Bakıda fəaliyyət göstərən mədəniyyət ocaqları, xüsusən də müxtəlif profilli muzeylər paytaxtımıza gələn turistlər üçün də maraq kəsb etməlidir. Muzeylər öz işini o səviyyədə qurmalıdır ki, ziyarətçiləri yalnız məktəblilər, tələbələr deyil, həm də xarici turistlər olsun. Yay mövsümünün başa çatmasına bir neçə həftə qalıb. Yay boyu da, demək olar ki, həm paytaxt, həm də bölgə muzeyləri fəaliyyət göstərib.
Bildirək ki, hazırda paytaxt muzeylərinin bir çoxu dövlət tərəfindən yüksək səviyyədə təmir edilib, lazımı inventarlarla təmin olunub. Bir sözlə, bu məkanlarda ziyarətçilər üçün hər cür şərait yaradılıb. Bəs ziyarətçilər necə, muzeylərə gedirmi? Bu müddət ərzində muzeylərimizin qapısını kimlər açıb, onların ziyarətçiləri olubmu?
Alla Bayramova: “UNESCO-nun Ümumdünya İrs Komitəsinin 43-cü sessiyası zamanı muzeyimizə 300 nəfərdən artıq ziyarətçi gəlib, sonrakı həftələrdə isə 150-yə yaxın turist bilet alaraq muzeyimizi ziyarət edib”
Mövzu ilə əlaqədar bir neçə muzeylə əlaqə saxladıq. Azərbaycan Dövlət Musiqi Mədəniyyəti Muzeyinin direktoru, sənətşünaslıq üzrə fəlsəfə doktoru, Əməkdar Mədəniyyət İşçisi Alla Bayramova bizimlə söhbətində bildirdi ki, muzeyi ziyarət edənlər sırasında həm yerli, həm də xarici qonaqlar çox olur. A.Bayramovanın sözlərinə görə, Bakının ev sahibliyi ilə keçirilən UNESCO-nun Ümumdünya İrs Komitəsinin 43-cü sessiyası çərçivəsində muzeyin ziyarətçilərinin sayında kifayət qədər artım olub. O qeyd etdi ki, 43-cü sessiya ilə bağlı muzeydə silsilə tədbirlər təşkil edilib və bu da muzeyə gələnlərin sayına müsbət mənada təsir göstərib. “Bizim muzeyə gələnlərin sayı kifayət qədər çoxdur. UNESCO-nun Ümumdünya İrs Komitəsinin 43-cü sessiyası çərçivəsində də bir sıra tədbirlər keçirdik. Həmin zaman muzeyimizə həm turistlər, həm də xarici mütəxəssislər gəldilər, bizim ekspozisiyanı maraqla izlədilər, sərgilərimizlə tanış oldular. Musiqi Mədəniyyəti muzeyi ziyarətçilər üçün hər zaman maraqlıdır. Onu da deyim ki, UNESCO-nun Ümumdünya İrs Komitəsinin 43-cü sessiyası zamanı muzeyimizə 300 nəfərdən artıq ziyarətçi gəlib, sonrakı həftələrdə isə 150-yə yaxın turist bilet alaraq muzeyimizi ziyarət edib. Demək istəyirəm ki, xarici turistlər bizim muzeyə böyük maraq göstərir və tez-tez ziyarətçilər sırasında olurlar”-deyə muzey direktoru bildirdi.
Aida İsmayılova: “Hazırda Milli Azərbaycan Tarixi Muzeyində əsaslı təmir-bərpa işləri aparıldığı üçün muzey bağlıdır”
Azərbaycan Milli Elmlər Akademiyasının Milli Azərbaycan Tarixi Muzeyinin Arxeologiya elmi fond şöbəsinin kiçik elmi işçisi Aida İsmayılova isə “Bakı-Xəbər”ə bildirdi ki, hazırda Tarix Muzeyində təmir-bərpa işləri getdiyi üçün muzey bağlıdır. Muzeyin açılışı olduqdan sonra 2020-ci ildə Milli Azərbaycan Tarixi Muzeyinin 100 illik yubileyi ilə əlaqədar silsilə tədbirlər keçiriləcəyini deyən A.İsmayılovanın sözlərinə görə, bu zaman muzey öz qapılarını həm yerli, həm də xarici qonaqların üzünə açacaq: “Hazırda Milli Azərbaycan Tarixi Muzeyində əsaslı təmir-bərpa işləri aparıldığı üçün muzey bağlıdır. Muzeyimiz ziyarətçiləri gələn ildən qəbul edəcək”.
