Serbiya Respublikasının Baş nazirinin müavini, Milli Təhlükəsizlik Şurasının katibi və Daxili İşlər naziri Neboyşa Stefanoviç Azərbaycana səfərə gəlib. N.Stefanoviç Bakıda bir sıra rəsmi görüşlər keçirib.
Qeyd edək ki, iyulun 12-dən etibarən Ermənistan silahlı bölmələri Azərbaycanla dövlət sərhədinin Tovuz rayonu istiqamətində təxribatlar törədib. Ermənistan Azərbaycan Ordusunun mövqelərinə basqına cəhd etsə də, adekvat cavab tədbirləri ilə geri oturdulub. Bundan sonra isə məlum olub ki, Ermənistan Tovuz döyüşlərində Serbiyadan aldığı silahları Azərbaycana qarşı yönəldib. Bu, Azərbaycan tərəfinin etirazına səbəb olub. Avqustun 7-də Serbiya prezidenti Aleksandr Vuçiç Azərbaycan prezidenti İlham Əliyevə zəng edib. O, Tovuz döyüşlərində Ermənistan tərəfinin Serbiyada istehsal olunan silahlardan istifadə etməsindən təəssüf hissi keçirdiyini bildirib. A.Vuçiç vəziyyətin araşdırılması ilə bağlı yaxın vaxtlarda Azərbaycana Serbiyanın yüksək səviyyəli nümayəndə heyətinin göndəriləcəyini qeyd edib.
Bundan sonra Serbiyanın yüksək rəsmisi Azərbaycana səfərə gəlib. Keçirilən rəsmi görüşdən sonra nümayəndə heyətinin rəhbəri bildirib ki, Serbiya ilə Azərbaycan arasında əməkdaşlığın mərkəzində olan bütün məsələlər müzakirə edilib, ölkələrin ərazi bütövlüyünə qarşılıqlı dəstək ifadə olunub. O həmçinin qeyd edib ki, Serbiya bütün münaqişələrin beynəlxalq hüququn prinsipləri əsasında və sülh yolu ilə həllinin tərəfdarıdır. Bu, münaqişə ilə üzləşən ölkələrin gələcəyi üçün vacibdir.
Qeyd edək ki, yaranan silah qalmaqlaından ən çox sevinən Ermənistan olub. Onlar bu müddət ərzində iki ölkə arasındakı münasibətlərə xələl gətirən təbliğat həyata keçirirdi. Belə gərginliyin fonunda serbiyalı nazirin ölkəmizin ərazi bütövlüyünü dəstəkləyən bəyanat verməsi necə dəyərləndirilə bilər?
Politoloq Rəşad Bayramov “Bakı-Xəbər”ə açıqlamasında bildirdi ki, Serbiyanın yüksək vəzifəli şəxsinin ölkəmizə indiki məqamda səfəri həmin ölkənin etdiyi səhvi anladığı mənasını daşıya bilər:“Qeyd edək ki, bizim ölkələrimiz arasında normal münasibət olub. Azərbaycan Serbiyanı özünə yaxın bilib. Bizə hücum olan məqamda Serbiyadan belə bir addımı görmək haqlı narazılığımıza səbəb oldu. Bununla bağlı bütün qanuni etiraz formalarını etdik. Onların səfiri XİN-ə dəvət edildi, cəmiyyətimiz tam etirazını ifadə etdi. Xatırladım ki, ölkələrimiz arasında münasibətlər yeni mərhələyə qədəm qoymuşdu. Kosovo məsələsində Azərbaycan daim Serbiyanın yanında olub. Ölkələrimiz beynəlxalq təşkilatlar çərçivəsində, eləcə də ərazi bütövlüyü məsələsində bir-birini dəstəkləyir. Azərbaycan və Serbiya arasında 2013-cü ildə imzalanmış Strateji Tərəfdaşlıq haqqında Bəyannamə, Serbiya Prezidentinin 2018-ci ilin mayında Azərbaycana səfəri zamanı imzalanmış Strateji Əməkdaşlığa dair Birgə Fəaliyyət Planı, eyni zamanda mütəmadi olaraq Azərbaycan Respublikası ilə Serbiya Respublikası arasında ticarət və iqtisadi əməkdaşlıq üzrə Hökumətlərarası Komissiya iclasları əməkdaşlığın genişlənməsində əhəmiyyətli rol oynayıb. Azərbaycan tərəfindən Serbiyaya milyonlarla dollarlıq investisiya yatırımları edilib. Yəni əməkdaşlığa dair sadalanan faktların sayını artırmaq da olar. Təbiidir ki, Serbiya belə bir dostu itirmək marağında deyil. Bu səbəbdən də maksimum dərəcədə yaranan narazılığın aradan qaldırılmasında maraqlı görünür. Baş nazirin müavininin səfərini də bu istiqamətdə atılan addım kimi dəyərləndirə bilərik. Mediaya açıqlanmasa da, güman edirəm ki, danışıqların əsas mövzusu məhz silah məsələsi ətafında olub. Yəqin ki, Serbiya tərəfi səhvini anlayan tərzdə üzrxahlıq edib. Məhz belə məqamda Serbiyanın yüksək cinli məmurunun ölkəmizin ərazi bütövlüyünə ifadə etdiyi dəstək olduqca önəmlidir. Bu, Serbiyanın bundan sonra da Azərbaycanla yaxın münasibətlərin davamında maraqlı olduğunu səciyyələndirir. Həm də Ermənistanın münasibətləri gərginləşdirmək istiqamətində atdığı addımları tam heçə endirir. Yəqin ki, Azərbaycan tərəfi də öz haqlı iradlarını Serbiya tərəfinin diqqətinə çatdırıb”.
Edilən səhvin etirafı, bu yöndə buraxılan nöqsanların aradan qaldırılması təqdir edilməlidir. Ümidvarıq, Serbiya da bu istiqamətdə səylərini davam etdirəcək ki, Azərbaycanla münasibətlərini əvvəlki məcraya sala bilsin.
Məhəmmədəli QƏRİBLİ
