Ermənistanda fövqəladə vəziyyət rejiminin daha bir ay müddətinə uzadılması ölkədə, xüsusən də siyasi qüvvələr arasında ciddi narazılıq yaradıb. Müxalifət bəyan edir ki, hakimiyyət ona qarşı etirazların artmasından və bunun genişmiqyaslı aksiyalara çevrilməsindən narahat olaraq belə bir addım atıb. Çünki fövqəladə vəziyyətdə etiraz aksiyalarının keçirilməsi mümkün deyil və bu da indiki halda yalnız iqtidarın lehinə işləyir.
Xatırladaq ki, Ermənistan hökuməti ölkədə fövqəladə vəziyyət rejiminin daha bir ay müddətinə uzadılması barədə qərar qəbul edib. Qərara əsasən, fövqəladə vəziyyət rejimi sentyabrın 11-dək uzadılıb. Ermənistanın ədliyyə naziri Rustam Badasyan bildirib ki, buna ölkədə COVID-19 virusundan ölüm hallarının hələ də çox yüksək səviyyədə qalması səbəb olub. Amma Ermənistanın ilk ombudsmanı Laria Alaverdyan bunu absurd sayır:“Bütün ölkədə 6 ay fövqəladə vəziyyət görünməmiş haldır, biz görürük ki, fövqəladə vəziyyət tədbirləri pandemiyanın yayılmasını azaltmaq üçün deyil, açıq şəkildə etiraz aksiyalarını cilovlamaq üçün istifadə olunur”. Alaverdyanın sözlərinə görə, Nikol Paşinyan nümayişlərin hansı təhlükələri yarada biləcəyini bilən Ermənistan rəhbərlərindən biridir:“Paşinyan etiraz aksiyalarının hansı təhlükələri ehtiva etdiyini yaxşı bilir, fövqəladə vəziyyətin uzadılmasının səbəbi bunları cilovlamaqdır”. “Çiçəklənən Ermənistan” fraksiyasının deputatı Gevorq Petrosyan da eyni mövqedədir: “Mənim şəxsi fikrimcə, hakimiyyət xalq narazılığının dalğasından narahatdır, bu səbəblə fövqəladə vəziyyəti növbəti dəfə uzadır”. Erməni deputatın sözlərinə görə, Ermənistan hakimiyyəti vəziyyəti çox yaxşı başa düşərək koronavirusun arxasında gizlənib:“İddia etmək üçün bütün əsaslar var ki, “qürurlu vətəndaşlar” Nikol Paşinyana hakimiyyətə gəlmək üçün lazım idilər, artıq hakimiyyəti ələ keçirmək halında qürurlu vətəndaş Nikol Paşinyan üçün heç bir dəyərə malik deyil”.
Erməni mediası isə yazır ki, fövqəladə vəziyyət tədbirləri pandemiyanın yayılmasını əngəlləyə bilmir və bu sahədə dünyada ən pis göstəricilərdən biri məhz Ermənistana məxsusdur. Bununla bağlı “politik.am” nəşri qeyd edir:“Səs-küy, qışqırıq, rəğbət dolu sözlər, brifinqlərdə səsləndirilən ifadələr, reklamlarda dövlət dəstəyi barədə təbliğat elanlarını bir kənara qoyduqdan sonra Ermənistanda insanların koronavirusa təkbaşına müqavimət göstərdiyi və hələ də müqavimət göstərməkdə davam etdiyi məlum olur. Dövlət, hökumət, komendant yalnız maskalar taxmağı, mənasız və faydasız fövqəladə vəziyyəti təklif edir. Bu mübarizə üsulu mənasız və faydasızdır, çünki ölənlərin sayı artıq minə çatıb. Bu günlərdə ictimaiyyət səhlənkarlıq, diqqətsizlik üzündən bir ölüm xəbəri ilə şoka düşüb və bu müddət ərzində belə ölüm halları çox olub. Yanımızda yaşayan bir ailənin başına gələn real bir hekayəni təqdim edirik və təəssüf ki, belə hekayələr bir deyil, iki deyil, on minlərlədir. İndi hər şeyi sıra ilə sadalayaq. Özünün, həyat yoldaşının, uşaqlarının və yaşlı valideynlərinin koronavirusa yoluxduğunu anlayan Ermənistan Respublikası vətəndaşı, televiziyalarda səsləndirilən çağırışları rəhbər tutaraq, 8003 nömrəsinə yığaraq, qaynar xəttə zəng edir. Vətəndaş zəng etdiyi nömrədə