Azərbaycan Respublikasının Prezidenti İlham Əliyev Əmək və Əhalinin Sosial Müdafiəsi naziri Sahil Babayevi qəbul edən zaman bəzi yarıtmaz icra başçılarının fəaliyyəti, qanunsuz əməlləri nəticəsində hakimiyyətin də nüfuzuna zərbə vurulduğuna işarə edib:
“Neftin qiymətinin kəskin düşməsi nəticəsində təbii ki, biz dövlət investisiyalarını kəskin ixtisar etdik. Bunun nəticəsində işsizliyin səviyyəsi artmışdır. Bu da təbiidir. Çünki işsizliyi aşağı səviyyədə saxlamaq üçün dövlət bütün mexanizmlərdən istifadə edir. Əgər biz görsək ki, özəl sektorda haradasa işlər ixtisar olunur, əlbəttə, mənim göstərişimlə dövlət dərhal öz sözünü deməlidir. 2015-2016-cı illərdən başlayaraq mənim tapşırığımla ödənişli ictimai işlər yaradılmışdır. Bu işlərin yaradılmasının əsas səbəbi işsiz qalan vətəndaşları işlə təmin etməkdir. Mənim göstərişimlə bu proqramla əhatə olunan vətəndaşların sayı ildən-ilə artaraq, son məlumata görə, 38 min ödənişli iş yeri yaradılmalı idi”.
Dövlət başçısı bildirib ki, bu məqsədlər üçün dövlət büdcəsində 10 milyonlarla manat vəsait nəzərdə tutulur: "Göstəriş vermişdim ki, bu məsələyə çox ciddi nəzarət olunsun. Xüsusilə bölgələrdən gələn siqnallar bu nəzarətin tətbiqinə, əlbəttə ki, imkan yaratmışdı. Çünki bəzi hallarda insanların əməkhaqları verilmirdi, ödəniş kartları icra başçıları tərəfindən qanunsuz olaraq götürülürdü, mənimsənilirdi və s. Belə siqnallar ciddi şəkildə araşdırılmışdır. Bu və buna oxşar cinayətləri törədənlərə qarşı çox ciddi cəza tədbirləri tətbiq edildi. Mən bütün yerli icra orqanlarının nümayəndələrinə xəbərdarlıq etmişdim. İndi isə onların bir neçəsi məsuliyyətə cəlb edildi. Keçirilmiş xüsusi əməliyyatlar nəticəsində onların cinayətləri tam sübuta yetirildi. Əlbəttə ki, indi istintaq gedir, məhkəmə prosesi olacaqdır, ancaq videogörüntülər hər şeyi açıq-aydın göstərir. Bu biabırçı kadrlar, biabırçı davranış bizim üçün böyük ləkədir. Mən bu adamlara etibar etmişəm. Mən bu adamları vəzifəyə təyin etmişəm və vəzifəyə təyin edilərkən bir çox tapşırıqlar, tövsiyələr vermişəm. Onların arasında ən vacibi o idi ki, get təmiz işlə, rüşvət alma, vətəndaşlara kobudluq göstərmə, təkəbbürlü olma, vətəndaşlara dayaq ol, arxa ol, kəndləri gəz, bütün vətəndaşlarla ünsiyyətdə ol. Amma nəyi görürük? Onu görürük ki, bütün bu tapşırıqlara rəğmən, bəzi yaramaz icra başçıları həm özlərini, həm bizim iqtidarımızı biabır ediblər. Onların alçaq hərəkətləri ümumi qınaq obyektinə çevrilib. Onların dövlət mülkiyyətini talaması, sahibkarları incitməsi, sahibkarlardan pul alması, hər bir təyinata görə pul alması, məktəb direktorlarından, xəstəxanalardan aylıq haqq alması allahsızlıqdır və onlar bu cinayətlərə görə cavab verəcəklər. Biz işsiz qalan vətəndaşlar üçün şərait yaradırıq ki, onlar evinə çörək pulu aparsın. O da böyük məbləğ deyil, minimum əməkhaqqı səviyyəsindədir. İndi minimum əməkhaqqı artıb, ona görə bu vətəndaşlar daha böyük məbləğ alırlar. Amma bəzi hallarda bu pullar mənimsənilir. Yaxud da Neftçala rayonundakı cinayətkarlıq hadisəsi barədə mənə məlumat verildi ki, ödənişli işlə təmin edilən 73 nəfəri öz təsərrüfatlarında qul kimi, nökər kimi işlədirdi. Bu nədir? Ağadır, bəydir, xandır? İndi bütün ölkə ona nifrət edir, onun və onun kimilərin biabırçı hərəkətlərinə görə. Hamı bilsin ki, məsələ bununla bitməyəcək. Birinci hadisə oldu eşitmədilər, ikinci hadisə oldu eşitmədilər. Neçəsi həbs olunmalıdır ki, bunlar öz çirkin əməllərindən əl çəksinlər. Bu proses davam etdiriləcək və hamı üçün də dərs olmalıdır. Ona görə bu biabırçı hallarla bağlı daha ciddi addımlar atılacaq".
