Günay Hüseynova: “Bu da Naxçıvanda əhalinin sosial şəraitinin yaxşılaşmasına öz töhfəsini verməklə iqtisadiyyatın inkişafına da təkan verəcək”
Türkiyənin Xarici işlər naziri Mövlud Çavuşoğlu azərbaycanlı həmkarı Ceyhun Bayramovla görüşdən sonra keçirilən mətbuat konfransında maraqlı mesajlar verib.
O bildirib ki, Türkiyədən Naxçıvana dəmir yolunun və qaz xəttinin çəkilməsi Azərbaycanla Türkiyə arasında qarşıda duran ən mühüm məsələlərdən biridir:“Azərbaycan Türkiyəyə təbii qaz ixrac edən ölkələr arasında ilk sıradadır. Türkiyə Azərbaycandan ixrac edəcəyi təbii qazın həcmini gələcəkdə daha da artıracaq. Biz daha iki layihənin həyata keçirilməsinə üstünlük veririk. Bunlardan biri Qars-Naxçıvan dəmir yolu xəttidir. İkinci isə Türkiyə üzərindən Naxçıvana təbii qazın çatdırılmadır ki, bu da strateji layihədir. Digər tərəfdən, mədəniyyət, təhsil sahələrində, universitetlər arasında əməkdaşlığın gücləndirilməsi məsələsi müzakirə edilib”.
Cavuşoğlunun açıqlamasından məlum olub ki, Azərbaycanla Türkiyə arasında viza məsələsi barəsində də müzakirə aparılıb. Onun sözlərinə görə, viza məsələsində qalma müddətinin 90 günə qədər uzadılması müzakirə edilib:"İki ölkə vətəndaşlarının pasporta ehtiyacı yoxdur. Şəxsiyyət vəsiqəsi ilə səyahət üçün təkliflərimizi də verdik. Onları da həyata keçirəcəyik”.
Göründüyü kimi, Türkiyə ilə Azərbaycan arasındakı münasibətlərin mahiyyətcə yeni mərhələyə qədəm qoyduğu əldə edilən razılaşmalardan görünür. Bunu necə qiymətləndirmək olar?
Türkiyədə fəaliyyət göstərən iqtisadçı ekspert Günay Hüseynova qeyd etdi ki, Azərbaycan dövləti və qardaş Türkiyə Cümhuriyyəti hər zaman bir-birinə qarşılıqlı dəstəyini göstərib:“Hazırda da Azərbaycan-Türkiyə münasibətləri yüksək səviyyədədir, bir sıra sahələr üzrə isə keyfiyyətcə yeni mərhələyə keçməkdədir. Naxçıvanla Türkiyə arasında dəmir yolu və qaz xəttinin çəkilməsi məsələsinin razılaşdırılmasını xüsusi qeyd etmək istəyirəm. Bu razılaşmanın əsası bir qədər əvvəl qoyulub. Azərbaycan hökuməti ilə Türkiyə hökuməti arasında Qars-İğdır-Aralık-Dilucu-Sədərək-Naxçıvan-Culfa dəmir yolu xətti layihəsi ilə bağlı Anlaşma Memorandumunun imzalanmasını buna misal göstərə bilərik. XİN rəhbərlərinin görüşündən sonra məlum oldu ki, artıq bu layihələr reallaşmaq üzrədir. Naxçıvan Muxtar Respublikasının iqtisadi inkişafının sürətlənməsində və Naxçıvanda müxtəlif adda və çeşiddə məhsul istehsalının artımında bu dəmir yolunun işə düşməsi olduqca böyük əhəmiyyət kəsb edir. Çünki Ermənistanın uzun illərdir Naxçıvanı blokadaya alması muxtar respublikada istehsal olunan məhsulların xarici ölkələrə ixrac olunmasına böyük maneə törədir. Bu da ölkədə sahibkarlığın inkişafına mane olur, mövcud potensialdan səmərəli istifadə etməyə imkan vermir və əhalinin rifah halının daha da yaxşılaşmasına əngəl yaradır. Türkiyədən Naxçıvana dəmir yolu xəttinin çəkilməsi isə bu problemləri aradan qaldıracaq və Naxçıvan Muxtar Respublikası özünün sənaye və kənd təsərrüfatı potensialını genişləndirərək daha çox xarici ölkələrlə iqtisadi əlaqələr qurmaqla yeni inkişaf mərhələsinə qədəm qoyacaq. İğdırdan Naxçıvanın sərhədinə qədər 160 kilometrlik qaz xəttinin çəkilməsi də çox önəmli məsələdir və bu layihənin həyata keçirilməsi Naxçıvan Muxtar Respublikasının qazlaşdırılmasına və təbii qazla etibarlı təminatına böyük dəstək olacaq. Bu da Naxçıvanda əhalinin sosial şəraitinin yaxşılaşmasına öz töhfəsini verməklə iqtisadiyyatın inkişafına da təkan verəcək. İki ölkə vətəndaşları arasında gediş-gəlişin daxili pasportlarla mümkünülüyü isə dövlətlərimiz arasındakı yaxınlığın yüksək səviyyədə olduğuna bir işarədir”.
Doğrudan da əldə olunan razılaşmalar iki ölkə arasındakı münasibətlərin daha yaxın və etibarlı fazaya keçdiyinə bir sübutdur. Ümidvarıq ki, bundan hər iki ölkə qarşılıqlı fayda götürəcək.
Məhəmmədəli QƏRİBLİ
