Erməni KİV-i erməni lobbisinin ABŞ-da həyata keçirmək istədiyi növbəti plandan yazıb. Bildirilir ki, Amerikadakı Erməni Milli Komitəsinin (ANCA) 2021-ci ildə Ermənistana və Dağlıq Qarabağa artan yardımı dəstəkləyən məktubunu ABŞ-ın 23 ştatından 75 konqresmen imzalayıb. Məktub ABŞ-ın Dövlət və Xarici Əməliyyatlar üzrə Alt Komitəsinin nümayəndələrinə göndərilib.
ANCA-nın icraçı direktoru Aram Hambaryanın sözlərinə görə, bu məktub gələcəyə yönəlmiş yardım paketini təqdim etmək məqsədi daşıyır. Məktubda aşağıdakı istəklər var:
“Dağlıq Qarabağda minalardan təmizlənmə və mina qurbanları, fiziki və idrak qüsurlu insanlar üçün regional reabilitasiya xidmətlərinin etibarlı maliyyələşdirilməsi üçün 1,5 milyon dollar ayrılsın.
Dövlət Departamenti və USAİD vasitəsilə iqtisadiyyat, idarəetmə, qanunun aliliyi və təhlükəsizliyi sahəsində yardım üçün Ermənistana 100 milyon dollar ayrılsın.
Dövlət Departamenti və USAİD tərəfindən ABŞ-a səfər etmək üçün Dağlıq Qarabağ hökumətinin nümayəndələri ilə əlaqə və ya əlaqə ilə bağlı hər hansı rəsmi və ya qeyri-rəsmi məhdudiyyətlərin aradan qaldırılması.
Bakının Ermənistan və Artsaxa qarşı bütün təcavüzkar hərəkətlərini dayandırdığı təsdiqlənənə qədər ABŞ-ın Azərbaycana yardımının dayandırılması”.
Göründüyü kimi, ABŞ-dakı erməni lobbisi artıq ciddi bir işin ardınca gedir. Onlar həm Azərbaycana olan yardımın dayandırılmasını tələb edirlər, eyni zamanda, qondarma qurum rəsmilərinin ABŞ-a sərbəst gediş-gəlişini təmin etməyə, həm “DQR”ə, həm də Ermənistana maliyyə tranşı ayırmağa çalışırlar. Bunların qarşısını almaq üçün nələri etməliyik?
Elşən Həsənov: “ABŞ-ın Minsk Qrupunun həmsədri olması bu yardımla ziddiyyət təşkil edir”
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, ABŞ Konqresi 1998-ci ildə qəbul etdiyi qərara əsasən, 1999-cu ildən etibarən Dağlıq Qarabağ rejiminə birbaşa maliyyə yardımı ayıran yeganə dövlətdir: “Humanitar yardım adıyla verilən bu maliyyə vəsaiti maraqlıdır ki, Cənubi Qafqazdakı digər tanınmayan “dövlətlərə” verilmir. ABŞ tərəfindən 1998-2000-ci illərdə qondarma “DQR”ə hər il 2,5 milyon dollar, 2001-2006-cı illərdə hər il 3 milyon dollar, 2006-cı ildə 5 milyon dollar, 2007 və 2008-ci illərdə hər il 6 milyon dollar, 2009 və 2010-cu illərdə hər il 8 milyon dollar, 2011-ci ildə 10 milyon dollar maliyyə yardımı edilib. 2012-ci ildə isə ABŞ qondarma “DQR”ə maliyyə vasaiti ayırmayıb.
Göründüyü kimi, hələ 2000-ci illərin əvvəlindən başlayaraq bu yardımın ayrılması dinamikasında artım olub. Xüsusilə Azərbaycan, Ermənistan və separatçı “Dağlıq Qarabağ Respublikası” ilə bağlı Konqresdəki təcrübə göstərir ki, Senatın qanun layihəsində Prezidentin verdiyi təkliflər əks olunur, Nümayəndələr Palatasında isə erməni lobbisinin fəaliyyəti nəticəsində Azərbaycana yardım azaldılır, layihəyə Dağlıq Qarabağa humanitar yardıma dair maddə əlavə olunur, Ermənistana olan yardım isə azaldılır, sonradan hər iki palata ortaq məxrəcə gəlir, lakin “DQR”ə yardım cüzi azalma ilə yekun layihədə saxlanır.
ABŞ-da büdcə layihəsi Prezident tərəfindən Konqresə göndərildikdən sonra əvvəlcə Nümayəndələr Palatasının, sonra Senatın komitələrində və ümumi iclasında müzakirə olunaraq qəbul edilir, hər iki variantda olan fərqli məqamlar isə hər iki palatanın müvafiq sahələrə baxan komitələri tərəfindən razılaşdırma konfransında müzakirə olunaraq razılaşdırıldıqdan sonra Konqresin yekun layihəsi Prezidentin imzasına təqdim olunur.
Qondarma “DQR”ə yardımı humanitar niyyətlərlə əsaslandıran konqresmenlər əsassız arqumentlər irəli sürürlər. Razılaşdırma konfransının hesabatında Azərbaycanın müharibə ritorikasının artmasından narahatlıq ifadə olunur, ABŞ administrasiyasının Azərbaycana ayrılmış yardımın Dağlıq Qarabağ münaqişəsinin sülh yolu ilə həllinə mənfi təsir göstərməyəcəyini və Ermənistana qarşı yönəlməyəcəyini təsdiq etməli olduğu qeyd edilir. Biz buna kəskin etiraz etməliyik. Çünki belə mövqe ABŞ-ın beynəlxalq arenada oynadığı rolu və beynəlxalq hüququn aliliyinə verdiyi əhəmiyyəti azaldır. Dövlətlərin ərazi bütövlüyünə hörmət ABŞ-ın xarici siyasətində mühüm ünsürdür.
ABŞ-ın Minsk Qrupunun həmsədri olması bu yardımla ziddiyyət təşkil edir. Danışıqlar prosesində iştirak edən və Azərbaycanın ərazi bütövlüyünü dəstəkləyən ABŞ-ın separatçı quruma maliyyə yardımı ayırması onun bütün fəaliyyətinin mahiyyətinə əksdir, onun obyektivliyini və tərəfsizliyini şübhə altına alır”.
Məhəmmədəli QƏRİBLİ
