14/08/2020 20:18
728 x 90

Paşinyanın müstəqil yox, Sorosyönümlü siyasətinin region üçün fəsadları...

img

Prezident İlham Əliyev Balakən regional “ASAN xidmət” mərkəzi ilə tanışlıqdan sonra ASAN könüllüləri ilə görüşündə çıxışı zamanı deyib ki, Ermənistanda hakimiyyətə yiyələnən Sorosun tör-töküntüləri KTMT-nin müttəfiqləri ola bilməz: 

“Heç kəs üçün sirr deyil ki, Ermənistanın bugünkü rəhbərliyi Soros fondunun təsiri altında olan adamlardan ibarətdir. Onların tərcümeyi-halına baxmaq kifayətdir. Bu gün Ermənistanda hökumətdə, parlamentdə, məhkəmə hakimiyyətində, digər önəmli vəzifələrdə çalışanların bir çoxu Soros Fondunun və ona yaxın təşkilatların əməkdaşları olub”.

Prezident İlham Əliyev bildirib ki, Ermənistanda baş vermiş “inqilab” Sorosun və ona yaxın dairələrin növbəti təxribatı olub:“Düzdür, erməni xalqı əvvəlki hakimiyyətə nifrət edirdi, bunu gizlətmirdi. Ermənistanın əvvəlki hakimiyyəti nifrətə layiqdir. Ancaq onun yerinə gələn qruplaşma əvvəlki hakimiyyətdən o qədər də fərqlənmir. Təsadüfi deyil ki, Soros Fondu pandemiya ilə əlaqədar bu yaxınlarda Ermənistana 600 min dollar maliyyə yardımı göstərib. Başqa hansı ölkəyə göstərib? Postsovet məkanında heç bir ölkəyə göstərməyib. Azərbaycana göstərib? Yox. Azərbaycanda Soros Fondunun izi-tozu da qalmayıb. Çünki onlar burada təxribatla məşğul idilər, gənclərin beyinlərini zəhərləyirdilər. Gəncləri öz dövlətinə qarşı qaldırmaq istəyirdilər. Ona görə onların ayağı kəsildi. Amma onlar Ermənistanda geniş qol-qanad açıblar və gizlətmirlər, bu açıq bir ianədir. Biz bilirik ki, Ermənistanın indiki rəhbərliyi Soros fondundan altdan-altdan da pul alır, onların agentləridir, onların sifarişini icra edir. Ona görə bu gün Soros Fondu açıq-aydın Ermənistan rəhbərliyinə 600 min dollar ianə verib. Bu, KTMT-yə üzv olan ölkələri düşündürməməlidir? Əlbəttə ki, düşündürməlidir. Bir də Ermənistan qorxa-qorxa gedib KTMT-nin ətəyindən yapışarkən yadına salsın ki, KTMT-ni necə diskreditasiya etmişdi, təşkilatın baş katibini həbs etmişdi. Sonra təzyiq nəticəsində onu buraxdı. Ancaq cinayət işi bağlanmadı. KTMT-yə bir il ərzində yeni baş katibin təyin olunmasına imkan vermirdi. Bir də ki, Ermənistanın indiki baş nazirinin partiyasının adı nədir? Bunu KTMT-də yaxşı bilirlər. Onu əgər Azərbaycan dilinə tərcümə etsən, bunun adı “çıxış”dır. Çünki bu adamlar hakimiyyətə bu şüarla gəliblər. “Çıxış!”, haradan çıxış? İki təşkilatdan – KTMT-dən və Avrasiya İqtisadi Birliyindən. Budur onların məramı, budur onların əsl sifəti!”.

Göründüyü kimi, ölkə başçısı Paşinyanın və komandasının Sorosun təsiri altında olduğunu diqqətə çatdırıb. Bunun region üçün nə kimi fəsadları var?

