Yaradıcılıq ittifaqlarının yaşlaşmış rəhbərlərinin yola salınması məsələsi gündəm mövzusu kimi...
Məlum olduğu kimi, keçən həftədən başlayaraq dövlətdə yüksək vəzifə tutan, yaşı 70-i adlayan bir neçə məmur ölkə Prezidentinin çağırışlarına cavab olaraq istefa ərizəsi yazdılar.
Qeyd edək ki, Prezident İlham Əliyev də həmin məmurları qəbul edib, nikbin şəkildə bu addımlarını yüksək qiymətləndirib. Prezident, həmçinin, onları digər yaşlı məmurlara örnək göstərib, üstüörtülü mesajlar verdi. O bununla illərlə vəzifədə çalışan və yaşı keçmiş məmurları istefaya çağırdı.
Onu da vurğulayaq ki, bu gün yalnız dövlət vəzifələrində müxtəlif yüksək postlar tutan məmurlar arasında yaşı 70-i keçən insanlar yoxdur, demək olar ki, ölkəmizdə fəaliyyət göstərən yaradıcılıq ittifaqları sədrlərinin hamısının yaşı 70-i çoxdan keçib. Yalnız Azərbaycan Aşıqlar Birliyi sədrinin 61 yaşı var, o biri qurum rəhbərləri isə 70-dən çox yaşı olanlardır.
Qeyd edək ki, yaşı 70-i adlayan bəzi dövlət məmurlarının istefa ərzizəsi yazmasına Yazıçılar Birliyinin sədri Anar Rzayev müsbət reaksiya verib. O, müsahibəsində bildirib ki, yaşı 70-i keçən məmurların yerini gənc nəslin təmsilçiləri tutmalıdırlar.
Bu gün Anar müəllim ittifaq sədrləri arasında ən yaşlı insandır və hazırda onun da istefası gündəmdədir. Gələn il AYB-nin növbəti qurultayı keçiriləcək və Anar müəllim qurultayda Birlik sədrliyinə yenidən namizədliyini verəcək. Bunu özü demişdi. 81 yaşlı Anar Rzayevin yenidən sədr olmaq fikri, əslində, normal hal sayılmır.
A.Rzayevin istefa verməli olduğunu deyən yazarlar hesab edirlər ki, o, istefa verməyəcək.
Məlumat üçün bildirək ki, Azərbaycan Yazıçılar Birliyinin sədri Anar Rzayevin 81, Azərbaycan Bəstəkarlar İttifaqının sədri Firəngiz Əlizadənin 72, Azərbaycan Rəssamlar İttifaqının sədri Fərhad Xəlilovun 72, Azərbaycan Memarlar İttifaqının sədri Elbay Qasımzadənin 70, Azərbaycan Teatr Xadimləri İttifaqının yenidən seçilmiş sədri Azərpaşa Nemətovun 72, Azərbaycan Respublikası Kinematoqraflar İttifaqının sədri Şəfiqə Məmmədovanın 74, digər Kinematoqraflar İttifaqının sədri Rüstəm İbrahimbəyovun isə 80 yaşı var.
Teatr Xadimləri İttifaqının sədri Azərpaşa Nemətovun yaşının 70-i adlamasına baxmayaraq, ittifaqın bir neçə gün əvvəl keçirilən qurultayında yenidən sədrlik postuna öz namizədliyini verməsi teatr ictimaiyyəti tərəfindən ciddi tənqidlərlə qarşılandı. Seçki öncəsi də onun əleyhdarları A.Nemətovun yenidən sədr olmaması üçün təbliğat aparırdılar, amma onların təbliğatı nəticəsiz qaldı.
- Aydın Xan Əbilov: “Yaşı 70-i keçən yaradıcılıq ittifaqları sədrlərinin gənclərlə əvəz edilməsi gündəmdədir”
Yeni Yazarlar və Sənətçilər İctimai Birliyinin sədri, yazıçı-kulturoloq Aydın Xan Əbilov hesab edir ki, yaradıcılıq ittifaqlarının sədrləri də yaşı 70-i keçən və istefa verən, bununla da nümunə göstərən məmurların addımlarını təkrar etməlidirlər. Onların çoxunun yaşının 70-dən yuxarı olduğunu deyən A.X.Əbilovun sözlərinə görə, istefa mədəniyyəti geniş təbliğ edilməlidir. “MDB ölkələrində, demək olar ki, istefa mədəniyyəti hələ tam formalaşmayıb. Baxmayaraq ki, biz bir neçə ölkədə, o cümlədən, Ukraynada, Gürcüstanda vətəndaşların tələbi ilə vəzifədən yapışan məmurların vəzifədən istefa verməyə məcbur edilməsinin şahidi olmuşuq. Azərbaycan xalqının milli mentalitetində həmişə yaşlı insanlara, ağsaqqallara hörmətlə yanaşılır. Ona görə də cənab Prezidentin sivil yolla təklif etdiyi format, əslində, bütün yaşlı nəslin nümayəndələrinə, bir növ, mədəni bir təklif idi. Görürsünüz ki, artıq ölkəmizin görkəmli dövlət xadimi Ramiz Mehdiyevdən tutmuş, Baş nazirin müavinlərinə, AMEA prezidentinə qədər istefa ərizəsi yazaraq gənclərə yol verməsinin şahidi olduq. Qanunla insanlar 65 yaşa qədər vəzifə tuta bilərlər və ehtiyac olan mütəxəssisin işləməsini 5 il də artırmaq olur.
