Azərbaycan Yazıçılar Birliyinin (AYB) XIII qurultayının gələn il keçiriləcəyi barədə Birlik tərəfindən rəsmi məlumatlar yayıldıqdan sonra gündəmə Birlik sədrliyinə potensial namizəd kimi bir neçə ünlü yazarın adı gətirilib.
AYB üzvlərinin xeyli bir qismi hesab edir ki, xalq yazıçısı Anar gələn il keçiriləcək qurultayda sədrliyə namizdəliyini verməyəcək. Ədəbi ictimaiyyətdə yayılan söz-söhbətlərə görə, hazırda Birlik sədrliyinə real namizəd görkəmli yazıçı-dramaturq, xalq yazıçısı Elçin Əfəndiyevdir. E.Əfəndiyevin AYB sədri postuna seçilməsinin Birlik üzvlərinin bir çoxunun, xüsusən də gənc nəslin maraq dairəsində olduğu bildirilir. Yazıçı və şairlər hesab edirlər ki, Yazıçılar Birliyində mövcud olan problemlərini yalnız E.Əfəndiyev həll edə bilər. E.Əfəndiyevdən əlavə də bəzi şəxslərin adları namizəd kimi hallandırılır. Bir müddət əvvəl xalq yazıçısı fəxri adı alan Azərbaycan Tərcümə Mərkəzinin rəhbəri Afaq Məsudun və yazıçı İlqar Fəhminin də Birlik sədri olması ehtimalı olduğunu deyənlər var.
Bununla belə, bir qisim yazıçı və şairlər hesab edir ki, Elçinin sədr olmasını arzu edənlər daha çoxdur. Hazırda Birlik üzvləri arasında AYB sədrliyinə namizədlərlə bağlı qızğın müzakirələr getsə də, bu barədə mətbuata hər hansı fikir bildirmək istəyənlər, demək olar ki, barmaqla sayılacaq qədərdir.
Azərbaycan Yazıçılar Birliyi sədri postuna xalq yazıçısı Elçin gələ bilərmi? Onun bu məsələdə potensial imkanları nə dərəcədədir?
İlqar Fəhmi: “Yazıçılar Birliyinin sədrinin kim olacağı ilə bağlı fikir yürütmək, kimlərinsə gələcək sədr kimi adlarını hallandırmaq hələ tezdir”
Yazıçı İlqar Fəhmi bizimlə söhbətində bildirdi ki, kimin sədr olacağını qurultay həll edəcək:”Yazıçıların Birlik sədrliyinə kimlərinsə namizədliyini müzakirə etməsi öz işləridir. Yazıçılar Birliyinin sədrinin kim olacağı ilə bağlı fikir yürütmək, kimlərinsə gələcək sədr kimi adlarını hallandırmaq hələ tezdir. Çünki hələ qurultaya yarım ildən çox vaxt qalıb, bütün bu məsələlər də qurultayda öz həllini tapacaq”.
“Bəzi yazarlar Sizin də Birliyin qurultayında sədr postuna namizədliyinizi verəcəyinizi deyirlər. Bu nə dərəcədə doğrudur, belə bir fikriniz varmı”-sualına İ.Fəhmi belə cavab verdi:”Mənim belə bir fikrim yoxdur. Bu saat o qədər işim var ki”.
Rəşad Məcid: “İndidən kimlərinsə Yazıçılar Birliyi sədrliyinə namizəd kimi adlarının çəkilməsinə ehtiyac yoxdur”
Azərbaycan Yazıçılar Birliyinin katibi Rəşad Məcid də qeyd etdi ki, Elçinin və digərilərinin sədrlik postuna namizədliyini verəcəyi haqqında məlumatı yoxdur. “Yazıçılar Birliyinin sədrinin dediyinə görə, qurultay gələn il olacaq. Ona görə də, indidən kimlərinsə Yazıçılar Birliyi sədrliyinə namizəd kimi adlarının çəkilməsinə ehtiyac yoxdur. İnişallah, yazıçılar qurultayda öz ağıllı, düzgün qərarlarını verərlər. Anar müəllim müsahibəsində deyib ki, yenidən Birlik sədrliyinə namizədliyini verəcək”-deyə R.Məcid qeyd etdi.
