Avropa Şurası Parlament Assambleyasından Azərbaycana yönəlik növbəti ədalətsiz yanaşma sərgilənib. Qurumun məruzəçiləri Azərbaycanda “kütləvi həbslər”lə bağlı birgə bəyanat yayıblar.
Avropa Şurasının rəsmi saytında yerləşdirilən bəyanatda Azərbaycanda siyasi məhbuslar üzrə məruzəçi, İslandiyadan olan deputat Sunna Evarsdottir, Azərbaycandakı ümumi durum üzrə həmməruzəçilər Ştefan Şennak (Avstriya) və Rocer Geyl (Böyük Britaniya) ölkədə son yarım ayda həyata keçirilən “kütləvi həbslər”ə münasibət bildiriblər.
AŞPA təmsilçiləri bəyanatda Azərbaycanda inzibati həbs hallarının geniş yayılması və bu zaman prosessual tələblərə əməl olunmamasını iddia ediblər. Bəyanatda qeyd edilib ki, Azərbaycan-Ermənistan sərhədindəki toqquşmalardan sonra keçirilən nümayişə görə guya kütləvi şəkildə həbslər həyata keçirilib. Onlar da bu həbslərdən ciddi narahatdırlar: “Son hadisələr deməyə əsas verir ki, Avropa Məhkəməsinin də öz qərarlarında göstərdiyi kimi, hökuməti tənqid edənlərin əsassız həbs olunmasıyla bağlı narahatlıq yaradan mənzərə, Avropa Şurası Nazirlər Komitəsinin qeyd etdiyi kimi, inzibati həbslərdən sui-istifadə halları davam edir. Bütün bunlar isə AŞPA-nın bu ilin yanvarında qəbul etdiyi 2322 saylı qətnamədən sonra ölkədə heç bir irəliləyişin olmadığını göstərir. Yaxın vaxtlarda biz 2322 saylı qətnamənin icrası, o cümlədən, Azərbaycanda siyasi məhbuslarla bağlı görülən işlər barədə Azərbaycan nümayəndə heyətindən məlumat almağa çalışacağıq”.
Məgər sözügedən hadisələrlə bağlı ölkədə kütləvi həbslər olub? Qurumun məruzəçiləri haradan bunu uydururlar? Bəlli olan odur ki, Azərbaycanla bağlı sifarişli 2322 saylı yanvar qətnaməsi yenidən gündəmdədir və bu minvalla ölkəni qaralamaq istəyirlər.
“AŞPA məruzəçiləri müəyyən dairələrdən aldıqları siyasi sifarişə uyğun olaraq belə yaramaz qərarlar qəbul edirlər”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, bütün bunlar bir daha onu göstərir ki, AŞPA-nın məqsədi ancaq Azərbaycanı qaralamaqdır: “AŞPA-nın Azərbaycanda siyasi məhbuslar üzrə məruzəçilərinin belə bəyanatla çıxış etmələri onların ədalətsiz olduqlarını bir daha sübut edir. Ümumiyyətlə, AŞPA Azərbaycana qarşı yol verilən ədalətsiz münasibətlərə ancaq seyrçi mövqedən yanaşıb. Son qərəzli bəyanatları ilə bir daha öz çirkin niyyətlərini ortaya qoydular. Qarabağa dəstək mitinqi qürurverici hadisə idi. Ancaq bu dəstək aksiyasından müəyyən cinayətkar qruplar sui-istifadə edərək qanunları pozur, dövlət əmlakına ziyan vururlarsa və onlara qarşı qanuna müvafiq addımlar atılırsa, o zaman hansı siyasi təqibdən söhbət gedə bilər? Azərbaycanda buna görə kütləvi həbslər həyata keçirilməyib. Sadəcə, Azərbaycanın beynəlxalq imicinə kölgə salmaqdan ötrü bu cür qərəzli kampaniya aparılır. Hesab edirəm ki, AŞPA məruzəçiləri müəyyən dairələrdən aldıqları siyasi sifarişə uyğun olaraq belə yaramaz qərarlar qəbul edirlər”.
Ekspertin fikrincə, AŞPA belə qərəzli mövqe sərgiləməklə Azərbaycanı müstəqil siyasət yeritmək kursundan döndərə bilməyəcək.
Vidadi ORDAHALLI