  • “Ermənistanda hakimiyyəti ələ keçirən bu cərəyan nəinki öz ölkələri, eləcə də bütün region üçün əsl təhlükə mənbəyi sayılır”

Beynəlxalq məsələlər üzrə ekspert Yeganə Hacıyeva “Bakı-Xəbər”ə açıqlamasında bildirdi ki,  bu tip qlobal fondların, onların regional və lokal təmsilçiliklərinin ölkələr üzrə fəaliyyəti haqqında söz açmaq yerinə düşər:”Məsələ ondadır ki, bu kimi təsisatlar mövcud olduqları ölkələrdə daha çox gənclər sektoru ilə təmas qururlar. Bu, məsələnin üzdə görsənən tərəfidir, görsənməyən tərəfi isə belə təsisatların ölkələr  daxilində kənar nüfuz agentləri, cəmiyyətlərə yad dəyərlərin daşıyıcısı kimi fikir  liderlərinin yetişdirilməsindən ibarətdir. Bunun məntiqi axarı kimi cəmiyyətlərdə yad dəyərlər daşıyıcısı olan alternativlərin yaranması və çox asanlıqla dövlətlərin milli maraqlarına zidd gedə biləcək liderlərin yetişdirilməsi prosesi aparılır.  Belə liderlərin vasitəsilə hökumətlərin öz məqsədləri üçün idarə olunması perspektivləri güdülür. Bütün dünyada belə təsisatların öndə gedənlərindən biri Sorosun Açıq Cəmiyyət Fondudur.

Ermənistanda “inqilab”  yolu ilə hakimiyyətə gələn Nikol Paşinyanın amerikalı iş adamı Corc Sorosun təsis etdiyi Soros Açıq Cəmiyyəti (Soros Fondu) tərəfindən dəstəkləndiyi çoxdan deyilir. Bunu nəinki Ermənistanın daxilindəki siyasi qüvvələr, hətta beynəlxalq analitiklər də zaman-zaman şərh ediblər.

Ona görə də Paşinyanın 2018-ci ildəki küçə yürüşləri, qanunsuz mitinqləri və kütləvi aksiyalarının arxasında əslində hansı qüvvələrin dayandığı hər kəsə bəllidir. Bu qüvvələr nəhayət küçədən gələn Paşinyanın baş nazir olmasına da nail oldular. Bundan sonra Ermənistan daxili siyasətində parçalanmalar baş verdi. Hakimiyyət, faktiki olaraq, Qarabağ klanı və anti-Sorosçu müxalifətçilər arasında var-gəl etməkdədir. Baxmayaraq, Paşinyan özü süni davranışları ilə vəziyyətin belə olmadığını, əksinə, hər şeyin onun ürəyincə olduğunu göstərməyə çalışır. Onu Sorosun əlaltısı olmaqda ittiham edənləri isə ən sərt şəkildə cəzalandırır. Son həbslərin də anti-Soros cameəsində baş verdiyini iddia edənlər az deyil. Belə qənaətə gəlinir ki, Paşinyan əsasən Rusiyaya meylli olan, anti-Soros ovqatlı siyasiləri sıradan çıxarır. Çünki Rusiyaya meylli olmaq elə anti-Soros olmaq deməkdir. Amma Ermənistanda Sorosla bağlı maraqlı proseslər yaşanır. “Sorosun uşaqları” deyilən zümrə heç vaxt hakimiyyətdə bu qədər təmsil olunmayıb. “Vahid Ermənistan” partiyasının sədri Xaçik Asryan bildirib ki, milli suveren dövlətləri məhv edən Amerika və avantürist Soros Ermənistanda öz geniş şəbəkəsini qurub, faktiki olaraq Ermənistan hakimiyyətini ələ keçirib. Paşinyan hər vəchlə bundan yayınmağa çalışır. Hətta Rusiya kanalına verdiyi müsahibədə Sorosun ondan əvvəl də Ermənistanda fəaliyyət göstərdiyini deyib. Bu baxımdan da Prezident İlham Əliyevin çıxışında Ermənistandakı Soros amilinə belə geniş yer verməsi çox yerinə düşdü. Ermənistanda hakimiyyəti ələ keçirən bu cərəyan nəinki öz ölkələri, eləcə də bütün region üçün əsl təhlükə mənbəyi sayılır”.

Soros istənilən ölkəyə nüfuz etmək niyyətində ola bilər. Amma real vəziyyət və bu şəbəkənin ölkələrdə hansı mövqeyə sahib olması həmin dövlətlərdə olan təhlükəlilik əmsalının göstəricisi sayıla bilər.  Ermənistan bu istiqamətdə lider mövqedə bərqərar olub.

Məhəmmədəli QƏRİBLİ

 

Son xəbərlər