12/11/2019 04:43
728 x 90

Şou müğənnilər indi də bir-birinə uşaq doğub bağışlamaq söhbətlərinə başlayıblar...

Əziz Qəmbərov: “...onların çoxu üçün artıq övlad da, mənəvi dəyərlər də yalnız özlərini reklam etmək üçün alətə çevrilib”

img

Bütün xoşagəlməz əməllər şou-biznesçilərdən çıxır. Bu, birmənalı olaraq, belədir. Onlar özlərini gündəmdə saxlamaq, daim maqazin proqramlarının diqqətində olmaq üçün ən ağlagəlməz hərəkətlər sərgiləyir, açıqlamalar verirlər. Heç şübhəsiz ki, onların hərəkət və sözlərinin əsas hissəsini kameraya oynamaq təşkil edir. Kamera qarşısına çıxan kimi ya qarşılıqlı olaraq bir-birini ittiham və təhqir edir, ya bir-birinin acığına sponsorlarından, bahalı geyimlərindən, avtomobillərindən və villalarından danışırlar.

İndi isə şou-biznesdə yeni tərzlər gündəmə gəlməyə başlayıb. Bəzi şou müğənniləri dünyaya uşaq gətirərək öz övladsız həmkarlarına bağışlayacaqlarını elan edirlər. Bir ananın dünyaya gətirdiyi körpəni hədiyyə etməsi nə dərəcədə düzgündür deyə bilmərik, amma bunu şouya çevirmək özü müsbət hal deyil. Çox təəssüf ki, şou müğənniləri övladlarını da şou predmetinə çevirirlər.

Elə də populyar olmayan şou müğənnisi Dəniz birbaşa efirdən hamilə olduğunu və hamiləliyinin üçüncü ayını yaşadığını, gələcək körpəsini həmkarı Mənzurə Musayevaya hədiyyə edəcəyini elan edib. Şou müğənnisinin bu açıqlaması ictimaiyyətin təəccübünə səbəb olub. O hətta deyib ki, artıq bununla bağlı Mənzurə xanımla danışıb, sövdələşib.

Azərbaycanda efirdə hələ doğulmamış uşağın ana tərəfindən başqasına hədiyyə veriləcəyinin səsləndirilməsi həqiqətən də böyük səs-küy yaradıb. Dənizin Mənzurə ilə bu barədə sövdələşməsinin həm tamaşaçılar, həm də sosial şəbəkə istifadəçiləri tərəfindən sərt qarşılanması təbiidir. Çünki indiyə qədər heç bir ana milyonların gözü qarşısında övladını kiməsə hədiyyə edəcəyini açıqlamayıb və bunun ətrafında özünü gündəmə gətirməyib. Dəniz unudur ki, uşaq əmlak deyil və onu heç kəsə bağışlamaq, satmaq olmaz. Əslində, onun belə bir açıqlama verməsi mənəvi və hüquqi baxımdan düzgün deyil. Artıq cəmiyyətdə və sosial şəbəkədə belə bir fikir formalaşıb ki, Dəniz öz gələcək övladını hədiyyə etmir, satır. Bu, ümumiyyətlə, bir anaya yaraşmayan bir hərəkətdir. Hətta ekspertlər hesab edirlər ki, bir uşağın digər bir ailəyə hədiyyə verilməsi zorakılığın ən ağır formasıdır. Uşağı hədiyyə etməklə satmağın heç bir fərqi olmadığı məlumdur və bir şou müğənnisinin bu addımı yalnız sərt şəkildə qınana bilər.

Hüquqşünaslar hesab edirlər ki, valideyn tərəfindən uşağın başqasına hədiyyə edilməsi cinayət tərkibli məsələdir və bu, hüquq müstəvisində öz həllini tapmalıdır. Şou müğənnilərinin diqqəti cəlb etmək üçün istifadə etdikləri bu kimi tryuklar onların gözdən düşməsinə, cəmiyyət tərəfindən sərt şəkildə tənqid edilməsinə səbəb olur. Müğənni Dəniz öz gələcək övladından imtina etmək istəyirsə, bunun üçün dövlətin müvafiq qanunlarına uyğun şəkildə addım atmalıdır.

  • “Bir ananın öz gələcək övladından alət kimi istifadə etməsi, “doğulandan sonra onu hədiyyə edəcəyəm” deməklə özünü müvəqqəti olaraq gündəmdə saxlaması qəbuledilməzdir”

Tanımış hüquqşünas Əziz Qəmbərov bizimlə söhbətində bildirdi ki, şou-biznesçilərin bu cür çiy açıqlamaları onlar üçün cinayət məsuliyyəti yaradır. “Ümumiyyətlə, şou-biznesçilərin qanunazidd əməlləri saysız-hesabsızdır. Onlar arasında dünyaya qanunsuz övlad gətirməkdən tutmuş, gələcək övladını kimlərəsə bağışlamağa qədər bütün əməllər var. Azərbaycanda uşağın övladlığa verilməsi qanunla tənzimlənir və bunun üçün xüsusi prosedur qaydaları müəyyən edilib. Uşaq canlıdır, bizim gələcəyimizdir, onu necə götürüb başqasına hədiyyə edə bilərik? Məncə, hədiyyə etməklə satmaq arasında elə də böyük fərq yoxdur. Uşaq nə əmlakdır, nə puldur ki, götürüb onu istədiyin adama hədiyyə edəsən. Deyirlər ki, artıq biz sövdələşmişik. Yaxşı ki, Dəniz demir ki, artıq uşağın behini də almışam... Bilirsiniz, bu həm hüquqi, həm də mənəvi baxımdan qəbuledilən deyil. Doğrudur, bir ailənin öv övladını övladı olmayan ailəyə verməsi halları olub, amma bu ya anonim şəkildə baş verib, ya da dövlətin qanunları çərçivəsində. Bir uşaq başqa bir ailəyə övladlığa verilərsə, burada anonimliyin qorunması vacibdir. Şou-müğənnilərinə gəlincə isə, onların çoxu üçün artıq övlad da, mənəvi dəyərlər də yalnız özlərini reklam etmək üçün alətə çevrilib. Bir ananın öz gələcək övladından alət kimi istifadə etməsi, “doğulandan sonra onu hədiyyə edəcəyəm” deməklə özünü müvəqqəti olaraq gündəmdə saxlaması qəbuledilməzdir” - deyə hüquqşünas bildirdi.

Leyla QARAXANLI

Son xəbərlər