüsusda bildirir:“Hara çatdığımızı hiss edin, Ermənistan baş nazirini BBC-nin efirində dövlət xəyanətində ittiham edirlər”. O qeyd edib ki, bu, böyük mənada heç kim üçün sürpriz deyildi:“Jurnalist iddia etdi ki, Paşinyanın “inqilab”ı xalqa Azərbaycanla “sülh” vədi verilməsi əsasında baş verdi. Elə erməni politoloq Stepan Danielyan da Paşinyanın imicinin bir daha sözügedən müsahibə ilə alt-üst olduğunu bildirir:“Nikol Paşinyanın BBC-nin “HARD Talk” verilişi zamanı səsləndirdiyi cavabların məzmunu çox aydın və primitiv idi, bir çox hallarda zəif cavablar idi”. Erməni politoloqun sözlərinə görə, “Ermənistanın ciddi addımlara qadir olmayan, siyasət tarixinə bələd olmayan populist rəhbərə sahib olduğu növbəti dəfə təsdiqləndi”. Ermənistanın “Qraparak” nəşri də yazır ki, Paşinyanın yalanları bu dəfə onun köməyinə gəlmədi:“Paşinyan, məsələn, ötən il Ermənistanın Avropada ən yüksək iqtisadi inkişafa sahib olduğunu, iqtisadi uğurla yanaşı, Ermənistanın demokratiya, söz azadlığı, məhkəmə müstəqilliyi və antikorrupsiya siyasətində də böyük irəliləyişlər əldə etdiyini bildirib. Amma reallığın tamam fərqli olması da sirr deyil. Baş nazir hesab edir ki, Ermənistan hazırda epidemiyanın öhdəsindən gəlmək üzrədir və Ermənistandakı epidemiya ilə mübarizədə heç də hər şeyin yaxşı olmaması, mübarizənin uğursuz olduğu kontekstində qiymətləndirmələr barədə danışmaq hələ tezdir. Bu, avqustun 14-də Ermənistanda qeydə alınan koronavirus infeksiyası hallarının ümumi sayının təxminən 42 minə çatdığı və ölənlərin sayının 1000 nəfəri keçdiyi, həm də martın 16-da qurulan fövqəladə vəziyyət rejimi artıq bir neçə dəfə uzadıldığı halda baş verir. Deməli, Ermənistan uğursuzluğa düçar olub, amma baş nazir bunu gizlətməyə çalışır. Qarabağ münaqişəsinin nizamlanmasına gəlincə, Paşinyan düşünür ki, atəşkəs hadisələrini araşdıran beynəlxalq mexanizm tətbiq olunmalıdır. Qeyd edilən məsələ Vyana və Sankt Peterburq razılaşmasında əksini tapmışdı. Amma bu razılaşmalar elə fəaliyyətdə olan baş nazir tərəfindən Qarabağ münaqişəsinin nizamlanmasını öz bildiyi nöqtədən başlamasını rəhbər tutaraq, ikinci plana atılmışdı. Buna bənzər addım kimi, öz növbəsində, Ermənistan mətbuatında “lift diplomatiyası” adı altında səsləndirilən Düşənbə görüşünü qeyd etmək olar. Deməli, burada da günah yenə Paşinyanın özündədir. Müsahibədə Paşinyan, həmçinin, Ermənistan və Rusiya arasında münasibətlərin çox yaxşı olduğunu, lakin bunun Ermənistanın Aİ, ABŞ və İranla yaxşı münasibət qurmasına mane olmadığını bildirib. Bu sahədəki mütəxəssislər daha dəqiq qiymətləndirmələr verə bilər, amma, xüsusən Ermənistan-Rusiya münasibətləri baxımından münasibətlərin çox yaxşı olduğunu söyləmək, yumşaq desək, gerçəklikdən bixəbər olmaq deməkdir. Çünki hamı Ermənistan-Rusiya münasibətlərində problemlərin olduğunu bilir. Bu problemlər bu gün həll edilə bilən problemlər hesab edilə bilməz. Yeri gəlmişkən, səsləndirdiyi suallara istinad etsək görərik ki, jurnalist Stiven Sakur Ermənistandakı gerçəklik haqqında kifayət qədər məlumatlıdır və səsləndirdiyi suallarından da, ən azı, son iki ildə Ermənistanda siyasi, iqtisadi və epidemiya ilə bağlı ümumi vəziyyəti tamamilə mənimsədiyi hiss olunurdu”. Gürcü ekspert Levan Metreveli də qeyd edir ki, bu müsahibə Paşinyanın onsuz da zəifləyən reytinqinə ciddi zərbə oldu:“Nikol Paşinyanın BBC-yə müsahibəsində heç bir tutarlı arqument gətirə bilməməsi təəccüb doğurmamalıdır. Çünki birbaşa aqressiya və digər ölkənin tarixi torpaqlarının işğalını əsaslandırmaq mümkün deyil”.Onun sözlərinə görə, Paşinyan efirdə Azərbaycan torpaqlarının işğalına bəraət qazandırmağa cəhdlər etməyə çalışıb:“Digər suveren dövlətin ərazilərinin işğalını arqumentləşdirmək qeyri-mümkündür. Buna görə də erməni baş nazirinin heç bir əsaslı sübutunun olmaması təbiidir. Bütün dünya ictimaiyyəti işğal olunan torpaqları Azərbaycanın əraziləri kimi tanıyır”.
Gürcü ekspert BBC-nin dünyanın ən nüfuzlu media orqanlarından biri olduğunu da qeyd edib:“Telekanal yalnız Böyük Britaniya və Avropaya deyil, bütün dünyaya yayımlanır. Buna müvafiq olaraq BBC-yə dəvət almaq şərəfinə nail olan istənilən lider yaxşı hazırlıqlı olmalıdır. Lakin Paşinyan nə qədər hazırlıqlı olsaydı belə, hər hansı bir arqument gətirə bilməzdi. Çünki işğal faktına bəraət qazandırmaq heç cür mümkün deyil”. Metreveli qeyd edib ki, Ermənistanın hökumət başçısı Azərbaycan torpaqlarının işğalı ilə bağlı suallara ilk dəfə deyil konkret cavablar verə bilmir:“Münhen konfransında da Nikol Paşinyan suallara konkret və tutarlı cavab verməkdə çox çətinlik çəkib. Azərbaycan Prezidenti İlham Əliyev isə debatda ciddi, fundamental bilik və təcrübəsinə əsaslanaraq çıxış edib. Nikol Paşinyanın zəif intellektual imkanları bununla müqayisə belə edilə bilməz”. Bütün bunlar isə, qeyd edildiyi kimi, Ermənistanın özündə belə Paşinyanın mövqeyini ciddi şəkildə sarsıdıb.
Nahid SALAYEV
