Yazıçılar Birliyində məhkəmə qalmaqalı - Çingiz Abdullayev Elşad Baratı niyə məhkəməyə verir...
“... qoy yuxarı dairələrdən bir komissiya təşkil edilsin və onlar araşdırıb görsünlər ki, AYB-yə ayrılan büdcə hara gedir, o vəsaiti kim xərcləyir?”
Azərbaycan Yazıçılar Birliyi (AYB) ətrafında qalmaqallar səngimək bilmir. Demək olar ki, son illər AYB rəhbərliyi ilə gənc yazarlar arasında bir sıra münaqişələr, söz-söhbətlər yaşanıb ki, bu da gənclərin bu quruma rəhbərlik edənləri müxtəlif məsələlərdə ittiham etməsi ilə bağlıdır.
AYB ilə bağlı yeni qalmaqal gündəmə gəlib. Mətbuatın yazdığına görə, Xalq yazıçısı, AYB katibi Çingiz Abdullayev gənc yazar Elşad Baratı məhkəməyə verir. Bildirilənə görə, Xalq yazıçısının gənc yazar E.Baratı məhkəməyə vermək istəyinə gənc yazarın onun haqda yazdığı status və paylaşdığı foto səbəb olub. Qeyd edilənə görə, E.Batat statusunda qeyd edib ki, Ç.Abdullayev AYB-yə, gənc və kasıb yazıçı-şairlərə ayrılmış 800 min manatdan gedib özünə 6-cı maşını alıb... “Bu da Çingizin 6-cı maşını. Nömrələrinə baxın hələ, əlində imkan var deyə, restoranı arenda verir, büdcəni dağıdır...” - gənc yazar statusunda qeyd edib.
Xalq yazıçısının E.Baratı məhkəməyə verməsi mediada böyük hay-küyə səbəb olub.
- “Əmindirsə ki, maşın onun deyil, niyə hirslənir, məni təhqir edir?”
Gənc yazar E.Barat “Bakı-Xəbər”ə bildirdi ki, sosial şəbəkələrdə Ç.Abdullayevin maşını olduğu bildirilən bir foto paylaşılıb, o da həmin fotonu öz səhifəsində paylaşıb. “Mən də götürüb o fotonu paylaşıb yazdım ki, baxın, bu, Ç.Abdullayevin 6-cı maşınıdır. Bir də baxdım ki, saytlardan birindən mənə zəng vurub “Ç.Abdullayev səni məhkəməyə verir” dedilər. Niyə? Səbəb də həmin fotonu paylaşmağım göstərilir. Mənim bildiyim budur. O anda da mənə gizli nömrədən zəng gəlmişdi, məni ölümlə hədələdilər, bilmirəm kimlər idi. Vəziyyət belədir. Ç.Abdullayev iddia etmirmi ki, maşın mənim deyil, büdcəni dağıtmıram, belədirsə, qoy yuxarı dairələrdən bir komissiya təşkil edilsin və onlar araşdırıb görsünlər ki, AYB-yə ayrılan büdcə hara gedir, o vəsaiti kim xərcləyir? Burada çox ciddi məsələlər var. Ç.Abdullayev o şəkli çəkib paylaşanları tapa bilmir, o səbəbdən də mənim üstümə düşür, “səni məhkəməyə verəcəyəm, sən vicdansızsan” deyib məni təhqir edir”.
E.Barat Xalq yazıçısının ana dilimizdə səlist danışmamasına da diqqət yönəldib. O qeyd edib ki, Ç.Abdullayev dilimizdə normal şəkildə danışa bilmir: “Əvvəla Xalq yazıçımız Azərbaycan dilini yaxşı bilmir, üç cümlə söyüş yazıb, otuz səhv buraxıb. İkincisi, mən onun maşınının şəklini çəkməmişəm, hansısa səhifədə paylaşmışdılar, mən də götürüb söyüşsüz-filansız paylaşmışam. İndi baxıram o səhifədən siliblər. Çingiz müəllim əmindirsə ki, maşın onun deyil, niyə hirslənir, məni təhqir edir? Sakitcə deyə bilərdi ki, bala, bu maşın mənim deyil, mən də deyərdim, ay Çingiz müəllim, səhifələr paylaşmışdı, yanlış olub yəqin, üzürlü bilin və bununla da məsələ bağlanardı. Çingiz müəllim məni sərt şəkildə təhqir edib və buna görə mən də şikayətçi olacağam. Gedib məsələni kökündən həll edə bilmir, ilk kim paylaşıbsa, onunla işini həll edə bilmir, gəlib mənim kimi kimsəsiz bir yazarın üstünə hücum çəkir? Bu nə ədalətdir? Bu nə yazıçılıqdır? Bayaq da mənə gizli nömrədən zəng gəlmişdi, məni ölümlə hədələdilər, bilmirəm kimlər idi. Mən ölümdən qorxmuram, sadəcə, üç körpə balam var. Çingiz müəllimin mənə qarşı işlətdiyi təhqiramiz sözlərə görə isə, sadəcə, heyfslənirəm” - deyə gənc yazar bildirdi.
Məsələ ilə bağlı qarşı tərəfin də mövqeyini dərc edə bilərik.
İradə SARIYEVA
