18/07/2019 09:17
728 x 90

Elza Seyidcahan Yazıçılar Birliyində - şou-müğənninin iddialarına tanınmış yazıçılardan reaksiyalar...

img

Şou-biznes nümayəndələri ifa etdikləri mahnıları ilə deyil, geyimləri, hər hansı bir hərəkəti ilə gündəmdə qalırlar. Son zamanlar bəstəkar-müğənni Elza Seyidcahan şeirləri ilə daim gündəmdə olmağa üstünlük verir. Onun yazdığı cızma-qaralar sosial şəbəkə istifadəçiləri tərəfindən müzakirə olunur. Buna baxmayaraq,  müğənni mahnı deyil, daha çox şeir yazmağa iddialı olduğunu ortaya qoyur.

Bəstəkar-müğənni, Əməkdar artist Elza Seyidcahan israr edir ki, o, Yazıçılar Birliyinə üzv olacaq: “Yazıçılar Birliyinə niyə də üzv olmayım? Yəqin ki, gələcəkdə Birliyin üzvü olacağam”.

Bəstəkar-müğənni Elza Seyidcahanın AYB-yə üzv olmaq istəyi ictimaiyyət, peşəkar yazıçılar tərəfindən birmənalı qarşılanmır.

  • Elçin Hüseynbəyli: “Elza Seyidcahan şairə kimi zəifdir, ancaq gözəl müğənnidir”

Yazıçı-dramaturq Elçin Hüseynbəyli “Bakı-Xəbər”ə açıqlamasında qeyd etdi ki, E.Seyidcahan AYB-yə üzv olmaq istəyirsə, oranın üzvü ola bilər: “Yazıçılar Birliyi yazarların qrupu sayılır. Orada istedada qiymət verilmir, kimin nə dərəcədə qabiliyyətli olduğu heç kimə maraqlı deyil. Ancaq cəmiyyətdə kimin nə dərəcədə istedadlı olduğu hər kəsə bəllidir. Elza Seyidcahan şairə kimi zəifdir, ancaq gözəl müğənnidir. Birliyə üzv olmaq istəyərsə, şəxsən mən onu dəstəkləyərdim”.

  • Tural Turan: “Təki Elza xanım AYB-yə üzv olsun, qarşıdan qurultay gəlir, şairləri, qurultay iştirakçılarını şənləndirər bir az...”

Yazıçı Tural Turan isə qeyd etdi ki, Yazıçılar Birliyində indi çayxanada yazıb-yaradan şairlər də var: “Hesab edirəm ki, ağzının danışığını bilməyən üzv olursa, sözünün canını bilməyən Elza xanım niyə olmasın? Üstəlik, yaxşı görkəmi də var. Görkəmi varsa, deməli, bu gün-sabah görkəmli şair deyəcəklər. Musa Yaqub kimi Xalq şairinə bir dəfə də olsun görkəmli şair demədilər. Çünki görkəmi yoxdur (gülür). Bir az daha ciddi fikir bildirmək istəyirəm, meyxanaçı Namiq Məna üzv, hətta AYB Qubadlı bölməsinin sədri olursa, Elza Seyidcahan xanım niyə olmasın?! Digər tərəfdən, istəmək çox şeydir, amma hər şey deyil. Elza xanım hər şeyini ortaya qoysa, AYB-yə üzv ola bilər. Hər şey deyəndə nəyi nəzərdə tutursunuz? - soruşa bilərsiniz. Bötövlükdə, istedadını - deyə cavab verərdim. İndi AYB-də rayondan pendir-şor gətirib üzv olan görməmişəm. Amma gözəlliklərini gətirib üzv olanlar çoxdur. Yenə də istedad gözəlliyini nəzərdə tuturam. Əgər bəziləri xalq şairi oldusa, çox keçməz, Elza xanım da olar. Təki Elza xanım AYB-yə üzv olsun, qarşıdan qurultay gəlir. Şairləri, qurultay iştirakçılarını şənləndirər bir az... Çalıb-oxuyar, alqış alar”.

  • Elşad Barat: “Azərbaycan Yazıçılar Birliyi şair, yazıçıları üzvlükdən çıxarıb müğənniləri Birliyə üzv etməyə başlayıbsa…”

Yazıçı Elşad Barat isə bizimlə söhbətində qeyd etdi ki, bu yaxında Çingiz Abdullayevin maşınının şəklini paylaşdığı üçün o, AYB üzvlüyündən çıxarılıb: “Buna etiraz olaraq ciddi qələm adamlarından bir neçəsi AYB üzvlüyündən imtina etdi. Eyni zamanda, istedadlı şair Şahinə Könül də sərt münasibət bildirərək üzvlükdən imtina etdi. Belə getsə, AYB-də elə özləri qalacaq. Elza xanım mənim sevdiyim, dinlədiyim müğənnilərdəndir. Şeir yazmaq həvəsinə düşübsə, nə yaxşı, qoy yazsın. Bəlkə də onun şeirləri bizim bəzi xalq şairlərinin şeirlərindən daha maarifləndirici olacaq. Amma AYB şair, yazıçıları üzvlükdən çıxarıb müğənniləri Birliyə üzv etməyə başlayıbsa, onda Birliyin adını dəyişib Azərbaycan Müğənnilər Birliyi qoysunlar… Elza xanıma təklif edirəm ki, hərdən gəlib bizim yazarların şeirlərinə mahnı bəstələsin, sonra da gedib AYB-də oxusun”.

Günel CƏLİLOVA

Son xəbərlər