Ermənistanın xarici işlər naziri Zöhrab Mnasakanyan “The Jerusalem Post” qəzetinə verdiyi müsahibədə Azərbaycanla İsrail arasında olan hərbi əməkdaşlıqdan narahatlıq ifadə edib:
“Baxmayaraq ki, son vaxtlar Ermənistan-İsrail münasibətləri yaxşılaşır, xüsusilə də prezident Armen Sarkisyan cari ilin yanvar ayında İsrailə səfər edib, amma İsrail tərəfdən Azərbaycana hücum silahlarının tədarükünün davam etdirilməsi “problemi” həll olunmamış qalır”.
Nəşr xatırladır ki, Azərbaycan İsrailin yaxın həmkarıdır. Bakı yəhudi dövlətinin istehlak etdiyi neftin 40 faizini tədarük edir, həm də ənənəvi olaraq, İsrail silahının - pilotsuz uçan aparatların, raket komplekslərinin alıcısıdır.
Erməni nazir bildirib ki, Azərbaycanla silah ticarəti ölümsaçandır:“Biz bu məsələ ilə ardıcıl məşğul olacağıq, o hər zaman bizim gündəliyimizin ayrılmaz hissəsi olacaq - həm ikitərəfli, həm də çoxtərəfli müstəvidə. İsrail Azərbaycanla bu ölümsaçan biznesi dayandırmalıdır”.
Yaxın günlərdə Azərbacanla sərhədin şimalında yaşanmış gərginlik zamanı guya erməni hərbçiləri tərəfindən bir neçə İsrail istehsallı pilotsuz uçan aparatın vurulması barədə sualı cavablandıran erməni diplomat bildirib ki, döyüş fəaliyyəti Azərbaycana qarşı yönəlib və bu zaman silahın haradan alınması məsələsi əhəmiyyət daşımır. Mnasakanyanın sözlərinə görə, guya Ermənistan atəşkəs rejiminin davam etdirilməsinə hazırdır.
Maraqlıdır ki, Ermənistanın özü dilənçi vəziyyətində ola-ola başqa dövlətlərdən, hətta uzaq ərəb ölkələrindən belə silah tədarük edir. Amma bizim öz strateji tərəfdaşımızla olan münasibətlərimizi dayandırmağı tələb edir. Erməni tərəfinin bu iddialarını nə dərəcədə əsaslı saymaq olar?
Politoloq Rəşad Bayramov “Bakı-Xəbər”ə bildirdi ki, İsrail Azərbaycanın hərbi sahədə də mühüm tərəfdaşlarından biridir:“Biz, həmçinin, müdafiə sənayesi sahəsində fəal əməkdaşlıq edirik və bu əməkdaşlıq artıq bir neçə ildir davam edir. Bu əməkdaşlığın nə dərəcədə geniş olduğunu göstərmək üçün bir rəqəmi diqqətinizə çatdıracağam. İndiyədək Azərbaycan və İsrail şirkətləri tərəfindən müdafiə avadanlığının alınması ilə bağlı imzalanmış müqavilələrin dəyəri milyardlarla dollarla ölçülür. Bizim münasibətlərimiz çox geniş, şaxələnmiş münasibətlərdir, bir çox sahələri əhatə edir. Biz çox yaxın dostluq münasibətləri qurmuşuq və gözlənir ki, hərbi əməkdaşlıq bundan sonra daha da genişlənəcək. Azərbaycan–İsrail əlaqələri həmişə yüksək səviyyədə olub. Bu əlaqələrdən Azərbaycan nəinki ziyan çəkməyib, əksinə, bir sıra strateji sahələrdə yetərincə bəhrələnib. İsrail, praktiki olaraq, təcrübə qazanmaq və öyrənmək baxımından Azərbaycan üçün ən etibarlı müttəfiqlərdən sayılır. Bu ölkədə bizim üçün yararlı ola biləcək kifayət qədər maraqlı və səmərəli nümunələr var. İsrail həm də Azərbaycan üçün açıq ölkələrdən biri kimi dəyərləndirilməlidir. Əlaqələrin yüksələn xətlə inkişafı isə Azərbaycana ilk növbədə zəngin hərbi təcrübə, strateji və taktiki üstünlük vəd edir. Azərbaycan–İsrail əlaqələrinin müzakirəsinə Ermənistanın qatılmaq haqqı yoxdur. Çünki Ermənistan müstəqil mövqeyi və siyasi xətti olan bir dövlət deyil. Burada isə söhbət daha ciddi məsələlərdən gedir. Əlbəttə, ermənilərin bu əlaqələrdən əndişələnəcəyi şübhə doğurmur. Amma gəlin bir faktı unutmayaq ki, Azərbaycan–İsrail əlaqələrinin genişlənməsindən Ermənistandan da çox narahat olan xeyli ölkə var.
İsrail Azərbaycana ən modern silah-sursatın satılmasında maraqlıdır. Eyni zamanda Azərbaycanla hərbi sənaye kompleksində müştərək işlərin görülməsində maraqlıdır. Bütün qısqanclıqlara, etirazlara baxmayaraq, Azərbaycan sərbəst şəkildə siyasətini davam etdirməlidir. Bu əməkdaşlığın hər iki ölkə üçün böyük faydası olacaq. Ermənistanın əndişələri bu əməkdaşlığa heç bir zərər yetirə bilməz”.
Yaxşı olar ki, Ermənistan özünün silah aldığı ölkələrlə münasibətlərinə aydınlıq gətirsin. Azərbaycanın strateji tərəfdaşları ilə münasibətləri möhkəm dayaqlar üzərində bərqərar olub və buna xətər yetirməyə onun gücü çatmaz.
Məhəmmədəli QƏRİBLİ
