Məlum olduğu kimi, ermənilərin Tovuz təxribatından sonra dünyanın bir çox ölkələrində ASALA-nın törəmələri olan erməni millətçiləri diaspor təmsilçilərimiz olan soydaşlarımıza hücumlar etdilər. Təbiidir ki, diaspor fəallarımız onların hücumlarını cavabsız qoymayıb. Soydaşlarımızın bu fədakarlığı dünyanın müxtəlif ölkələrində yaşayan azərbaycanlılar tərəfindən böyük rəğbət hissi ilə qarşılanıb.
Ancaq bəzi sapı özümüzdən olan baltalar bu məsələdə də ermənilərin mövqeyindən çıxış etdilər. Xüsusilə də özünə bloger adını qoyan və xaricdə oturub daima Azərbaycan dövlətini təhqir edən bəzi yutuberlərin bu istiqamətdə “fəallığı” nəzərə çarpdı. Gündüzlər xaricdə öz qaranlıq işlərini görən, gecələr isə şəxsi kanalları vasitəsilə ölkəmizin simvollarını təhqir edən bu adamlar son rəzilliklərini mill məsələdə dövlətlərinin yanında olmamaqları ilə sübut etdilər. Onlara olan ictimai qınağın ən bariz göstəricisi isə verilişlərinə olan baxış saylarında özünü dərhal göstərməyə başladı. Müşahidələrimiz göstərdi ki, ermənipərəst mövqelərindən sonra onların verilişlərinə olan baxış saylarında kəskin eniş dinamikası müşahidə olunmağa başlayıb. Antimillət, antidövlət mövqeyində olmağın bu göstəriciyə olan təsiri barədə ekspertlər nə düşünür?
Media məsələləri üzrə ekspert Azər Həsərət “Bakı-Xəbər”ə açıqlamasında bildirdi ki, həmin adamların bütün davranışları antimilli və antidövlət xarakterlidir:“Onlar iddia edirlər ki, güya Azərbaycanda daha yaxşı şəraitin yaradılması, insan haqlarının qorunması istiqamətində çalışırlar. Əslində isə onlar iddia etdikləri amallar uğrunda mücadilə etmirlər. Biz illərdir deyirik ki, bu adamlar antimilli, antidövlətçi xətt tutublar. Bu vaxta qədər müxtəlif üsul və vasitələrlə maskalanmağa çalışırdılar. Belə böhranlı hallar ortaya çıxanda, əsl simalarını göstərməkdən də çəkinməyiblər. İndiki halda həmin şəxslər Ermənistanın Azərbaycana olan açıq təcavüzünü belə gözardı edirlər. Onlar Ermənistanla bağlı tənqidi fikir söyləməkdən belə çəkinirlər. Dünyanın müxtəlif şəhərlərində azərbaycanlıların küçələrə çıxıb ermənilərə etiraz etməsini belə antimilli mövqedən yozmağa çalışırlar. Hətta Sevinc Osmanqızı utanmadan deyir ki, bu məsələlərdə ermənilərin günahı yoxdur, belə qarşıdurmaları Azərbaycan hökuməti təşkil edir. Bir insan öz millətinə, dövlətinə nə qədər nifrət etməlidir ki, belə bir məqamda bu cür yalan yaymaqla düşmənimizin dəyirmanına su töksün? Bu onların əsl siması və mahiyyətidir. Biz həmişə demişik ki, müxalifçilik etmək istəyənlər bu fəaliyyəti ölkənin içində etsələr yaxşı olar. Qəbul edək ki, müəyyən səbəblərdən ölkə xaricində də müxaliflik edənlər var. Ermənistanın bizə hücum etməsi, ərazilərimizi işğal etməsində heç bir müxaliflik ola bilməz. Burada biz bütün siyasi maraqları kənara qoyub, Ali Baş Komandanın ətrafında sıx birləşməliyik. Təəssüflər olsun ki, belə məqamlara adı keçən şəxslər düşmənə cavab vermək əvəzinə, ona dəstək olurlar. Artıq bunu görənlər başa düşür ki, belə adamların arxasınca getmək doğru deyil. Bu səbəbdən də internet izləyicisi olan vətəndaşlarımız bunların maskalarının cırıldığını gördüyü üçün, onların reytinqi düşməyə başlayıb. Elə kəsim insanlar vardı ki, onlara hakimiyyəti tənqid etdiklərinə görə inanırdı. Yəni bəzi qəlblərə yol tapa bilmişdilər. Görəndə ki, bu adamlar Ermənistanın tərəfindədir, izləyicilər onlardan imtinaya məcbur qalırlar. Düşünürəm ki, bundan sonrakı mərhələdə də insanlarımız belə adamları izləməklə bağlı götür-qoy etməlidirlər. Onları izləyib, ermənilərin qolunu quvvətləndirməyək. Çünki bu admaların bütün fəliyyəti özümüzə qarşıdır”.
Hər halda, vətəndaşlarımız bu məsələdə düzgün seçim etməyi bacarır. Anlayır ki, dövlətə müxalif olanlarla rəftarın yeganə yolu onları boykotdan keçir.
Məhəmmədəli QƏRİBLİ
