Gəncədə arxeologiya parkı...
Bu gün dünya turistlərinin diqqətini çəkən əsas obyektlərdən biri arxeoloji parklardır. Turistlər müxtəlif ölkələrə gedərkən arxeoloji parklarla da ciddi maraqlanırlar. Azərbaycanda hələ arxeoloji park mövcud olmasa da, belə parkların yaradılmasına maraq göstərilir. 2012-ci ildə Prezident İlham Əliyev Göytəpə Arxeoloji Parkının yaradılması ilə bağlı Sərəncam imzalamışdı. Sözügedən arxeoloji parkın yaradılması Gəncə-Qazax bölgəsinə turizm cəlbi üçün əhəmiyyətli rol oynayacaq.
Məlumatlara görə, Gəncədə də kurqanlardan ibarət arxeoloji park yaradılacaq. Bu barədə Gəncə Şəhər İcra Hakimiyyətində CAMNES elmi-tədqiqat mərkəzi və İtaliyanın Kataniya Universitetinin professoru Nikola Lanerlə görüş zamanı bildirilib.
N.Laner Gəncə şəhəri ətrafında aparılan tədqiqatlar zamanı burada açıq havada kurqanlardan ibarət arxeoloji parkın yaradılması üçün əlverişli şərait olduğunu bildirib. O, unikal arxeoparkın yaradılmasının yerli əhali ilə bərabər turistlərin də diqqətini çəkə biləcəyini deyib. Gəncədə bu cür arxeoparkın yaradılması Azərbaycanın keçmişi barədə daha dolğun məlumat verməyə imkan yaradacaq, həmçinin, Gəncə və ətraf bölgələrə turizm axınına da təkan verəcək. Görüşdə açıq səma altında arxeoloji muzeyin şüşə örtüklə sərgisinin yaradılması barədə razılıq əldə olunub.
Gəncədə yaradılması nəzərdə tutulan arxeoloji park bölgəyə turistlərin kütləvi cəlb edilməsinə, tarixi mədəniyyətimizin təbliğ edilməsinə necə təkan verəcək?
- Qafar Cəbiyev: “Arxeoloji parkın yaradılması müsbət bir haldır və bu həmin bölgənin turizm potensialının da artmasına səbəb olacaq”
Tarix elmləri doktoru, əməkdar jurnalist Qafar Cəbiyev “Bakı-Xəbər”ə bildirdi ki, ölkədə arxeoloji parkların yaradılması həm tariximizin, həm mədəniyyətimizin, həm arxeoloji irsimizin təbliğinə, həm də bölgəyə turistlərin ciddi şəkildə axın etməsinə səbəb ola bilər: “İstər kurqanlarla, istərsə də digər tarixi abidələrlə bağlı arxeoloji parkların yaradılması praktikası dünyanın bir çox ölkəsində çox uğurla tətbiq və inkişaf etdirilib. Azərbaycanda həm kurqanlardan, həm də tarixi abidələrdən ibarət arxeoloji parkın yaradılmasına ciddi ehtiyac var. Bu arxeoloji parkın hansı şəhərdə, rayonda yaradılmasından asılı olmayaraq, onun yaradılması tarixi-mədəni irsimizin təbliği baxımından çox aktual və vacib bir iş olar. Azərbaycanda ayrı-ayrı arxeoloji obyektlər var, amma onların heç biri hələ ki, arxeoloji park statusu daşımır. Arxeoloji parkın yaradılması müsbət bir haldır və bu həmin bölgənin turizm potensialının da artmasına səbəb olacaq”.
- Bahadur Bilalov: “...dünyanın aparıcı arxeoloqları gəlib orada mühüm elmi tədqiqatlar aparacaqlar”
Azərbaycan Turizm və Menicment Universitetinin kafedra müdiri, turizm üzrə tanınmış mütəxəssis Bahadur Bilalov da bizimlə söhbətində arxeoloji parkın yaradılmasının arxeoturizmin inkişafına mühüm töhfə verəcəyini qeyd etdi: “Prinsip etibarilə bu tip parkların yaradılması tarixi abidələrlə maraqlanan turistləri cəlb etməsi, onları motivasiya etməsi baxımından mühüm rola malikdir. Düşünürəm ki, Gəncədə kurqanlardan ibarət arxeoloji park yaradılacaqsa, dünyanın aparıcı arxeoloqları gəlib orada mühüm elmi tədqiqatlar aparacaqlar. Digər tərəfdən, arxeologiya, tarixlə, maddi-mədəni irslə maraqlanan turistlər dünya turistlərinin müəyyən bir hissəsini təşkil edirlər, onlar da bu parka böyük maraq göstərəcəklər. Ağsu şəhərində arxeoloji obyekt yaradılanda çoxu ona dodaq büzsə də, nəticə göstərdi ki, bura nə qədər xarici turist gəlir. Bu məkan artıq ekskursiya obyektinə çevrilib. Bu baxımdan, hesab edirəm ki, bölgəyə turist cəlb edilməsi nöqteyi-nəzərindən yaradılması nəzərdə tutulan kurqanlardan ibarət arxeoloji park bu məsələdə mühüm rol oynaya bilər”.
İradə SARIYEVA
