Millət atası kimi milli tariximizdə özünə yer tutan böyük xeyriyyəçi Hacı Zeynalabdin Tağıyevin Bakıda abidəsinin ucaldılması barədə uzun illərdir müzakirələr aparılırdı. Məlum olduğu kimi, aprel ayında Mədəniyyət Nazirliyi, Bakı Şəhər İcra Hakimiyyəti və Heydər Əliyev Fondu Hacı Zeynalabdin Tağıyevin heykəlinin hazırlanması ilə bağlı açıq heykəltəraşlıq müsabiqəsi elan ediblər.
Qeyd edək ki, fonddan mətbuata verilən məlumata görə, heykəlin “İçərişəhər” metrostansiyası yaxınlığındakı meydançada (İstiqlaliyyət küçəsi) ucaldılması nəzərdə tutulub.
Hacı Zeynalabdin Tağıyevin xatirəsinin əbədiləşdirilməsi məqsədilə açıq heykəltəraşlıq müsabiqəsinin münsiflər heyətinin üzvü, Azərbaycan Memarlar İttifaqının sədri Elbay Qasımzadənin bildirdiyinə görə, Tağıyevin heykəlinin forması ilə bağlı təkliflər hələlik müzakirə mərhələsindədir. O, həmçinin, müsabiqənin iyunun 30-da başa çatacağını və sonra münsiflər heyətinin ən layiqli layihəni seçəcəyini bildirib. “Hacı Zeynalabdin Tağıyevin heykəlinin "İçərişəhər" metrostansiyasının qarşısında qoyulması təklif olunur. Bu, yeganə təklifdir və abidənin başqa məkanda qoyulması gündəmə gəlməyib”.
Hacı Zeynalabdin Tağıyevin heykəli üçün elan edilmiş müsabiqənin vaxtı iyunun 30-da başa çatır.
Heykəltəraşlar müsabiqədə iştirak etmək üçün maraq göstəriblərmi?
Təşkilat Komitəsi: “Müsabiqədə iştirak etmək üçün müraciət edənlərin sayı həddindən artıq çox idi”
Hacı Zeynalabdin Tağıyevin xatirəsinin əbədiləşdirilməsi məqsədilə açıq heykəltəraşlıq müsabiqəsinin təşkilat komitəsindən “Bakı-Xəbər”ə verilən məlumata görə, yerli memar və heykəltəraşların müsabiqəyə marağı böyükdür. Təşkilat Komitəsindən onu da bildirdilər ki, müsabiqədə iştirak etmək və Tağıyevin Bakıda qoyulacaq abidəsinin müəllifi olmağa iddia edənlər çoxdur. “Müsabiqədə iştirak etmək üçün müraciət edənlərin sayı həddindən artıq çox idi. Hacı Zeynalabdin Tağıyevin abidəsinin müəllifi olmaq istəyənlər çoxdur. Hətta bəzi heykəltəraşlar təşkilat komitəsinə müraciət edərək müsabiqənin vaxtının uzadılmasını istəyirlər. Çünki çoxunun işi hələ yarımçıqdır, istəyirlər ki, işlərini başa çatdırsınlar” - deyə təşkilat komitəsindən bildirdilər.
“Müsabiqənin vaxtı uzadıla bilərmi” - deyə təşkilat komitəsi təmsilçisindən soruşduqda o bildirdi ki, bununla bağlı hər hansı bir açıqlama verə bilməz.
Müsabiqədə xarici memar və heykəltəraşların iştirakına gəlincə, təşkilat komitəsindən bildirdilər ki, bu barədə hər hansı bir məlumat vermək onların səlahiyyətinə aid deyil: “Cəmi bir neçə gündən sonra müsabiqədə iştirak edənlərin kimliyi və sayı məlum olacaq. Müsabiqədə iştirak edənlərin kimliyi və sayı barədə biz heç bir informasiya verə bilmərik”.
Mədəniyyət Nazirliyi: “Bu məsələ ilə bağlı yalnız təşkilat komitəsi tərəfindən məlumat verilə bilər”
Mədəniyyət Nazirliyindən isə bildirdilər ki, məsələ ilə bağlı yalnız təşkilat komitəsi tərəfindən məlumat verilə bilər: “Bu məsələ ilə bağlı yalnız təşkilat komitəsi tərəfindən məlumat verilə bilər. Çünki bütün proseslər onların iştirakı ilə baş verir”.
Xanlar Əhmədov: “Abidəni təsəvvür etdiyim formada hazırlamışam, ümid edirəm ki, münsiflər tərəfindən də abidə öz qiymətini alacaq”
Müsabiqədə iştirak edən Azərbaycan Rəssamlar İttifaqının heykəltəraşlıq bölümünün rəhbəri, Xalq rəssamı Xanlar Əhmədov isə “Bakı-Xəbər”ə açıqlamasında bildirdi ki, artıq Hacı Zeynalabdin Tağıyevin abidəsi üzərində işi başa çatdırıb. “Bilirsiniz ki, müsabiqə elan ediləndən Hacı Zeynalabdin Tağıyevin abidəsi üzərində işləyirəm. Artıq abidə hazırdır. Hesab edirəm ki, istədiyimə nail olmuşam. İstədiyimi abidədə verə bilməsəydim, heç bu işi görməzdim. Abidəni təsəvvür etdiyim formada hazırlamışam, ümid edirəm ki, münsiflər tərəfindən də abidə öz qiymətini alacaq”.
X.Əhmədov bildirdi ki, o, H.Z.Tağıyevin heykəlini işləyərkən onun əsl simasını canlandırmağa çalışıb. O hesab edir ki. Tağıyevin heykəli özündə bu böyük şəxsiyyətin bütün xüsusiyyətlərini əks etdirməlidir.
Həmkarlarından kimlərin Tağıyevin heykəli üzərində işlədiyinə gəlincə, X.Əhmədov bildirdi ki, o bundan xəbərsizdir. “Müsabiqə belədir ki, elan edildikdən sonra hər kəs öz emalatxanasına çəkilib işləyir. Bir heykəltəraşın digərinin nə işlədiyindən xəbəri olmur” - deyə X.Əhmədov qeyd etdi.
İradə SARIYEVA
