“Həmcinsləri ilə dodaq-dodağa öpüşən və sonra da o fotoları sosial şəbəkələrdə yayan şou-biznesçilər görəsən uşaq və yeniyetmələrə pis örnək olduqlarının fərqindədirlərmi?”
Bütün əcaib-qərayib hadisələrin çoxu şou-biznesçilərin davranışlarında əks olunur. İşləri-gücləri qalmaqal törətmək olan şou-müğənnilərinin müəyyən bir qismi son zamanlar özlərini müxtəlif rakurslarda təqdim etməyə başlayıblar. Qalmaqalların tükəndiyi bir vaxtda onlar sosial şəbəkələri və bəzi maqazin saytlarını insanlarda qıcıq yaradan fotoşəkilləri ilə bəzəməyə başlayıblar.
Açıq-saçıq şəkillər və videolar paylaşmaqdan gözləri doymayan şou əhli indi də sosial şəbəkələrdə öz həmcinsləri ilə dodaq-dodağa öpüşdükləri yerdə çəkdirdikləri şəkilləri paylaşırlar. Son zamanlar “İnstagram”da həm bəzi kişi müğənnilərin, həm də qadın müğənnilərin öz həmcinsləri ilə dodaq-dodağa öpüşdüklərini əks etdirən fotoların yayılması qıcıq doğurur. Kişi və qadın müğənnilərin də dodaq-dodağa öpüşdüklərini göstərən fotolar da kifayət qədərdir.
Son günlər sosial şəbəkələrdə və maqazin saytlarında ən çox müzakirə edilən məsələlərdən biri müğənni Xatirə İslam və rəqqasə Renkanın dodaq-dodağa öpüşdüyünü əks etdirən foto və videodur. Xatirə və Renkanın dodaq-dodağa öpüşməsi səhnəsi ajiotaj yaradıb. Bu səhnə bir çox sosial şəbəkələrdə və saytlarda yayılıb.
Məlumdur ki, bir neçə il əvvəl analoji hadisə rəqqasə Fatimə Fətəliyeva ilə müğənni Xatun arasında baş verib. Hər iki şou-biznesçinin dodaq-dodağa öpüşməsini əks etdirən fotolar yayılıb. Xatunla Samiraldonun da öpüşdüyü yerdə şəkilləri lentə alınıb.
Bundan başqa, bir müddət əvvəl müğənni Niyam Salami və aparıcı Sərxan Kərəmoğlunun dodaq-dodağa öpüşdüklərini göstərən fotolar da sosial şəbəkələrin və saytların gündəmində yer tutub. Onu da bildirək ki, sosial şəbəkələrdə, həmçinin, müğənni Mətanət Əsədova ilə Sərxan Kərəmoğlunun dodaq-dodağa öpüşməsi ilə bağlı foto da yayılmışdı. Bundan əlavə, Mətanət Əsədova ilə Nadirin də eyni cür şəkilləri mövcuddur. Onu da qeyd edək ki, müğənni Şəbnəm Tovuzlu ilə həmkarı Rahidə Baxışovanın da bu cür şəkilləri sosial mediada yer alıb. Hətta müğənni Rəqsanə İsmayılovanın qızı Aysunun da rəqqasə Aygünlə dodaq-dodağa öpüşdüyü yerdə fotoları var. Bu azmış kimi, Rəqsanənin qızı ilə özünün dodaq-dodağa öpüşdükləri də fotoşəkillərdə əks olunub.
Qeyd edək ki, əvvəlki illərdə müğənni Röyanın Faiq Ağayevlə, Samir Cavadzadə, Samir Bağırovla dodaq-dodağa öpüşdüyünü əks etdirən fotolar da yayılıb.
Bununla bağlı kifayət qədər foto və videofakt var. Hər zaman qeyrətdən, namusdan dəm vuran, lakin heç bir göstəriciləri ilə bu kateqoriyanın yaxınına belə gələ bilməyən şou-biznesçilərin bu cür davranış sərgiləməsinin müxtəlif səbəbləri var.
