Azərbaycan və Türkiyə arasında hərbi əməkdaşlıq haqqında sazişə əsasən, Azərbaycanda hər iki ölkənin quru qoşunları və Hərbi Hava Qüvvələrinin iştirakı ilə birgə genişmiqyaslı döyüş atışlı taktiki və taktiki-uçuş təlimləri keçiriləcək.
Azərbaycan Müdafiə Nazirliynin məlumatına görə, təlimlərə iki ölkənin ordularının şəxsi heyəti, zirehli texnikası, artilleriya qurğuları və minaatanları, həmçinin hərbi aviasiya və Hava Hücumundan Müdafiə vasitələri cəlb ediləcək.
Plana əsasən, təlimlər avqustun 1-dən 5-dək quru qoşunlarının cəlb edilməsi ilə Bakıda və Naxçıvanda, iyulun 29-dan avqustun 10-dək hərbi aviasiya vasitələrinin iştirakı ilə Bakı, Naxçıvan, Gəncə, Kürdəmir və Yevlaxda keçiriləcək.
Ümumilikdə iki ölkə arasında mütəmadi olaraq hərbi təlimlər keçirilir. Onların arasında illik hərbi əməkdaşlıq planına əsasən iki ölkənin Hərbi Hava Qüvvələrinin (HHQ) iştirakı ilə "TurAz Qartalı - 2017" və "TURAZ Şahini - 2018" birgə taktiki-uçuş təlimləri var.
2019-cu ilin iyulunda "Sarsılmaz qardaşlıq-2019", həmin ilin mayında “Mustafa Kamal Atatürk-2019” Azərbaycan-Türkiyə birgə döyüş atışlı taktiki təlimləri olub.
Qeyd edək ki, bu təlimlərin keçirilməsindən Ermənistan ciddi əndişələnib. Təsadüfi deyil ki, məhz buna görə də onların mətbuatı və hərbi ekspertləri təlimlərin mahiyyətilə bağlı çaşdırıcı rəylər verməyə başlayıblar. Hətt gülməli iddia ilə çıxış edərək bildirirlər ki, güya birgə hərbi təlimlərin əsl mahiyyəti Azərbaycandakı daxili vəziyyətlə bağlıdır. Ermənilərin bu iddiaları və təlimlərin əsl mahiyyətilə bağlı bizim hərbi ekspertlər nə düşünür?
Hərbi-siyasi şərhçi Ramil Məmmədli “Bakı-Xəbər”ə açıqlamasında bildirdi ki, Azərbaycanla Türkiyə arasında strateji əməkdaşlıq və qarşılıqlı yardım haqqında müqavilə 1994-cu ilin fevral ayının 9-da imzalanıb:“Bu müqavilə imzalanan zaman tərəflərin 1921-ci ildəki “Qars müqaviləsi”nə sadiq olduqları da ifadə olunub. Yəni bu müqavilədə həm də hərbi sahədə əməkdaşlığa geniş yer verilib. Həmin zamandan bəri bu istiqamətdə ciddi əməkdaşlıq davam edir. Son 6 ildə Azərbaycan Müdafiə Nazirliyi ilə Türkiyənin analoji qurumu arasında əməkdaşlıq daha intensiv hal alıb. Birgə təlimlərin sayı artıb, genişmiqyaslı hərbi təlimlər keçirilib, hərbi-texniki əməkdaşlıq sahəsində əlaqələr daha da inkişaf etdirilib. Bizim ordularımızın qoşun növləri arasında ayrı-ayrılqda hərbi təlimlər keçirilir. 2018-ci ildə iki ölkə arasında ilk dəfə irimiqyaslı hərbi təlimlər keçirildi. Plana uyğun olaraq, ayın 29-dan başlayaraq birgə təlimlərə start veriləcək. Budəfəki təlimlər Azərbaycanın bir neçə şəhərini və bölgəsini əhatə edəcək. Aydındır ki, bu cür təlimlər ilk olaraq Ermənistanı narahat edir. Ermənistan cəmiyyətində belə bir fikir formalaşıb ki, güya bu təlimlər Tovuzdakı hadisələrlə bağlıdır. Erməni KİV-i bu istiqamətdə ciddi təbliğat aparır. Ancaq bu əsla belə deyil. Bu cür irimiqyaslı hərbi təlimlər əvvəlcədən planlaşdırılır. Ermənistandakı narahatlıq başadüşüləndir. Cünki onlarda genetik olaraq Türkiyə və türk əsgəri ilə bağlı bir qorxu formalaşıb. Buna görə də, bizim hərbi əməkdaşlığımız onları daha dərindən narahat edir. Hesab etmirəm ki, belə təlimlərlə ölkələrimiz kimlərəsə hansısa ismarıcı verir. Bizim üçün önəmli olan ordumuzun bütün parametrlər üzrə yoxlanışını həyata keçirməkdir. Ermənistan mətbuatında bunu bizim daxili problemlərimizlə əlaqələndirmək cəhdi də tam dezinformasiyadır. Bizim daxili vəziyyətimiz stabildi. Hər hansı daxili problemi aradan qaldırmaq üçün isə Azərbaycanın kifayət qədər gücü var. Bura kənar dövlətin dəstəyi və ya ordunun gücü lazım deyil. Ölkəmizdə həm də milli vətənpərvərlik hissləri yüksək səviyyədədir. Ermənistan yaxşı olar ki, öz daxili vəziyyətinə fikir versin. Orada ciddi parçalanma var. Hətta onların ordusunun daxilində belə bir neçə tirəlik hökm sürür. Ermənistanın bu yöndə yaydığı məlumat dezinformasiyadan başqa nəsə deyil”.
Təbiidir ki, Ermənistan narahatlığını gizlədə bilmədiyi üçün belə yalanları tirajlamaqla məşğul olur.
Məhəmmədəli QƏRİBLİ
