Məlum olduğu kimi, Azərbaycan təhsilinə tamamilə yeni və təyinatı hamı üçün sürpriz sayılacaq bir şəxs rəhbərlik edəcək. Prezident İlham Əliyev Emin Əmrullayevi Təhsil naziri təyin olunması ilə əlaqədar videoformatda qəbul edərkən onu ölkənin son illər ərzində yetişdirdiyi milli kadr kimi təqdim edib:
"Bir neçə il bundan əvvəl mənim təşəbbüsümlə Azərbaycan gənclərinin xaricdə təhsil almaları üçün xüsusi proqram qəbul edilmişdir. Bu proqram çərçivəsində minlərlə Azərbaycan gənci dövlət vəsaiti hesabına xarici ölkələrin aparıcı ali məktəblərinə ezam edilmişdir. Onlardan biri də sizsiniz və siz bu proqramla əhatə olunmusunuz. Bildiyiniz kimi, biz bu proqramı Dövlət Neft Fondunun xətti ilə həyata keçirdik. Bu da rəmzi xarakter daşıyır. Biz bu proqramı dövlət büdcəsi hesabına həyata keçirə bilərdik, ancaq mən bunun məhz Dövlət Neft Fondunun xətti ilə keçirilməsinə qərar verəndə qeyd etmək istəyirdim ki, bu strateji əhəmiyyət daşıyır. Çünki bu günə qədər Dövlət Neft Fondunun xətti ilə həyata keçirilən layihələr strateji əhəmiyyətli layihələrdir. Onların arasında, ilk növbədə, məcburi köçkünlərin yaşayış səviyyəsinin yaxşılaşdırılması layihələridir. Böyük infrastruktur layihələri və bu proqram məhz bu xətlə icra edilib. Ona görə, bu proqram qəbul olunanda həm bu məsələ öz əksini tapdı, eyni zamanda, mənim yadımdadır, o vaxt bəzi hökumət üzvləri təklif edirdilər ki, bir halda biz gəncləri dövlət hesabına xaricdə oxutdururuq, onların qarşısında şərt qoyulmalıdır ki, onlar təhsili başa vurandan sonra mütləq ölkəyə qayıtsınlar və məcburi qaydada 5-10 il ölkəmizdə işləsinlər.
Mən buna müsbət yanaşmadım. Yadımdadır, o vaxt mən dedim, biz bu işi görürük ki, ölkəmiz, xalqımız üçün gənc kadrlardan ibarət intellektual potensial yaradaq. Biz bunu edirik ki, gənclərimiz dünyanın aparıcı ali məktəblərində oxusunlar. Biz onları necə məcbur edə bilərik, onların qarşısına necə şərt qoya bilərik? Biz Azərbaycanda elə bir şərait yaratmalıyıq ki, onlar özləri qayıtsınlar. Çünki Azərbaycan vətəndaşları, onların mütləq əksəriyyəti öz Vətəninə, torpağına bağlı olan insanlardır. Siz də bunun şahidisiniz, o vaxt heç bir şərt qoyulmadan biz gəncləri xaricə ezam etdik, oxutdurduq. Hətta demişdim ki, onların bəziləri ölkəmizə qayıtmasa belə, yenə də onlar Azərbaycan torpağının övladlarıdır. Əgər onların istənilən ölkədə yaşaması onları qane edirsə, onlar orada da Azərbaycanla öz əlaqələrini kəsməyəcəklər. Artıq bu gün dünyada mövcud olan və fəallaşan Azərbaycan icmaları ölkəmizə də dəstəkdir. Biz də onları dəstəkləyirik. Dəfələrlə demişəm ki, bütün Azərbaycan vətəndaşları, xaricdə yaşayan azərbaycanlılar bilirlər ki, onların arxasında güclü Azərbaycan dövləti dayanır. Buna görə, bu müsbət təcrübə öz bəhrəsini verdi və siz bu proqram xətti ilə xaricdə təhsil almış insan kimi bunu görürsünüz. Siz qayıtdınız, burada çalışdınız, gənc olmağınıza baxmayaraq, sizə böyük vəzifələr etibar edilmişdir və bu gün siz nazir vəzifəsinə təyin olunursunuz".
Prezidentin özünün şəxsən yetişdirdiyi kadrların bu gün ölkədə ən yüksən postlara təyin olunmaları nəyin göstəricisi sayıla bilər?
Təhsil eksperti, professor Məhərrəm Zülfüqarlı “Bakı-Xəbər”ə açıqlamasında bildirdi ki, son təhsil naziri təyinatı doğrudan da sürpriz oldu:“Heç kimin gözləmədiyi cavan bir adam bu mühüm vəzifəyə təyin edildi. Doğrudan da artıq İlham Əliyevin öz yetişdirdiyi kadrlar onun komandasında təmsilçilik qazanır. Necə deyərlər, Prezident əkdiyi ağacların barını görürür. Xaricdə təhsilə verilən dövlət qayğısından bir ailə olaraq biz də bəhrələnmişik. Mənim oğlum da magistratura təhsilini dövlət xətti ilə alıb. Artıq xaricdə təhsil alan tələbələrimiz ölkəmizdə nazir postuna təyin olunursa, deməli, layihə bəhrə verib. Qəbul etməliyik ki, müasir dünyaya inteqrasiya olunmaq üçün Qərb təhsili mühüm rol oynayır. Xüsusilə də orta məktəbi Azərbaycan dilində başa vurub, gedib Qərbdə ingiliscə ali təhsil alıb kadr kimi yetişən gənclərimizin yeri tam başqadır. Onların bünövrəsi məhz milli ruhda qoyulub. Yeni nazirimizin təqdimatında da gördük ki, əsl sadə Azərbaycan ailəsində böyüyüb. Prezidentin ona verdiyi tapşırıqları izlədim. Hiss olunurdu ki, həmin tapşırıqları həyata keçirməyə ürəkdən razı və hazır olan adamdır. Bundan əvvəl bizim bir xarici işlər nazirimiz vardı - Elmar Məmmədyarov. Onu nə qədər tənqid etdilərsə, adam Azərbaycan dilində danışmağı öyrənmədi, heç buna həvəs də göstərmədi. Müsbət haldır ki, artıq bizdə mühüm postlara milli olan, lakin modern təhsil almış gənclər gətirilir. Belə nəticənin əldə olunmasında ölkə başçısının böyük əməyi var. Kadr bazasında baş verən bu yenilənmənin həm idarəetmənin çevikliyinə, həm də səmərəliliyinə mühüm təsiri olacaq. Yəqin ki, biz yaxın zamanlarda təhsilimizdə olan yeniliklərin şahidi olacağıq. Çünki təhsil innovasiyanı sevən sahədir”.
Ümidvarıq ki, ölkə başçısının göstərdiyi yüksək etimadı yeni kadrlar öz əməli fəaliyyətlərində olan nailiyyətləri ilə doğrultmuş olacaqlar.
Məhəmmədəli QƏRİBLİ
