22/09/2020 07:48
728 x 90

Azərbaycan XİN Mnatsakanyanın aldadıcı manevrini ifşa etdi - atəşkəsin saxlanmasını əsas məqsədə çevirmək münaqişənin həllini uzatmaq yoludur…

img

Azərbaycan Xarici İşlər Nazirliyi Ermənistan XİN başçısının növbəti manevr cəhdlərinə kəskin reaksiya verib:

“Ötən gün Ermənistan xarici işlər naziri Zöhrab Mnatsakanyanın Azərbaycanın işğal olunmuş ərazilərində Ermənistanın yaratdığı qanunsuz rejimin qondarma “naziri” ilə görüşündə Azərbaycan-Ermənistan beynəlxalq sərhədində təcavüzkar Ermənistanın hücum cəhdini müzakirə etməsi bu ölkənin növbəti təxribatçı addımıdır. Aydındır ki, qondarma qurumla oyuncaq görüşün keçirilməsi özünü aldatmaqdan başqa bir şey deyildir. O ki qaldı gərginliyin azaldılması və atəşkəsə riayət olunması məsələsinə, atəşkəs münaqişənin həlli deyil, atəşkəsin məqsədi münaqişənin əsas fəsadlarının aradan qaldırılması, ilk növbədə isə, beynəlxalq birliyin də tələb etdiyi kimi, işğal olunmuş ərazilərdən qoşunların çıxarılması üçün hərtərəfli və mahiyyət üzrə danışıqların başlanmasına zəmin yaradılmasından ibarətdir. Atəşkəs mexanizmləri Ermənistan qoşunlarının Azərbaycan torpaqlarından çıxarılması çərçivəsində texniki məsələ kimi nəzərdən keçirilməlidir.

Əgər Ermənistan həqiqətən sülhə nail olmaq istəyirsə, o zaman atəşkəsin pozulmasının səbəbi olan Ermənistanın işğal faktına və Ermənistan silahlı qüvvələrinin Azərbaycan ərazilərində qeyri-qanuni mövcudluğuna son qoymalıdır".

Ermənistanın yenidən atəşkəslə manevr etmək cəhdlərinin növbəti uğursuzluğu nəyi deməyə əsas verir?

Ermənistan hər zaman atəşkəs termini və onun diqtə etdiyi şərtlərlə müəyyən manevrlər etmək istəyir. Bunun da başlıca səbəbi mövcud status-kvonu saxlamaq cəhdləri ilə bağlıdır. Onlar gözəl anlayır ki, bu rejim olmadan münaqişənin həllini uzatmaq mümkün deyil. Təsadüfi deyil ki, bütün görüşlərdə onların qaldırdığı başlıca məsələ atəşkəsə nəzarət mexanizmlərinin gücləndirilməsilə bağlıdır. Azərbaycan tərəfi isə haqlı olaraq qeyd edir ki, atəşkəsin daha etibarlı olmasının yolu Ermənistanın işğal etdiyi torpaqlardan geri çəkilməsindən keçir. Bu gün Azərbaycanla Ermənistan arasında atəşkəs elan edilməsindən 26 il ötür. 1994-cü il mayın 8-də tərəflər arasında atəşkəsin əldə edilməsi barədə imzalanmış “Bişkek protokolu” mayın 12-də qüvvəyə minib və həmin gün cəbhə xəttində aktiv hərbi əməliyyatlar müvəqqəti olaraq dayandırılıb.

Azərbaycan və Ermənistan arasında atəşkəsin imzalanması ilə bağlı təkliflə 1994-cü il mayın 4-də Rusiya çıxış edib. Qırğızıstanın paytaxtı Bişkekdə MDB Parlamentlərarası Assambleyasının iclasında Rusiya atəşkəs haqqında saziş layihəsini tərəflərə təqdim etsə də, Ermənistan-Azərbaycan danışıqları nəticə verməyib. Əsas fikir ayrılığı protokolda, Azərbaycan və Ermənistanla yanaşı, Dağlıq Qarabağın erməni icmasına da bərabər tərəf kimi yer ayrılması olub. Mayın 19-da isə atəşkəs müqaviləsinin həyata keçirilməsinə nəzarət məqsədilə ATƏT-in Dağlıq Qarabağ üzrə daimi komitəsi yaradılıb.

Qeyd edək ki, 1993-cü ilin dekabr ayından başlayaraq Azərbaycan Silahlı Qüvvələri cəbhə xəttində uğurlu hücum əməliyyatları keçirməyə nail olub. Cəbhə xəttinin cənub istiqamətində hücum edən Azərbaycan Silahlı Qüvvələri, Horadiz qəsəbəsi də daxil olmaqla, Füzuli rayonunun 20-yə yaxın yaşayış məntəqəsini azad edib. Lakin Azərbaycan Ordusunun 1994-cü ilin fevral-mart aylarında Ağdam-Tərtər və Murovdağ istiqamətində hücumları istənilən nəticəni verməyib. Məhz bundan sonra Rusiyanın işə qarışması ilə atəşkəsin imzalanmasına dair danışıqlara start verilib. 26 illik atəşkəs müddətində ən ciddi dönüş nöqtəsi 2016-cı ilin aprel döyüşləri sayılır. 2016-cı il aprelin 2-də Ermənistan silahlı qüvvələrinin təxribatlarına cavab olaraq Azərbaycan Ordusu sürətli əks-hücum əməliyyatı ilə düşməni ağır məğlubiyyətə uğradaraq, Füzuli, Cəbrayıl və Ağdərə rayonlarının işğal altındakı ərazilərinin 2000 hektardan çox hissəsini azad edib. Həmçinin minlərlə hektar ərazi Azərbaycan Ordusunun tam nəzarətinə keçib. Azərbaycan Ordusu dördgünlük Aprel döyüşləri ilə 23 ildən sonra xalqımıza qələbə sevinci yaşadıb. Son Tovuz döyüşləri də göstərdi ki, Azərbaycan cəmiyyətində vətənpərvərlik hissləri çox yüksəkdir və biz bir qarış da olsa torpağımızı güzəştə getməyəcəyik. Bu baxımdan da Ermənistanın yersiz mövzularla baş qatmaq niyyəti alınan deyil. Yaxşı olar ki, Ermənistan daha ciddi və konstruktiv addımlar barədə düşünsün. Onda atəşkəsə daha ciddi əməl olunacaq.

Məhəmmədəli QƏRİBLİ

Son xəbərlər