Yaradıcılıq ittifaqlarında da ştatda olan və yaşı 70-i adlayan həm rəhbərlər, həm də digər işçilər var. Əmək qanunu hər kəsə şamil olunur. Bu gün yaradıcılıq sahələrinin müxtəlif qollarını təşkil edən yaradıcılıq ittifaqarının sədrlərinin istefaya getməsi artıq onların vicdan məsələsidir. Düzdür, Yazıçılar Birliyində bunun baş verməsi çətindir. Nəzərə alaq ki, yaradıcılıq qurumlarının rəhbərləri əmək qanunvericiliyi ilə tənzimlənən fəaliyyətlə məşğuldurlar. Deyim ki, yaşı 70-i keçən yaradıcılıq ittifaqları sədrlərinin gənclərlə əvəz edilməsi gündəmdədir və bu gözlənir. Heç kəs ömürlük kreslodan tutub qala bilməz. Anar müəllim dəfələrlə bildirib ki, mən yaradıcı gənclərə hər zaman yol verirəm. Biz doğrudan da dəfələrlə bunun şahidi olmuşuq. Qurultaylarda gənclər AYB-də müxtəlif vəzifələrə seçildilər. Anar müəllim istefa verməli olsa, bu qurumda onu əvəzləyəcək layiqli insanlar var. Xalq yazıçısı, dövrümüzün tanınmış yazıçısı Çingiz Abdullayev bu vəzifəyə seçilə bilər”.
O, həmçinin, qeyd etdi ki, yalnız məmurların deyil, eləcə də yaradıcı ittifaqların rəhbərlərinin istefa verməsi böyük mədəni-əxlaqi nümunə olardı. A.X.Əbilov hesab edir ki, bu insanların yüksək təqaüdlə isefaya göndərilməsi nəticəsində onların yerini gənc nəsil tutmalıdır. “Hesab edirəm ki, yaradıcı ittifaqların yaşı 70-i keçən sədrləri də Prezidentin çağırışlarına cavab verməli və istefa haqqında düşünməlidirlər. Mən Prezidentin həyata keçirdiyi kadr islahatlarını “yaşıl islahat” adlandırıram və o bütün sahələri əhatə etməlidir. Eyni zamanda, yalnız yaradıcılıq ittifaqlarında deyil, Elmlər Akademiyasının müxtəlif elmi-tədiqat institutlarının bir çox direktoru, bəzi ali məktəblərin rektorları var ki, onların da yaşı 70-i keçib. Onların da yerini gənclər tutmalıdır” - deyə A.X.Əbilov vurğuladı.
- Qiymət Məhərrəmli: “...Prezidentin çağırışlarına əməl edərək istefa verməli və öz postlarını gənclərə həvalə etməlidirlər”
Filologiya üzrə fəlsəfə doktoru Qiymət Məhərrəmli də hesab edir ki, yaradıcılıq ittifaqlarının yaşı 70-i keçən sədrləri istefa mədəniyyəti nümayiş etdirməlidirlər: “İnsanların bəlli bir yaşdan sonra vəzifələrdə çalışması düzgün deyil. O cümlədən də yaradıcı adamların 20 il bir qurumun sədrliyi postunda əyləşməsi də müsbət hal sayıla bilməz. Bizim yaradıcı qurum sədrləri var ki, 15-20 ildir eyni vəzifəni tutur və hər dəfə qurultayda şəriksiz sədr kimi yenidən öz namizədliyini verir. Onların işləmək üçün enerjiləri yoxdur. Onsuz da dövlət bu şəxsləri hərtərəfli qayğı ilə əhatə edib, onların bu vəzifələrdə qalmasına ehtiyac yoxdur. Hesab edirəm ki, yaradıcılıq ittifaqlarının yaşı 70-i keçən sədrləri Prezidentin çağırışlarına əməl edərək istefa verməli və öz postlarını gənclərə həvalə etməlidirlər. Birlik, ittifaq sədri günlərlə, həftələrlə xəstəlik üzündən işə gələ bilmirsə və sənədlərə qol çəkməsi üçün həmin sənədlər onun evinə göndərilirsə, bu adamın sədr qalmasına heç bir ehtiyac yoxdur. Bəzi sədrlər deyirlər ki, məni seçiblər, ona görə də istefa verə bilmərəm, mənim istefam yalnız qurultayda baş verə bilər. Bəyəm seçkili orqanların rəhbərləri istefa verə bilməz ki? Bəs Milli Elmlər Akademiyasının sabiq prezidenti Akif Əlizadə niyə istefa verdi? Demək, seçkili orqanların rəhbərlərinin də istefası tam mümkündür. Odur ki, yaradıcılıq qurumlarının yaşı 70-i keçən sədrləri istefa ərizəsi yazmalı və bununla da böyük bir istefa mədəniyyəti göstərməlidirlər”.
İradə SARIYEVA
