Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Ermənistan Xarici İşlər Nazirliyinin Türkiyəyə qarşı ittihamlarla çıxış etməsi ilə bağlı müsahibə verib.
Hikmət Hacıyev bildirib ki, Ermənistanın bölgədə sülh və təhlükəsizliyə ciddi təhdid törədən təcavüzkar siyasətinin nəticələrini aradan qaldırmaq əvəzinə bu kimi cəfəng açıqlamalarla çıxış etməsi bir daha rəsmi İrəvanın əsl niyyətinin öz işğalçı siyasətini gizlətmək və digər ölkələrə qarşı yalan və saxta ittihamlar irəli sürmək olduğunu nümayiş etdirir: “Türkiyəyə qarşı ərazi iddialarını dövlət gerbində əks etdirən, Azərbaycanın beynəlxalq səviyyədə tanınmış ərazilərini 30 ilə yaxındır ki, hərbi işğal altında saxlayan Ermənistanın bu açıqlaması həm gülüncdür, həm də riyakarlığın son həddi və özünə aid olmayan məsələlərə müdaxilə cəhdidir. Ermənistanın Şərqi Aralıq dənizindəki vəziyyətdən qətiyyən xəbəri yoxdur və onun bəyanatının yeganə səbəbi mövzunun Türkiyəyə aid olmasıdır”.
Doğrudan da maraqlıdır. Özünü iqtisadi cəhətdən təmin edə bilməyən, əhalisi dilənçi kökündə yaşayan, başdan ayağa kimi çirkabın içində olan işğalçı bir ölkənin özündən qat-qat uzaq məsafədə olan hansısa hadisəyə reaksiya verməsi gülünc görünür.
Politoloq Elşən Mustafayev “Bakı-Xəbər”ə açıqlamasında bildirdi ki, Türkiyənin Aralıq dənizi akvatoriyasında gördüyü işlər, atdığı addımlar tam qanunidir:“Həmin çoğrafiyada olan bir neçə ölkə birləşərək, Türkiyənin maraqlarını həmin ərazidə sıxışdırmağa çalışırlar. Son zamanlar görürük ki, Türkiyə regionda baş verən bütün proseslərdə aktiv aktor kimi yer alır. Təbiidir ki, belə olan təqdirdə həmin ölkənin birbaşa özünə aid olan məsələdə geri çəkilmək niyyəti yoxdur. Nəzərə alaq ki, həm də söhbət böyük maliyyə vəd edən təbii yataqların əldə olunmasından gedir. Hətta bu yaxınlarda belə bir məlumat yayıldı ki, Türkiyə Azərbaycanın Aralıq dənizində hərbi təlimlərdə iştirakını istəyir. Bu, Türkiyə üçün geosiyasi əhəmiyyət daşıyır. Türkiyə hazırda Aralıq dənizi sahillərindəki bır sıra dövlətlə münasibətlərində olan gərginliyə görə istəyir ki, Aralıq dənizi hövzəsində tərəfdaşları çoxalsın. Türkiyənin Aralıq dənizi sahili ölkələri - Yunanıstan, Fransa, Misir və İsraillə münasibətləri gərgindir. Yunanıstan və Misir yeni sazişlə Aralıq dənizində birgə enerji yataqlarının kəşfiyyatına və istismarına ümid edirlər. Ancaq Türkiyə buna imkan vermir. Ermənistan isə Türkiyənin maraqları olan istənilən məsələdə ona qarşı mövqe tutur. Hətta həmin ərazidə olan antitürk ovqatlı bir neçə ölkə ilə əməkdaşlıq formatında da təmsil olunurdu. Bütün bu məsələlər, təbiidir ki, Ermənistanın çapına uyğun deyil. Azərbaycanın bu məsələyə rəsmi reaksiya verməsi çox doğrudur. Əvvəla, Türkiyə bizim qardaş dövlətimizdir, biz bir-birimizin maraqlarını təmənna güdmədən qoruyuruq. İkinci bir tərəfdən isə, Hikmət Hacıyev doğru olaraq qeyd edir ki, Ermənistan yaxşı olar öz nöqsanlarından danışsın. Belə bir ölkə nəinki region, bütün dünya üçün üz qarasıdır. Onun dərin geopolitik məsələlərə mövqe bildirməsi dəryada üzmək istəyən naşı adamı xatırladır. Beləsi isə qısa müddət sonra boğulur”.
Doğrudan da, Ermənistan boyundan hündürə tullanmağa çalışsa da, bilməlidir ki, bu məsələdə onun yeri yalnız müzakirə masasının altı ola bilər.
Məhəmmədəli QƏRİBLİ
