Prezident İlham Əliyev son çıxışlarından birində Ermənistanın regional layihələrdən tam təcrid olunmasından və bu istiqamətdə Azərbaycanın əldə etdiyi uğurlardan danışıb:“İndi Ermənistan elə vəziyyətdədir ki, özünü itirib, səhv addımlar atır. Sərhəddəki təxribat, hesab edirəm ki, onlar tərəfindən bir sınama cəhdi idi ki, baxsınlar, görsünlər buna kim nə reaksiya verəcək. Gördülər ki, onların müttəfiq saydıqları bütün ölkələr ya bizi dəstəklədilər, ya da neytral qaldılar. Gördülər ki, Azərbaycanın beynəlxalq dəstəyi nə qədər güclüdür. Ona görə bu, onlar üçün dərs olmalıdır”.
Prezident bildirib ki, erməni xalqı nəhayət başa düşməlidir ki, normal ölkədə yaşamaq istəyirlərsə, erməni silahlı qüvvələri mütləq bizim torpaqlarımızdan çıxmalıdır:“Bu bizim tarixi, əzəli torpağımızdır. Biz heç vaxt işğalla barışmayacağıq. Ərazi bütövlüyümüzün bərpası bizim üçün bir nömrəli məsələdir. Digər tərəfdən, Ermənistan bütün regional layihələrdən təcrid edilib. Biz onları təcrid etmişik. Bizim bölgəmizin yeni enerji, yeni nəqliyyat, yeni telekommunikasiya xəritəsinə baxın, orada Ermənistan yoxdur. Bütün bu xətlər, o cümlədən bizim təşəbbüsümüzlə reallaşdırılan layihələr Ermənistandan yan keçib. Artıq onlar regional əməkdaşlıqdan tamamilə kənardadırlar. Bunu biz etmişik və gizlətmirik. Bütün imkanlarımızı səfərbər edib, bundan sonra da onları təcrid vəziyyətində saxlayacağıq. Onlar bu imkanlardan məhrum olunublar. Ancaq biz öz torpaqlarımıza qayıdacağıq, mütləq qayıdacağıq, Azərbaycan öz ərazi bütövlüyünü bərpa edəcək”.
Doğrudan da təhlillər və real mənzərə onu deməyə əsas verir ki, Dağlıq Qarabağ münaqişəsinin Ermənistana vurduğu ən böyük zərbələrdən biri düşmən ölkənin təcrid vəziyyətinə düşməsi, sosial-iqtisadi problemlər məngənəsində çabalamasıdır. İndi Ermənistanın özündə də çox yaxşı dərk edirlər ki, münaqişə həllini tapmadan Azərbaycan həyata keçirdiyi transmilli layihələrlə Ermənistanın təcridini daha da dərinləşdirəcək. Özü də bu layihələr Ermənistanın, ümumiyyətlə, regionda hansısa addım atmasının qarşısını alır. Azərbaycan dünya əhəmiyyətli nəhəng layihələr icra edir. Onların arasında Bakı-Novorossiysk, Bakı-Supsa, Bakı-Tbilisi-Ceyhan neft kəmərləri, Bakı-Tbilisi-Ərzurum, TANAP qaz kəmərləri var. Bakı-Tbilisi-Qars dəmir yolu istifadəyə verilib və bu yol vasitəsilə yükdaşımaların həcmi ildən-ilə artır. Bakı-Tbilisi-Qars Şərq-Qərb nəqliyyat dəhlizinin tərkib hissəsidir. Biz bu layihəni qonşu ölkələrlə - Türkiyə və Gürcüstanla uğurla icra etdik. Digər qonşularımızla - Rusiya və İranla Şimal-Cənub nəqliyyat dəhlizi üzrə işlər uğurla gedir və demək olar ki, bu dəhliz fəaliyyət göstərir. Bütün bu nəhəng enerji və nəqliyyat layihələri Ermənistandan yan keçib. Göründüyü kimi, biz bu nəhəng layihələri əsasən qonşularımızın hesabına icra edirik. Biz qonşularla dostluq, əməkdaşlıq, səmimiyyət əsasında münasibətləri qurmuşuq və məhz buna görə bu layihələrə nail olmuşuq. Ermənistan isə əsrlər boyu qonşulara xor gözlə baxır, qonşularına ərazi iddiaları irəli sürdüyü, hətta bəzi əraziləri işğalda saxladığına görə belə vəziyyətdə yaşamağa məhkumdur. Prezident açıq şəkildə bəyan edir ki, Ermənistanı bu vəziyyətə biz salmışıq. Faktiki olaraq, Ermənistan bu gün bizim səylərimiz nəticəsində siyasi, iqtisadi, investisiya, enerji və nəqliyyat dalanıdır. Təbiidir ki, torpaqlarımızdan çıxmayana qədər bu vəziyyət belə də qalacaq. Göründüyü kimi, Azərbaycanın bu təcrid siyasəti dünyada heç bir ölkə tərəfindən tənqid edilmir, əksinə, dəstək qazanır. Son hadisələr zamanı da gördük ki, Ermənistan necə təklənmiş vəziyyətdə qaldı. Məhz bu səhv siyasətin nəticəsidir ki, Ermənistan xalqı ona hakim olan rejimlərin, avatürist siyasətin bəlasını çəkməyə məcburdu. Ölkə dilənci vəziyyətindədir, bu şəraitə dözüm gətirməyən əhali Ermənistanı tərk edir. Ölkədəki təbii artım, demək olar ki, dayanıb, hətta əhalinin sayında azalma müşahidə olunur. Ermənistan hakimiyyətinin bu siyasətini davam etdirəcəyi təqdirdə daha da acınacalqı vəziyyətlə üzləşəcəyinə qəti şübhə yeri qalmır. Papağı qabağına qoyub, fikirləşməyin tam zamanıdır...
Məhəmmədəli QƏRİBLİ