Prezident icra başçılarının əməlinə çox sərt şəkildə münasibətini açıqladı. Diqqətçəkən məqam budur ki, Prezident belə əməllərin həm də hakimiyyətin imicinə ciddi xələl gətirdiyini qeyd etdi. Yarıtmaz icra başçılarının rüşvətxor, yekəxana əməlləri mövcud iqtidarın hörmətdən salınmasında hansı rolu oynayır?
Rauf Zeyni: “Onlar bilməlidirlər ki, artıq ölkədə bununla bağlı ciddi proses başlayıb və heç kim məsuliyyətdən yaxa qurtara bilməyəcək”
Milli Qeyri-Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, ölkə başçısını bu fikirləri dəfələrlə səsləndirməyə vadar edən səbəblər var: “İcra başçılarının həbsləri baş verməmişdən də Prezident müşavirələrdə belə xəbərdarlıqları edirdi. İzləyin onun çıxışlarını, bunu görərsiniz. Dəfələrlə tapşırırdı ki, icra başçıları sadə olsunlar, xalqın qayğısına qalsınlar, harınlıq etməsinlər. Təəssüf ki, biz əvəzində başqa mənzərələrin şahidi olduq. Bir icra başçısı həbs ediləndən sonra biz eyni ssenarini başqasının iştirakı ilə gördük. Hər iki halda icra başçısı oturub kabinetində aylıq hesab toplayırdı. Bu mənzərə təbii ki, həm də iqtidarı hörmətdən salır. Prezidentin bu fikirləri ilə tam razıyam. Çünki icra başçılarını rayonlara Prezident təyin edir. Onlar ölkə başçısının yerlərdəki səlahiyyətli nümayəndələri sayılırlar. Bu həm də bir siyasi post tutma anlamını daşıyır. Bəziləri isə göstərilən etimadı doğrultmursa, onda bunun ziyanı hər tərəfə, ən əsası da hakimiyyətin imicinə dəyir. Görürsünüz ki, Prezident sanki bir maarifləndirici tonda xəbərdarlıq edir. Bundan nəticə çıxarılmalıdır. Təəssüf ki, biz ciddi nəticə çıxarmayan vəzifə sahiblərinə də rast gəlirik. Onlar bilməlidirlər ki, artıq ölkədə bununla bağlı ciddi proses başlayıb və heç kim məsuliyyətdən yaxa qurtara bilməyəcək. Yaxşısı budur korrupsiyaya yox deyə bilməyənlər indidən öz istefalarını versinlər. Əminəm ki, bu islahatların fonunda hakimiyyət öz nüfuzunun qorunmasına ciddi fikir verir və istəməz ki, hansısa yaramaz vəzifə sahibinə görə adına xələl gəlsin. İndiyə kimi belə hallar olubsa, bundan sonrakı siyasi iradə tamamilə belə neqativliklərin yox edilməsini tələb edir. Bununla mübarizədə ictimai nəzarətin də gücü danılmazdır. Yalnız belə üsullarla biz həmin neqativlikləri ifşa edə bilərik. Prezident də çıxışlarında buna çağırış edir. Vətəndaş fəallığı artırılmalıdır ki, yerlərdəki vəzifəli şəxslərin əməlindən xəbər tuta bilək”.
Məhəmmədəli QƏRİBLİ
