Milli Şuranın daha bir qalmaqallı videosu yayılıb. Marginallar qeybətxananı xatırladan onlayn toplantıların az qala hər birində ya özlərini ifşa edir, ya da xalqa, dövlətçiliyə qarşı aqressiv münasibətlərini ortaya qoyurlar.
Yayılan son videoda isə müxalifətin "professoru" xalqı aşağılamaqdan belə çəkinməyib. Yayılan videoda Milli Şura sədri Cəmil Həsənli amerikalıları azərbaycanlılardan daha üstün tutub. ABŞ-ın dağıldığını bildirən C.Həsənli, azərbaycanlılarla müqayisədə amerikalıların şüurlu olduqlarını qeyd edib. Özünü müxalifətin “ağsaqqalı” hesab edən C.Həsənlinin Azərbaycan xalqını şüursuz adlandırması və başqa bir milləti azərbaycanlılardan üstün tutması “Zoom”dakı dostları tərəfindən razılıqla qarşılanıb və heç kim bu axmaq fikirlərə iradını bildirməyib. Əksinə, susmaqla onlar da belə mənfur düşüncə sahibi olduqlarını, bir növ, təsdiqləyiblər.
“Zoom konfransı”nda çıxış edən qaragüruhçuların səviyyəsiz zarafat və fikirləri, toplantını lağlağı məclisinə çevirmələri xüsusilə diqqət çəkib. Məsələn, Vidadi Mirkamal lağ obyektinə çevrilən Rahim Hacıyevə, onun kəlləsinə sataşaraq bildirib: “Rahim kameranı düz tut, ancaq təpəni görürük. Başında maraqlı bir şey də yoxdur”.
Həmçinin, V.Mirkamal Rafiq Manafovu görmədiyini bildirib. O isə cavab olaraq ayağında problem olduğunu qeyd edib. V.Mirkamal isə “ayağını qaldır, ayağını görək” deyərək, qeyri-ciddiliyini ortaya qoyub.
Onu da qeyd edək ki, Milli Şuranın yeni videosu sosial şəbəkələrdə ciddi müzakirələrə və narazılığa səbəb olub. İnsanlar Cəmil Həsənlinin səsləndirdiyi xain fikirlərə etiraz edib və özünü müxalifət adlandıran marginalların xalqa bu cür münasibətini kəskin qınayıblar. Artıq neçənci dəfədir Milli Şuranın bu kimi biabırçı videoları yayılır. Ancaq qurum üzvləri bundan nəticə çıxarmır, hətta xalqı aşağılamaqla məşğuldurlar.
“Hesab edirəm ki, onlar təhqirə görə xalqdan üzr istəməlidirlər”
Məsələyə münasibət bildirən AMİP-in sədr əvəzi Arzuxan Əlizadənin sözlərinə görə, yaşananlar onu göstərir ki, Milli Şura tükənmiş bir təşkilatdır: “Vəziyyət o yerə gəlib çatıb ki, Milli Şura üzvləri başlarını itiriblər. Onlar heç özləri də bilmirlər nə edirlər. Özünü ziyalı hesab edən Cəmil Həsənli xalqı aşağılayırsa, buna artıq adam deməyə söz tapmır. Ondan soruşan yoxdur ki, kim sənə bu ixtiyarı verib? Bütün bunlar bir daha Milli Şurada təmsil olunanların iç üzünü ortaya qoyur. Gör, bunlar nə dərəcədə əndazəni aşıblar ki, xalqı aşağılamaqdan belə çəkinmirlər. Siyasi arenada iflasa uğradıqlarının heyfini xalqdan çıxırlar. Hesab edirəm ki, onlar təhqirə görə xalqdan üzr istəməlidirlər. Mən onların verilişlərinə də heç fikir vermək istəməzdim, amma fikir verməmək də olmur. Mən belə hesab edirəm ki, onlar artıq siyasətdə bitmiş adamlardır və yalnız özlərinin şəxsi maraqlarından çıxış edərək bir yerə toplaşıblar. Özlərində mübarizə apardıqlarını zənn edirlər. Əslində isə Milli Şuranın ictimai rəyə heç bir təsiri yoxdur. Bunu onların özləri də yaxşı bilir, sadəcə, proseslərin arxasınca sürünürlər”.
AMİP-in sədr əvəzinin fikrincə, onlar nə etsələr belə, Milli Şuranın heç bir perspektivi yoxdur.
Vidadi ORDAHALLI
