Məlum olduğu kimi, bu günlərdə Ermənistan özünün yeni Milli Təhlükəsizlik Strategiyasını ictimaiyyət üçün açıqlayıb. Strategiyada Ermənistan dağlıq yaylası, Hayk, çar Artaşes, Arşakilər, Van çarlığı, soyqırım və s. kimi mifik tarixi məqamlara toxunulub.
Bu məsələ ilə bağlı fikir bildirən Azərbaycan Respublikası Prezidentinin köməkçisi-Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev “Bu günlərdə Ermənistan özünün yeni Milli Təhlükəsizlik Strategiyasını ictimaiyyət üçün açıqlayıb. Strategiyaya ön söz kimi yazılmış qeydlərdə Baş nazir Nikol Paşinyan geniş şəkildə erməni tarixinə istinadlar edir, Ermənistan dağlıq yaylası, Hayk, çar Artaşes, Arşakilər, Van çarlığı, soyqırım və s. kimi mifik tarixi məqamlara toxunur ki, bu da format olaraq belə sənədlərə tamamilə uyğun gəlmir” - deyə bildirib.
Prezidentin köməkçisi, həmçinin, qeyd edib ki, strategiya ilə tanış olduqca, orada şovinist, ksenofob və irqçi dəyərlərin təbliğ edildiyi dərhal sezilir: “Erməni xalqının böyüklüyü, onun digər xalqlar üzərində üstünlüyü barədə, eləcə də qonşu xalqlara qarşı dözümsüzlük kimi mesajlar verilir”.
“...bununla da özünü ifşa edib”
Azərbaycan Milli Elmlər Akademiyasının Qafqazşünaslıq İnstitutunun ermənişünaslıq şöbəsinin müdiri professor Qasım Hacıyev bizimlə söhbətində bildirdi ki, Ermənistanın Mill Strategiyasının özü başdan-ayağa cəfəngiyyatla doludur və burada heç bir tarixi həqiqətə yer verilməyib. Onun sözlərinə görə, Hayk, çar Artaşes, Arşakilər, Van çarlığının ermənilərlə heç bir əlaqəsi yoxdur, soyqırım məsələsinə gəlincə isə bu da uydurmadan, erməni yalanından başqa bir şey deyil, bu, ermənilərin yaratdığı mifik bir tarixdir.
“Əvəla müstəqillik əldə etdikdən sonra Ermənistanın qəbul etdiyi milli təhlükəsizlik konsepsiyasının özü də formal xarakter daşıyır. Ona görə ki, müstəqil dövlət olmayan, respublika kimi hərtərəfli cəhətdən çox zəif olan, təhlükəsizliyi və sərhədləri başqa dövlətlər tərəfindən qorunan bir respublikanın sözsüz ki, qəbul etdiyi milli təhlükəsizlik sənədi də Ermənistanın özü kimi formal və zəif görünür. Bu gün onlar çalışırlar ki, dünya ölkələri içində tanınmaları üçün ortaya bir sənəd qoysunlar. Ermənilər çoxdan idi ki, bu barədə danışıqlar aparırdılar. Paşinyanın birdən-birə Milli Təhlükəsizlik Strategiyasını ortaya qoyması və ona çox gülünc, həqiqətə uyğun olmayan fikirlər əsasında ön söz yazması cəfəngiyyatdan başqa bir şey deyil. Çünki hüququ, dövlət quruculuğunu, tarixi yaxşı bilməyən bir adamın rəhbərliyilə hazırlanan strategiyada yalnız belə çürük, həqiqətə uyğun olmayan, saxta, mifik fikirlər yer ala bilər. Xeyli vaxtdır Paşinyanın addımlarını izləyirik, açığını deyim ki, Paşinyan özündən yeni bir hoqqa çıxarmaq istəyir. Paşinyan “tarixə” nəzər salmaqla yeni bir saxtakarlığa imza atıb. Çünki Azərbaycanı, Türk dünyasını, eləcə də başqa dövlətləri narahat etmək gecə-gündüz onların yadından çıxmır. Paşinyanın məqsədi xalqın etimadını qazanmaqdır və buna görə də Azərbaycan, Türkiyə və digər dövlətlərin əraziləri ilə bağlı belə cəfəng fikirlər səsləndirir. Bu strategiyanın girişində onun tarixə “yer verməsi” də dediklərimizi təsdiqləyir. Bilir ki, hüquqi, dövlətçilik baxımdan hansı məsələni ortaya qoysa, xalqı aldada bilməyəcək, bu, inandırıcı görünməyəcək. Ona görə də tarixə əl atır, onun bütün çıxışlarından məlumdur ki, o özünü “tarixin bilicisi” kimi təqdim etməyə çalışır. İstəyir ki, özünü tarixi bilən, ona istinad edən bir adam kimi göstərsin. Yenə də köhnə bayatıları çağırır. Dəfələrlə dünya, Azərbaycan və Türkiyə tarixçiləri adları çəkilən qədim dövlətlərin ermənilərlə heç bir əlaqəsinin olmadığını bildiriblər. Tarixçilər tarixi saxtaslaşdırdığına görə Paşinyanın özünü də dönə-dönə tənqid ediblər. Buna baxmayaraq, kor tutduğunu buraxmayan kimi, o da çar Artaşesdən, Arşakilərdən, Van çarlığından, qondarma soyqırımdan yapışır və baş qatmağa çalışır. Mövcud olmayan Ermənistan dağlıq yaylasından, ermənilərə bağlı olmayan Van çarlığından, Arşakilərdən danışan Paşinyan öz tarixi savadsızlığını növbəti dəfə də göstərib, bununla da özünü ifşa edib. “Şərqi Ermənistan”dan danışmağın alınmadığını görən Paşinyan indi də Arşakilərdən, Artaşesdən yapışıb. Paşinyan ermənilərin bizim torpaqlarda daha “qədim” olduğunu göstərmək üçün bu qədim dövləti mənimsəməyə çalışır. Artaşeslərin, Arşakilərin və sairin ermənilərlə heç bir bağlılığı yoxdur”.
Q.Hacıyevin sözlərinə görə, saxtakar erməni tarixçiləri Şahnazaryanın, Emilyanın, Patkanovun birgə yaratdıqları konsepsiyaya uyğun saxta erməni tarixi yaradılıb və bu gün Paşinyan da o mifik tarixə “istinad” edir. “Nə Artaşeslər, nə Arşakilər, nə Tiqranların ermənilərə heç bir aidiyyəti yoxdur, onların heç biri erməni mənşəli deyil. Erməni tarixçilərinin yaratdıqları uydurma, mifik tarixi Paşinyan strategiyaya daxil edərək özünü gülməli vəziyyətə salıb. Ermənilərlə yaxından-uzaqdan əlaqəsi olmayan o qədim dövlətlərin Ermənistanın Milli Təhlükəsizlik Strategiyasına daxil edilməsi çox gülünc məsələdir” - deyə Q.Hacıyev bildirdi.
İradə SARIYEVA