təlimatı eşidərək 1 düyməsini basdıqdan sonra dövlətdən fəal kömək və dəstək alacağını gözləyir. Ancaq bunun əvəzinə səs yazısını dinləyir: “Əgər istiliyiniz 37,5 dərəcədən yuxarıdırsa, bir öskürək, nəfəs darlığı varsa və koronavirus xəstəsi ilə təmasda olmamısınızsa, klinikaya getməzdən əvvəl yerli sahə həkiminizə müraciət edin. Zəng üçün təşəkkür edirik”. Budur dövlətin dəstəyi, sanki yetkin insan poliklinikaya baş vurmadan öncə sahə həkimini çağıra bilməyəcək. Bunlardan sonra artıq bir o qədər də qürur duymayan və ruh yüksəkliyi olmayan Ermənistan vətəndaşı, ən azından yaşlı valideynlərinə yardım edilməsinə ümid edərək, təcili tibbi yardıma zəng edir ki, heç olmasa onları xəstəxanaya aparsınlar. Budur, burada da başqa bir sürprizlə üzləşirlər. Zəngin ləğv edilməsini xahiş edirlər, izah edirlər ki, yardım edə bilməyəcəklər. Paşinyan hakimiyyətinin inkar etməyə çalışacağı koronavirus reallığı budur․ Həkimə zəng edirsiniz ki, sizdən evdə qalmağı və poliklinikaya getməməyi xahiş etsinlər.Virusa yoluxduğunuz halda poliklinikadan edilən kömək yalnız odur ki, 14 gün evdən çıxmamaq məsləhət görülür. Komendantlıqdan heç bir zəng gəlmir. Hətta yaşadığınız mənzil sahəsi belə dezinfeksiya edilmir. Buradan da sual yaranır, koronavirus xəstəsi olan bir ailə ən az 14 gün evdə qalmalıdırsa, o halda kim alış-veriş edəcək? Kommunal ödənişləri necə ödəyəcəklər? Lazım olan dərmanı aptekdən necə əldə edəcəklər? Banka necə girmək və kredit öhdəliklərini necə ödəmək olacaq? Kreditlərin ödənişinin təxirə salınması barədə bir söz belə yoxdur. Eyni şey kommunal ödənişlərə də aiddir. Bank çox nəzakətlə bildirir ki, sizin xəstə olub-olmamağınız bizi maraqlandırmır. Komendantlıq lazımi dərmanların alınmasında heç bir köməklik göstərmir. Halbuki, hesablamalara görə, bir nəfər orta dərəcədə xəstəliyi olan insan öz cibindən 155 min dram xərcləyir. Ən yumşaq hesablamalara görə, çəkilən xərcin həcmi belədir. Hələ biz xəstənin gündə ən azı iki litr içməli olduğu şirələrin qiymətini və digər zəruri xərcləri saymırıq. Ermənistan vətəndaşı, ümumiyyətlə, xəstəliyə qarşı dövlətin dəstəyi olmadan, təkbaşına mübarizə aparır. Belə olan halda sizin fövqəladə vəziyyət rejiminiz kimə lazımdır? Xəstələri necə dəstəkləyirsiniz, xəstəliyi aradan qaldırmaqda onlara necə kömək edirsiniz, xəstəlikdən sonrakı dövrü keçmələrinə necə yardım edirsiniz ki, tam sağalsınlar? Nə üçün aciz yaşlı xəstələri, kiçik uşaqları olanları hökumət taleyin ümidinə buraxıb? Nədən, hətta “Analgin” belə olmadığı üçün insanlar öz yaxınlarını xəstəxanalardan qaçırır? Fövqəladə vəziyyətin məqsədi xəstəliyin yayılmasının qarşısını almaqdır. İnsanları iş yerlərindən məhrum etmişdiniz ki, xəstəliyin yayılmasının qarşısını ala biləsiniz. Bunun qarşısını ala bilmədiniz, bəs bunu necə kompensasiya edirsiniz, xəstələrə hər hansı bir şəkildə yardım əlini necə uzadırsınız? Əlbəttə ki, bu gün bu vəziyyətə çatmağımızın səbəblərini bir-bir araşdırmalıyıq, hər ölüm hadisəsi bir-bir araşdırılmalı və nəticədə on minlərlə xəstə üçün hansı tədbirlərin görüldüyü bir-bir cavablandırılmalıdır. Əslində hansısa ciddi tədbir də yoxdur və bu səbəbdən Ermənistan ən pis göstəricilərə malikdir”.
Nahid SALAYEV
