İyulun 12-də Azərbaycan-Ermənistan dövlət sərhədinin Tovuz istiqamətində Ermənistanın törətdiyi təxribatdan bütün dünya xəbərdardır. Artıq beynəlxalq ictimaiyyət birmənalı olaraq bilir ki, cəbhənin Tovuz istiqamətində baş verənlərdə günahkar Ermənistandır, bunlara görə bu ölkənin hərbi-siyasi rəhbərliyi məsuliyyət daşıyır.
Bu gün Ermənistanın hərbi-siyasi rəhbərliyi bütün metodlardan istifadə edərək dünyanın diqqətini törətdiyi təcavüz, işğal cinayətlərindən yayındırmaq istəyir. Bu səbəbdən də günahı Azərbaycan tərəfin üstünə atmaq istəyir. Halbuki, Ermənistan Azərbaycanın ərazi bütövlüyünə təcavüz etmək istəyib, hərbi qulluqçularımızı, mülki əhalini öldürüb, əkin yerlərini, yaşayış evlərini iriçaplı silahlardan atəşə tutub. Azərbaycan isə, ümumiyyətlə, bir nəfər də olsun erməni dinc sakininin burnunu belə qanatmayıb. Ermənilərin törətdikləri cinayətlərin izləri isə hələ də durur.
Ermənistanın Dövlət İstintaq Komitəsinin sədri Qayk Qriqoryan iyulun 12-22-ni əhatə edən dövrə aid guya “27 fakt” üzrə Azərbaycanın hərbi-siyasi rəhbərliyinə iki cinayət işi açıb. Cinayət işlərinin adları:
a.Azərbaycanın hərbi-siyasi rəhbərliyi təcavüzkardır.
b.Azərbaycanın hərbi-siyasi rəhbərliyi hərbi cinayətkardır.
“Ermənistan hökumətinin bütün günahı Azərbaycan tərəfinin üzərinə yıxmaq cəhdindən...”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev baki-xeber.com-a bildirdi ki, Ermənistan hazırda bütün dünyada öz dayaqlarını itirməkdədir, cəbhənin Tovuz istiqamətində törətdiyi təxribat da bu ölkənin tamamilə nüfuzdan düşməsinə səbəb olub. “Ermənistanın həm keçmiş, həm də indiki hərbi-siyasi rəhbərlərinin cinayətləri saya-hesaba gəlməz. Ermənistanın hərbi-siyasi rəhbərliyi tərəfindən əvvəlcədən planlaşdırılan bu təxribatın qarşısının alınmasında Azərbaycan Ordusunun hərbi qulluqçuları böyük əzmkarlıq nümayiş etdirdilər və düşməni geri oturtdular. Düşmənin hədəfi əvvəlcədən dinc əhalini, yaşayış yerlərini atəşə tutmaq, insanları öldürmək, evləri dağıtmaq olub. Bu dəfə də belə oldu. Düşməndən fərqli olaraq, Azərbaycan Ordusunun bölmələri mülki vətəndaşları, yaşayış məntəqələrini, yaşayış binalarını, mülki obyektləri heç vaxt hədəfə almır, atəşə tutmurlar. Azərbaycanın hərbi qulluqçuları erməni mülki əhalisi ilə döyüşməyib, döyüşmür də. Hazırda Ermənistan tərəfinin Azərbaycanın hərbi-siyasi rəhbərliyinə qarşı səsləndirdiyi əsassız ittihamlar və iddialar onun məsuliyyəti öz üzərindən atmağa xidmət edir. Ermənistan hökuməti öz hərbi-siyasi cinayətlərini ört-basdır etmək üçün müxtəlif vasitələrə əl atır.
Ermənistanın Dövlət İstintaq Komitəsinin “27 fakt” üzrə Azərbaycanın hərbi-siyasi rəhbərliyinə iki cinayət işi açmasına gəlincə, həmin komitə o cinayət işini yüzlərlə fakt üzrə Paşinyana və onun ətrafına açmalıdır. Bu daha məntiqli olardı. Çünki hərbi və siyasi canilər Paşinyan və onun cinayətkar dəstəsidir. Ermənistan Dövlət İstintaq Komitəsinin bu yeni uğursuz oyunu beynəlxalq ictimaiyyətin və beynəlxalq təşkilatların diqqətini bu ölkənin hərbi-siyasi rəhbərliyinin cinayətlərindən yayındıra bilməz. Ermənistanın məlum qurumunun əsassız olaraq Azərbaycanın hərbi-siyasi rəhbərliyinə açdığı (?) “cinayət işi” bu gün Ermənistan hökumətinin bütün günahı Azərbaycan tərəfinin üzərinə yıxmaq cəhdindən başqa bir şey deyil. Amma Ermənistanın budəfəki cəhdləri baş tutmayacaq, çünki beynəlxalq ictimaiyyət cinayətkarı çox yaxşı tanıyır. Onlar Köçəryanı, Sarkisyanı, Paşinyanı və başqalarını hərbi-siyasi cinayətkar kimi məsuliyyətə cəlb etməlidirlər ki, illərdir bu adamların həyata keçirdikləri təcavüzkar siyasət nəticəsində Azərbaycanın torpaqları işğalda saxlanır, zorla orduya cəlb edilmiş erməni gənclər həyatlarını itirirlər. Onlar özlərinin olmayan torpaqlar üçün döyüşmək istəmirlər, amma Ermənistanın hərbi-siyasi rəhbərliyi onları döyüşməyə məcbur edir” - deyə Q.Hacıyev vurğuladı.
İradə SARIYEVA