Nərgiz Allahverdiyeva: “... müəyyən psixoloji probleminin olması da diqqətdən yayına bilməz”
Psixoloq Nərgiz Allahverdiyevanın sözlərinə görə, şou-biznesçilərin bu cür davranış sərgiləməsinin kökündə bir tərəfdən onların gündəmdə qalmaq istəyi dayansa da, digər tərəfdən bu onların özlərini bəzi xarici ulduzlara bənzətməsindən irəli gəlir. N.Allahverdiyevanın bildirdiyinə görə, öz sənətləri ilə diqqət çəkməyi bacarmayan bəzi şou-biznesçilər belə tryuklarla diqqət çəkmək istəyirlər. O, həmçinin, qeyd etdi ki, bu cür adamların, ola bilsin, müəyyən qədər psixoloji problemləri var. Belələrinin əsasən tez-tez depressiya keçirdiyini qeyd edən psixoloq hesab edir ki, onların tutduqları yol gənclər, xüsusən də yeniyetmələr üçün çox pis örnəkdir. “Qadın və kişi şou-biznesçilərin dodaq-dodağa öpüşməsini əks etdirən foto və videoların yayılması ilk nöbvədə yeniyetmələrə və gənclərə mənfi təsir göstərir. Onlar bu cür fotoları yaymaqla, əslində, guya gündəmdə qalmaq istəyirlər, lakin bu yolla gündəmdə qalmaq cəhdləri şou-biznesçiləri daha da gözdən salır. Bizim şou-biznesçilərin çoxu təəssüf ki, öz ifaları, performansları ilə deyil, belə şeylərlə gündəmə gəlməyə cəhd göstərirlər. Öz həmcinsi ilə dodaq- dodağa öpüşüb, sonra da bunu fotolarda əks etdirən ifaçıların müəyyən psixoloji probleminin olması da diqqətdən yayına bilməz. Gənclər və yeniyetmələr neqativliyi su çəkən kimi canlarına çəkirlər. Onlara elə gələ bilər ki, iki kişi müğənni dodaq-dodağa öpüşürsə, bu belə də olmalıdır. Əslində isə belə deyil. Bu anormal bir mənzərədir. Nəzərə almaq lazımdır ki, bu fotoları sosial şəbəkələrdə yalnız orta nəsil izləmir, onlara uşaq və yeniyetmələr də baxır. Bəzi müğənnilər özlərini xarici ulduzlara bənzətməyə cəhd edərək, öz həmcinsi ilə dodaq-dodağa öpüşür və bunu da yayır. Xaricdə belə şeylər olur, amma bu orada da belə kütləvi deyil. Düşünürəm ki, o cür fotoşəkillərin sosial şəbəkələrdə yayılmasının qarşısı hansısa yolla alınmalıdır. Onların dodaq-dodağa öpüşməsi heç də mehribanlıqlarının əlaməti deyil. Burada gündəmdə qalmaq cəhdləri özünü daha çox hiss etdirir. Bilirsiniz, bizim bəzi şou-biznesçilər Azərbaycana yad olan və üzərində bəzi elementləri əks etdirən geyimlər də geyinirlər. Bu geyimlərlə onlar gənclər arasında nəyi təbliğ edirlər? Üzərində “LGBT” yazılan köynəklər geyən bəzi şou-biznesçilərin məqsədi nədir, anlamaq olmur. Bu insanların davranışları, geyimləri uşaqlarımızın mənəvi tərbiyəsinə zərbə vurur. Həmcinsləri ilə dodaq-dodağa öpüşən və sonra da o fotoları sosial şəbəkələrdə yayan şou-biznesçilər görəsən uşaq və yeniyetmələrə pis örnək olduqlarının fərqindədirlərmi?” - deyə müsahibimiz bildirdi.
Leyla QARAXANLI
.jpg)
.jpg)
