Məlum olduğu kimi, Azərbaycanın son illər keçdiyi sürətli inkişaf yolunu, ölkəmizin bütün sahələrdə əldə etdiyi uğurları, demokratik yolla irəliləməsini, bütün fundamental hüquqların təmin olunmasını, sabitliyin hökm sürməsini bəzi xarici dairələrlə yanaşı, onların əlaltıları olan antimilli qüvvələr də heç cür həzm edə bilmirlər.
Bir neçə ildir dağıdıcı müxalifət partiyalarının fəalları, o cümlədən, xaricdə formalaşan bir qrup söyüşkən mühacir dəstəsinin üzvləri Azərbaycan dövlətinə, xalqına qarşı təxribatlarla məşğuldurlar. Sosial şəbəkələr vasitəsilə anti-Azərbaycan kampaniyası aparır, təxribat xarakterli çağırışlar edirlər. Bütün vasitələrlə milli maraqlara qarşı çıxırlar. Elə bir milli məsələ olmayıb ki, onlar ona qarşı çıxmasınlar.
Xaricdəki söyüş söyən azərbaycanlılar dəstəsi ayrı-ayrı ölkələrdə Azərbaycanın maraqları ilə bağlı keçirilən mitinqlərin əleyhinə çıxdılar. Daha sonra səfirlikləri ittiham etdilər ki, sözügedən mitinqləri niyə təşkil edirsiniz. Eyni zamanda, həmin qüvvələr Rusiyanın Ermənistana silah verməsinə susdular. Bununla bağlı hər hansı etiraz bildirmədilər. Hansı ki, belədə həmişə Rusiyanı ittiham edirlər. Zaman-zaman bəyan edirdilər ki, Ermənistanın arxasında Rusiya dayanıb. Ancaq, nədənsə, Ermənistanın son dövrlər silahlandırılmasına səslərini çıxarmadılar. İndi də ermənilər Gəncəni tutmaqla bağlı təhdid xarakterli fikirlər səsləndirirlər. Ancaq yenə də xaricdə oturub yutuberlik, televizionşiklik edən bu dönüklərin, xainlərin səsi çıxmır. Bununla bağlı, ümumiyyətlə, danışmaq, fikir bildirmək istəmirlər. Çünki bu xəyanətkar ünsürlər üçün milli mənafe deyilən bir məfhum yoxdur. Bunların işi-gücü Azərbaycan dövlətinə, dövlətçiliyinə zərər vurmaqdır.
“...ölkənin milli maraqlarına zərbə vurmaq yolunu tutublar”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, bu xəyanətkar ünsürlər ermənilərlə eyni mövqedən çıxış etdikləri üçün bu cür susqun mövqe sərgiləyirlər: “İnternet üzərindən müxtəlif kanallara rəhbərlik edən bu xəyanətkar ünsürlər yalnız ölkənin milli maraqlarına zərbə vurmaq yolunu tutublar. Azərbaycanı istəməyən qüvvələrin əlində bir alət rolunu oynayırlar. Ölkəmizə qarşı çirkin mövqe nümayiş etdirirlər. Sözügedən insanlar satılmış, əqidəsindən dönmüş məxluqlardır. Eyni zamanda, milli ruhdan, mənafedən uzaq düşüblər. Xaricə sığınıb ermənilərin əlində alət rolunu oynayırlar. Əllərində olan vasitələrlə Azərbaycana qarşı kampaniya aparırlar. Məsələ ondadır ki, xaricdəki söyüş söyən azərbaycanlıların mövqeyi düşmən ermənilərin mövqeyi ilə hər zaman üst-üstə düşür. Bu artıq onu ifadə edir ki, onlar düşmənlə əlaqədə işləyirlər. Çünki ermənilər Gəncə ilə bağlı təhdid xarakterli fikirlər səsləndirirlərsə, onlar bunu susqunluqla izləyirlərsə, bu, artıq xəyanətdir. Bu, onların düşmənlə birgə işlədiklərini sübut edir. O üzdən, bunların satqınlığı bütün Azərbaycan ictimaiyyətinə bəllidir”.
Ekspertin fikrincə, bunlar satılmış və milli maraqlara zərbə vuran xəyanətkar qruplardır. Onların ifşa olunması qaçılmazdır.
Vidadi ORDAHALLI
