Dahi şair, mütəfəkkir İmadəddin Nəsiminin “Sığmazam” qəzəli əsrlərdir insanların şüurunda, mənəvi dünyasında özünə ölməzlik qazanıb. İnsanlıq fəlsəfəsinin qatlarının açıldığı bu qəzəl indiyə qədər dəfələrlə səsləndirilib. Qəzəl janrının incilərindən olan “Sığmazam” qəzəli Azərbaycan əsilli dünyaşöhrətli müğənni Sami Yusifin ifasında yenidən gündəmə gəlib və gerçək trendə çevrilib.
Məlum olduğu kimi, Sami Yusuf Nəsiminin “Sığmazam” qəzəli əsasında yeddi dəqiqəlik kompozisiya hazırlayıb. Kompozisiya Azərbaycan Respublikası Mədəniyyət Nazirliyinin sifarişi və Heydər Əliyev Fondunun dəstəyilə ərsəyə gəlib.
Sami Yusuf kompozisiyanı Bakıda Heydər Əliyev Mərkəzində keçirilən UNESCO-nun Ümumdünya İrs Komitəsinin 43-cü sessiyasının açılış mərasimində canlı ifa edib.
Müğənnini azərbaycanlı muğam ifaçısı Təyyar Bayramov və aşıq Samirə müşayiət ediblər. Ekran işinin yaradıcı prodüsseri və rejissoru Andrey Boltenko, kompozisiyanın bəstəkarlığını isə Sami Yusuf özü edib.
Kompozisiya böyük maraqla qarşılanıb. “YouTube.com” portalında yerləşdirilən videoya 15 saat ərzində 100 mindən çox baxış olub.
Azərbaycan sazının, muğamının müşayiətilə ifa edilən kompozisiya, sözün həqiqi mənasında, bir Azərbaycan brendinə çevrilib. Bu gün “Sığmazam” kompozisiyası nəinki Azərbaycanda, eləcə də dünyanın başa ölkələrində böyük maraqla qarşılanıb. Azərbaycan musiqisinin bu böyük uğurunu təəssüf ki, hamı həzm edə bilmir. Sosial şəbəkələrdə bir qrup qaragüruh qüvvələr “həmrəy” olaraq kompozisiyaya qarşı ciddi hücumlara başlayaraq, onun ifaçısının guya bu əsəri yüksək səviyyədə ifa etmədiyini iddia edirlər. Bəziləri yazırlar ki, bu əsər S.Yusifin ifasında pis alınıb, bu qəzəli xalq artisti Alim Qasımov ifa etsəydi, daha effektiv olardı. Bundan başqa, bəziləri S.Yusifin ifasını “molla kimi oxuyur” kimi qiymətləndirib. Sosial şəbəkələrdə bəzilərinin bu möhtəşəm kompozisiyaya qarşı qara piar aparması cəmiyyətdə, mədəniyyət cameəsində müsbət qarşılanmır. Yazılanlar xüsusən də Nəsimişünas alimlərin narazılığına səbəb olub.
Teymur Kərimli: “Nəsiminin şeirindəki bu dərin mənanı Sami Yusif öz kompozisiyası ilə verə bilib”
Azərbaycan Milli Elmlər Akademiyasının Füzuli adına Əlyazmalar İnstitutunun direktoru, AMEA-nın həqiqi üzvü, Nəsimişünas-alim Teymur Kərimli “Bakı-Xəbər”ə bildirdi ki, “Sığmazam” qəzəli əsasında S.Yusifin hazırladığı kompozisiya, sözün həqiqi mənasında, böyük sənətkarlıq örnəyidir. S.Yusifin ifasının sosial şəbəkələrdə bəziləri tərəfindən hədəfə alınmasına pis baxdığını deyən T.Kərimli bunun yolverilməz olduğunu bildirdi: “Mənim sosial şəbəkələrdəki müzakirələrdən xəbərim yoxdur. Amma belə möhtəşəm bir ifanın sosial şəbəkələrdə hədəfə alınması qəbuledilməzdir. Onun bu kompozisiyanı “mollasayağı” oxuması ilə bağlı deyilənlər də qətiyyən həqiqətəuyğun deyil. Hər kəsin öz üslubu var və bu üslubu da Nəsimi yaradıcılığına tətbiq edəndə çox uğurlu alınıb.
S.Yusifin ifasında “Sığmazam” kompozisiyasını dinləmişəm və onun ifası hədsiz dərəcədə xoşuma gəlib. S.Yusifi həm ifaçı, həm də klassik ədəbiyyatın bilicisi kimi çox yüksək səviyyəli bir mütəxəssis hesab edirəm. O, “Sığmazam” kompozisiyasını da Nəsimiyə layiq bir səviyyədə ifa edib. Çox vaxt bizim müğənnilər Nəsiminin qəzəllərini oxuyurlar, amma başa düşmürlər, sözləri düzgün tələffüz edə bilmirlər. Ancaq bu fikirləri S.Yusif haqqında demək olmaz. O, bizim klassik ədəbiyyatın, eyni zamanda da Nəsiminin bilicisidir. S.Yusif bildiyinə, duyduğuna, o qəzəlin mahiyyətinə vardığına görə, belə bir mükəmməl əsər ortaya qoya bilib”.
T.Kərimlinin sözlərinə görə, S.Yusifin “Sığmazam” kompozisiyasını bütün dünyaya təqdim etməliyik və bunun çox effektiv nəticələri olacaq. “Bu kompozisiya musiqi, söz, humanitar fikir sahəsində bir Azərbaycan brendidir. Nəsimin bu qəzəlinin mahiyyəti nədir? Deyir ki, insan öz daxili aləmi ilə o qədər zəngindir, o, kainata sığmır. Nəsiminin şeirindəki bu dərin mənanı S.Yusif öz kompozisiyası ilə verə bilib” - deyə T.Kərimli qeyd etdi.
İradə SARIYEVA