Sədi Mirseyibli: “Bu gün ay ərzində muzeyimizə 300-350 turist gəlirsə, gələcəkdə 10 minlərlə, 100 minlərlə ziyarətçiyə nail olmağı hədəfləmişik”
Azərbaycan İstiqlal Muzeyi ilə də əlaqə saxladıq. Muzeyin elmi-kütləvi iş şöbəsinin müdiri Sədi Mirseyiblinin bildirdiyinə görə, İstiqlal Muzeyini hər ay ən azı 300-350 nəfər tamaşaçı ziyarət edir. “Mövsümün xarakterinə uyğun olaraq muzey ziyarətçilərinin sayında dəyişikliklər olur. Məsələn, orta və ali məktəblərdə dərslər başlayandan sonra muzeyimizə gələnlərin sayı daha çox olur, şagirdlər, tələbələr kütləvi olaraq İstiqlal Muzeyini ziyarət edirlər. Ancaq yay tətili zamanı şagirdlər, tələbələr muzeyimizə elə də çox gəlmir. Onların əvəzində muzeyimizə gələn xarici turistlərin sayında kifayət qədər artım var. Ay ərzində muzeyimizi 300-350 nəfər turist ziyarət edir. Qonaqlar arasında xarici mütəxəssislər də olur, turistlər də. Bir müddət əvvəl Avstriyanın Krems Universitetindən muzeyşünas mütəxəssis də muzeyimizi ziyarət edib. Biz onunla təmsil etdiyi müəssisə ilə mütamadi əlaqədə olmaq barədə də danışıqlar aparmışıq”.
S.Mirseyibli bildirdi ki, Azərbaycan İstiqlal Muzeyi ziyarətçi sarıdan heç bir problem yaşamır. Bununla belə, şöbə müdiri bildirdi ki, muzeyə daha çox ziyarətçinin cəlb edilməsi üçün xüsusi işlər görülür. Əsası 1919-cu ildə Azərbaycan Xalq Cumhuriyyəti tərəfindən qoyulan İstiqlal Muzeyinin bu il 100 yaşının tamam olduğunu deyən müsahibimizin sözlərinə görə, bununla bağlı muzeydə bir sıra tədbirlər keçiriləcək və o tədbirlər çərçivəsində də muzey yeni ziyarətçilər cəlb edə biləcək. “Bu gün ay ərzində muzeyimizə 300-350 turist gəlirsə, gələcəkdə 10 minlərlə, 100 minlərlə ziyarətçiyə nail olmağı hədəfləmişik. Vaxt gələcək ki, bizim də muzeyə Avropanın qabaqcıl muzeylərində olduğu kimi 10 minlərlə ziyarətçi gələcək. Bunun üçün işlər görürük. Hər gün muzeyin qapısından içəri həm yerli, həm də xarici ziyarətçilər daxil olur. Sevinirəm ki, artıq tamaşaçıları muzeyə cəlb etməyə başlayırıq. Bu gün muzey işinin təbliği sahəsində böyük işlər görülür, maarifçilik tədbirləri həyata keçirilir. Bu təbliğatın nəticəsində də biz ziyarətçilər qazanırıq. Eyni zamanda da biz öz flayerlərimizi çap etmişik və bu il Bakıda keçirilən Formula-1 Azərbaycan Qran Prisi ərəfəsində həmin flayerləri əməkdaşlarımız xarici qonaqlara, tursitlərə payladılar. Hesab edirəm ki, bu da müsbət nəticələr verir. Bundan başqa, bizim muzey turizm marşurutlarına da salınıb. Biz ölkədə fəaliyyət göstərən 5 turizm şirkəti ilə əməkdaşlıq sənədi imzalamışıq, onlar xarici və yerli turistləri muzeyimizə cəlb edirlər. Turizm qurumlarının xəttilə də muzeyimizi ziyarət edənlər çoxdur. Elə bu yaxınlarda Almaniyadan böyük bir turist qrupu Azərbaycan İstiqlal Muzeyini ziyarət etdilər. Orta məktəblərlə də əməkdaşlıq müqavilələri imzalamışıq, şagirdlər muzeydə keçirilən açıq dərslərdə iştirak edirlər”-deyə müsahibimiz bildirdi.
İradə SARIYEVA
