Şou-biznes aləmində olanların səmimiyyəti də, insanpərvərliyi də, özlərini canıyanan kimi göstərmələri də saxtadır. Bunlar əsasən kamera üçün edilən cəhdlərdir. Kamera qarşısnda oynamağa, imitasiya etməyə meylli olan şou-biznes kəsimi yaxşı insan kimi görünmək üçün özlərini yüz şəkilə salırlar. Dünən qol-boyun olub öpüşüb, görüşürlər, dostluqdan, isti münasibətdən dəm vururlar, sabah isə “səmimi münasibət”də olduqları kəslər haqqında hədyanlar danışırlar. Hamısı özünü “süddən çıxmış ağ qaşıq” kimi göstərməyə çalışır. Əslində isə səmimiyyət və şou-biznesçi bir-birindən uzaq olan məsafələrdə yerləşir.
Əvvəllər çox eşidərdik ki, populyar şou-biznesçilər elə də tanınmış olmayan həmkarlarının toylarına, ad günü şənliklərinə, hətta konsert və klip təqdimatlarına qonorar almamış getmir. Düzü, bu adama inndırıcı gəlmirdi ki, necə ola bilər eyni sahədə təmsil olunan insanlar bir-birilərinə qarşı belə hərəkət edə bilərlər. Ancaq deyilənlər yalan deyilmiş. Şou-biznesçilər bu halı nə qədər ört-basdır etmək istəsələr də alınmayıb. El dili ilə desək “cidanı çuvalda gizlətmək mümkün deyil”. Şou əhlinin bu neqativ xarakteri də günlərin birində üzə çıxıb.
Bir vaxtlar müğənni Nüşabə Ələsgərli övladının kiçik toyunda iştirak etməsi və ifalar səsləndirməsi üçün Türkiyə musiqisinin kralı İbrahim Tatlısəsi məclisə dəvət etmişdi. İnsafən İ.Tatlısəs də xanım müğənnimizin övladının toyunda iştirak etmişdi. O vaxt xəbər yayıldı ki, onun toya gəlişi N.Ələsgərlinin çox yüksək məbləğdə qonorar ödəməsi sayəsində mümkün olub. Hətta mediada bəzi şou-biznesçilər öz həmkarının övladının toyuna pulla gələn İ.Tatlısəsi qınamışdı. Ancaq sonra aydın oldu ki, bizim bəzi populyar müğənnilər də öz həmkarlarının şad gününə qonorarsız qatılmır. Bu da onu göstərir ki, şou-biznesin özündə bir təbəqələşmə mövcuddur və qruplaşmalar var. Onların hərəsinin öz “kruqu” var və bu “kruq”dan kənarda kim onları harasa dəvət edirsə mütləq qonorar tələb edirlər. “Vaxtımız qızıldır” deyən şou-bizensçilərin hər şeyə, hətta dostluq münasibətlərinə də maddi çalar verməsi anormal haldır. Bu sadəcə, gülüncdür. Hətta deyirlər ki, bəzi şou-biznesçilər onlarla şəkil çəkdirmək istəyənlərdən də “şirinlik” umurlar. Bu yadıma Yeni il şənliklərində “Şaxta baba”ların onlarla şəkil çəkdirmək istəyən uşaqların valideynlərindən pul tələb etməsini saldı. Özü də uşaqların gözləri qarşısında. Bir müğənni öz övladının toyuna böyük məbləğdə qonorar ödəyib başqa bir həmkarını dəvət edirsə təbii ki, bu hal uşaqlarda həmin müğənni haqqında yanlış təsəvvür yaradır. Daha doğrusu, uşaqlar o müğənnilərin necəliyi haqqında səhih məlumat alırlar.
Bu günlərdə xəbər yayılıb ki, xalq artisti Aygün Kazımova populyar olmayan müğənnilərin şad gününə qonorarsız getmir. Mərhum xalq artisti, müğənni İlhamə Quliyevanın da məclislərə qonorar müqabilində qatıldığı ilə bağlı söz-söhbətlər dolaşır. Bunun nə dərəcədə doğru olduğunu deyə bilmərəm. Yəni imanımı yandıra bilmərəm.
Bu günlərdə prodüsser-aparıcı Tarix Əliyev (Tolik) qonorar müqabilində həmkarlarının şənliyinə qatılan müğənnilərdən birinin xalq artisti Aygün Kazımova olduğunu açıqlayıb. Deyib ki, A.Kazımova müğənni Rəqsanə İsmayılovanın məclisinə qonorarla qatılıb. Tolik deyib ki, Rəqsanənin qızının arzusu olub ki, Namiq Qaraçuxurlu ilə Aygün Kazımova onun ad gününə gəlsin. “Rəqsanə həmin vaxtlar çox da tanınmırdı. Onda pul ödədi ki, Aygün Kazımova gəlsin. O da gəlib məclisdə oxudu. Onların heç bir əlaqəsi yoxdur. İndikilər əlaqəsi olmayan müğənnini toyuna qonaq dəvət edir” - deyə bildirib. Bunu mən yox, Tolik deyir. O Tolik ki, şou-biznesçilərin bütün qara əməllərinə şahidlik edib.
Görünür, qonorar müqabilində öz həmkarlarının toylarına, ad günlərinə qatılmaq şou-biznesçilər üçün adi haldır. Belə olmasaydı, onlar bu hərəkətə yol verməzdilər. Bəzən eşidirik ki, bizim şou-biznesçilər hanısa rusiyalı müğənninin toyuna qatılıb. Görəsən, xalq artisti Brilliant Dadaşova rusiyalı müğənni Alsunun toyunda oxumaq üçün nə qədər qonorar alıb? Hərçənd, B.Dadaşova “Alsunun toyunda tamamilə təmənnasız oxumuşam” deyir. Bəs onda nə baş verir ki, öz həmkarlarının toyuna pulsuz getmirlər. Yəqin bizim şou-biznesçilər Alsudan daha varlıdır, ona görə...
İradə SARIYEVA
