19/09/2020 03:59
728 x 90

Ceyhun Bayramov "CNN Türk"ə müsahibəsində Ermənistanın Tovuz istiqamətində törətdiyi təxribatdan danışdı

img

12 iyul tarixindən başlayaraq Azərbaycan-Ermənistan dövlət sərhədinin Tovuz istiqamətindən başlayaraq Ermənistan silahlı qüvvələri növbəti təxribat həyata keçirib. “Trend”in məlumatına görə, bunu Xarici işlər naziri Ceyhun Bayramov Türkiyə səfəri çərçivəsində "CNN Türk" kanalına müsahibəsi zamanı deyib.

Nazir bildirib ki, həmin təxribatın çox aydın həm siyasi, həm hərbi məqsədləri var idi. Bu təxribat işğalçı Ermənistan dövlətinin Dağlıq Qarabağdan kənar bir bölgədə iki dövlət sərhədində yeni bir gərginlik, alovlanma ocağının yaradılması ilə özlərinin üzv olduğu siyasi təşkilatları, ora üzv olan dövlətləri bu gərginliyə qatmaq məqsədi daşıyırdı:"Eyni zamanda Ermənistan rəhbərliyi yeni münaqişə ocağı yaratmaqla Ermənistanın daxilində olan sosial-iqtisadi gərginlikdən, pandemiyanın ölkəyə təsirlərindən əhalinin diqqətini yayındırmağa çalışırdı.

Digər tərəfdən isə Ermənistan bu münaqişə ocağını məhz regional böyük layihələrin keçdiyi istiqamətdə etməyə çalışırdı".

Nazir qeyd edib ki, Azərbaycan Ordusunun qətiyyətli cavab tədbirləri nəticəsində Ermənistan hərbi birləşmələri geri otuzduruldu, bu təxribatın qarşısı alındı. Əfsuslar olsun ki, bu erməni təxribatı nəticəsində Azərbaycan hərbçiləri şəhid oldu:"Mən bir daha onların yaxınlarına, ailə üzvlərinə, Azərbaycan xalqına başsağlı verirəm.

Bu təxribat zamanı Ermənistan tərəfi növbəti dəfə öz terrorçu mahiyyətini üzə çıxardı. Ermənistan ordusu tərəfindən mülki yaşayış məntəqləri atəşə tutuldu, 76 yaşlı kənd sakini bu atəşlərin qurbanı oldu. Bu, ilk hadisə deyil, bu, Ermənistan hərbi birləşmələrinin bir qayda olaraq əl atdıqları yoldur. Bunlar Ermənistan dövlətinin terrorçu mahiyyətini bir daha bəlli edir.

Bu həmin Ermənistandır ki, ASALA və digər terror təşkilatlarını dəstəkləməklə dünyada bir çox terror hadisələri törədib, qardaş Türkiyə də bu terror aktlarının qurbanı olub.

Dağlıq Qarabağ və ətraf əraziləri də işğal edərkən Ermənistan terrordan çox geniş istifadə edib".

Azərbaycanla Türkiyə arasında hərbi əməkdaşlığın qədim tarixi var. Birgə hərbi təlimlər iki dövlət arasında imzalanmış hərbi sazişə əsasən həyata keçirilir. Türkiyə səfəri çərçivəsində "CNN Türk" kanalına müsahibə verən nazir bildirib ki, təlimlər mütəmadi olaraq həyata keçirilir və hazırda Azərbaycan ərazisində keçirilən Azərbaycan-Türkiyə birgə genişmiqyaslı təlimləri də bu qəbildəndir: "Onu da qeyd etmək çox vacibdir ki, Türkiyə ilə Azərbaycan arasında olan əməkdaşlıq nəinki iki ölkənin, eyni zamanda regionun inkişafına, regionda sülhün və təhlükəsizliyin təmin edilməsinə xidmət edir. Hesab edirəm ki, hərbi əməkdaşlıq da bu yöndə dəyərləndirilməlidir".

Ceyhun Bayramov "CNN Türk"ə müsahibəsində deyib ki, Azərbaycan münaqişənin siyasi yolla, danışıqlarla həll edilməsi tərəfdarıdır. Nazir bildirib ki, münaqişənin siyasi yolla həll olunması üçün kifayət qədər beynəlxalq hüquqi baza mövcuddur. Hələ 1993-cü ildən başlayaraq BMT-nin 4 qətnaməsi var. Həmin 4 qətnaməyə əsasən, Azərbaycan ərazilərindən qanunsuz hərbi birləşmələrinin çıxarılması, Azərbaycanın məcburi köçkünlərinin həmin ərazilərə dönməsinin təmin edilməsi tələb olunur:"Eyni zamanda Azərbaycanın beynəlxalq miqyasda tanınmış sərhədlərinin bərpa olunması tələbi irəli sürülmüşdür. Eyni tələblər müxtəlif beynəlxalq təşkilatların sənədlərində, qətnamə və qərarlarında da öz əksini tapmışdır. Belə olan təqdirdə məsələnin siyasi dialoq yolu ilə həlli aydındır.

Hesab edirik ki, burada Ermənstan tərəfinə beynəlxalq təşkilatlar və dövlətlər tərəfindən ciddi təzyiqlər olmalıdır. Bu məsələdə Azərbaycanın mövqeyi dəyişməzdir və dönməzdir. Həmin o qətnamələr tam olaraq yerinə yetirilməlidir".

Son xəbərlər