Əsəd Cahangir: “Əlbəttə, Elçin müəllim kimi nüfuzlu qələm adamının Yazıçılar Birliyinin sədri olması Yazıçılar Birliyinin də, Birlik üzvlərinin də yalnız xeyrinə ola bilər”
Tanınmış ədəbiyyat tənqidçisi Əsəd Cahangir isə hesab edir ki, xalq yazıçısı Elçinin Birlik sədrliyinə namizədliyini verib-verməyəcəyini bilmir, ancaq onun şəxsi fikrinə görə, xalq yazıçısı Anar sədrliyə namizədliyini verməsə AYB-yə görkəmli yazıçı Elçinin sədr olması daha məqsədəuyğun olardı. “Olduqca mürəkkəb bir mövzuya toxunmusunuz. Ona görə də Yazıçılar Birliyinin sədri AYB üzvlərinin səsverməsi ilə müəyyən edilir. Bu barədə dəqiq proqnoz vermək çox çətindir. Çünki Yazıçılar Birliyinin 1700 nəfər üzvü var və onların da çoxu heç bir-birini tanımır. Hamının fikrini bilmək və bəri başdan proqnoz vermək çox çətindir. Bu məsələdə dəqiq fikir söyləmək asan deyil. Mən yalnız öz fərdi fikrimi deyə bilərəm. Elçin Azərbaycan ədəbiyyatının görkəmli simalarından biridir. O, xüsusilə də müstəqillik dövründəki yaradıcılığı ilə bir daha sübut etdi ki, ədəbiyyatımızın bayraqdarıdır. Elçin dram, ədəbi tənqid, romançılıq, hekayəçilik sahəsində nəinki Sovet dövründəki məhsuldarlığını, öndərliyini qoruyub saxladı, hətta əvvəlkindən də məhsuldar, səmərəli şəkildə fəaliyyətini davam etdirdi. Yəni Elçin müəllim olan yerdə yaş kateqoriyası o qədər də önəmli deyil. Çünki o, gənclik, cavanlıq həvəsi ilə yazır, yaradır və hamını tanıyır, nüfuzlu adamdır. Elçinin həm Yazıçlar Birliyi üzvləri arasında, həm də yuxarı dairələrdə hörməti, nüfuzu var, ağsaqqal adamdır. Əlbəttə, Elçin müəllim kimi nüfuzlu qələm adamının Yazıçılar Birliyinin sədri olması Yazıçılar Birliyinin də, Birlik üzvlərinin də yalnız xeyrinə ola bilər. Anar müəllim kimi nüfuzlu bir adamdan sonra, əlbəttə, Birlik sədri digər nüfuzlu bir şəxs olmalıdır. AYB sədrliyinə radikal dərəcədə fərqli bir şəxs gəlsə, bəlkə də bu o qədər də yaxşı qarşılanmaz. Ancaq mənə elə gəlir ki, Elçin müəllimin Birlik sədri olması ictimaiyyət tərəfindən tamamilə normal qarşılanar. Elçin müəllimin bir cəhəti də şəxsən mənim üçün təqdirəlayiqdir ki, o həmişə yenilikləri görür, qiymətləndirir. Yəni istedadlara qiymət verir, ədəbi prosesi çox diqqətlə izləyir, kimin kim olduğunu bilir, hər kəsə də özünə layiq şəkildə davranır. Ona görə də, hesab edirəm ki, Elçin müəllim barədə burada ikinci bir fikir ola bilməz. Əlbəttə, yenə deyirəm ki, bu yalnız mənim fərdi fikrimdir. Son nəticəni isə səsvermə həll edəcək”-deyə Ə.Cahangir bildirdi.
Qeyd edək ki, gənclərin böyük əksəriyyəti E. Əfəndiyevin sədr olmasını arzulayır və onlar qeyd edirlər ki, E.Əfəndiyev sədrliyə namizədliyini verərsə ona səs verəcəklər. Bu fikrə də münasibət bildirən Ə.Cahangir “əgər Anar müəllim gedərsə və Elçin müəllim öz namizədliyini irəli sürərsə, əlbəttə, mən də Elçin müəllimin namizədliyini dəstəkləyənlər sırasında olacağam. Yenə də deyirəm, o, nüfuzlu və obyektiv şəxsdir. Yarım əsrdən artıq yaradıcılıq təcrübəsi olan bir adamın Yazıçılar Birliyinin sədri postunda əyləşməsi ancaq ədəbiyyatımızın da, cəmiyyətimizin də, Yazıçılar Birliyinin üzvlərinin də xeyrinə olacaq”-deyə o bildirdi.
İradə SARIYEVA
