Ruhu bahar ovqatlı qələm sahibinin, ömrünü övladlarımızın təhsilinə həsr edən Əməkdar müəllim Tamilla Əmirkişiqızının işğal olunmuş torpaqlarımızın azadlığı uğrunda canlarını qurban verən Natiq və Namiq Şahmuradov qardaşlarının unudulmaz xatirəsinə ithaf etdiyi “İnam bir silahdır” kitabını birnəfəsə oxudum.
Ömürləri nağıllaşan bir polis ailəsinin yaşadıqlarını qəlbindəki göynərtisinə qatıb, dünyanın dünəni və gələcəyi olan Sözə söykənib yazıya almaq, hələ üstəlik, onu ərsəyə gətirmək özü də, sözün əsl mənasında, hünərdir.
Kitab haqqında ilk sözü onun üzündəki Azərbaycan bayrağı əks olunmuş çinar yarpağı deyir. Müəllifin bu ideyası ilə kitabın içindəkilər harmoniya təşkil edir. Çinar yarpağına, bayrağımıza da şəhid olan oğul və qızlarımızın ruhu sığal çəkib elə bil. Müəllif demək istəyir ki, bayraq oğullarına qovuşan torpağın kürəyi heç zaman yerə gəlməz.
Azərbaycanın ərazi bütövlüyü uğrunda gedən döyüşlər göstərdi ki, Vətən üçün gözünü qırpmadan canını fəda edən qəhrəmanlar dünən də olub, bu gün də var, sabah da olacaq. Sağlığında varlığıyla, şəhid olduqdan sonra isə nümunələri və xatirələri ilə yaddaşlara yazılan Natiq və Namiq qardaşlarını döyüş yoldaşları yaxşı xatırlayırlar. Əzizlərinin yaddaşında isə qoşa qardaş nisgili elə buz tutub ki, hələ də ərimək bilmir. Bir də ki, dərd onu çəkəni yaxşı tanıyır...
“İnam bir silahdır”. Bu kitab Şahmuradovlar ailəsinin timsalında hər biri bir Azəərbaycan boyda olan şəhid ailələrinə həsr olunub. Bütün şəhid ailələrinin dərdi bir boyda, bir biçimdə olur. Bax, kitabda Tamilla Əmirkişiqızı üzünü oxuculara tutub bunu bir ana laylası kimi pıçıldayır.
Sən demə, illərin və nəsillərin sınağından çıxan “Mübariz keşikdə”miz (Daxili İşlər Nazirliyinin mətbu orqanı) Natiqin “Bizi Qarabağa göndərin” başlıqlı məqaləsinə şahidlik edib və onun bu harayını sıralarımızda xidmət edən oğullara çatdırıb. Və beləcə, Azərbaycan Polisi həm cinayətkarlıqla mübarizə aparıb, həm də torpaqlarımız uğrunda gedən ölüm-dirim savaşında qəhrəmanlıqlar göstərib...
Müəllif bu könül pışıltısında bəlkə də çoxumuzun bilmədiyi tarixi həqiqətləri də gün işığına çıxarıb. Adları Azərbaycan tarixində hörmətlə anılan, Vətənin daşnaklardan təmizlənməsində misilsiz şücaətlər göstərən Soltan və Xosrov bəy qardaşları Şahmuradovlar nəslinin, bir az obrazlı desək, kimliyidir.
Kökdən, qandan gələn ucalığın davamçıları olan Natiq də, Namiq də babalarının vəsiyyətinə əməl ediblər əslində.
Kitabı təhlil etmək istəmirəm. Yaxşısı onu oxumağınızdır. Ancaq bir nüansı xatırlatmağı özümə borc bilirəm: Şahmuradovlar ailəsinin bir üzvünü, xanım həmkarımız, Gəncə Şəhər Baş Polis İdarəsi Qeydiyyat və şəxsiyyət vəsiqəsi şöbəsinin rəisi, polis polkovnik-leytenantı Təranə Şahmuradovanı xidməti ezamiyyətlərdə olarkən tez-tez görsəm də onun qəhrəmanlar bacısı, şəhid polisimizin ömür-gün yoldaşı olduğunu bilmirdim. Elə bilmədiklərimin çoxunu da bu kitab öyrətdi mənə.
Ümidvaram ki, siz də oxuyacaq və ömürləri tarixə dönən Vətən oğullarını, bu şəhidlər ailəsini yaxından tanıyacaqsınız.
Və sonda müəllifin “Qəhrəmanları biz seçmirik” fikrinə bunu əlavə etmək istəyirəm: Bəli, qəhrəmanları biz seçmirik, amma onlar bizdən seçilirlər...
Hafiz Təmirov, polis mayoru
