Azərbaycanda incəsənət əsərlərinin auksionunun keçirilməsi rəssamlar tərəfindən hər zaman arzu edilsə də, bu istiqamətdə hər hansı bir addım atılmırdı. Əlbəttə, Azərbaycan rəssamlarının, təsviri incəsənət ustalarının əsərlərinin auksionlara çıxarılması həm onların əsərlərinin təbliğatı baxımından, həm də rəssamların gəlir əldə etməsi nöqteyi-nəzərindən əhəmiyyətlidir.
Bu gün Azərbaycan rəssamlarının dünyada təbliğatı sahəsində mövcud problemlər hələ də qalır. Baxmayaraq ki, Mədəniyyət Nazirliyinin və Heydər Əliyev Fondunun təşəbbüsü, təşkilatçılığı ilə müxtəlif xarici ölkələrdə klassik və çağdaş Azərbaycan rəssamlarının əsərlərinin sərgisi təşkil edilir, onların tanıdılması istiqamətində sistemli işlər görülür. Bu gün dünyada incəsənət əsərlərinin təbliğ edilməsi və satılması məsələsində başlıca rolu auksionlar oynayır. Sirr deyil ki, dünya şöhrətli bir sıra rəssamların əsərləri çox baha qiymətə xarici auksionlarda satılır. Bu əsərlərin qiyməti hədsiz dərəcədə baha olur.
Azərbaycanın dünya şöhrətli fırça ustaları az deyil. Təkcə Səttar Bəhlulzadənin, Toğrul Nərimanbəyovun, Tahir Salahovun, Sakit Məmmədovun adını çəkmək kifayətdir ki, dediklərimiz öz təsdiqini tapsın. Rəssamların fırça nümunələri auksionlara çıxarılarkən həm satılır, həm də təbliğ edilir.
Xarici ölkələrdə olduğu kimi, artıq Azərbaycanda da incəsənət əsərlərinin auksionu keçirilir. Belə ki, mayın 21-də “Hilton Baku” otelində ilk dəfə olaraq incəsənət əsərlərinin auksionu keçirilib.
Qeyd edək ki, auksion Mədəniyyət Nazirliyi, Dövlət Rəsm Qalereyası və “Auction Baku” MMC-nin birgə təşkilatçılığı ilə reallaşıb.
Mədəniyyət Nazirliyi: “Auksionun keçirilməsi respublikada mədəniyyət və incəsənət sahəsində biznes münasibətlərini yaratmaq, alıcı və satıcılar arasında əlaqə qurmaq...”
Mədəniyyət Nazirliyindən “Bakı-Xəbər”ə verilən məlumata görə, auksion respublikada mədəniyyət və incəsənət sahəsində biznes münasibətlərini yaratmaq, alıcı və satıcılar arasında əlaqə qurmaq, bu biznes sahəsində rəqabətqabiliyyətliliyi gücləndirmək məqsədi daşıyır. Məşhur rəssamlar Böyükağa Mirzəzadə, Maral Rəhmanzadə, Gennadi Brijatyuk, Zakir Hüseynov, Tofiq Cavadov, İlham Mirzəyev, Mirazər Abdullayev, Mahmud Rüstəmov, Aslan Rüstəmovun əsərləri və “İnqermandland” adlı I Pyotr dövrünə aid döyüş gəmisinin maketi auksiona çıxarılıb.
Oqtay Əliyev: “Artıq Azərbaycanda da auksion keçirilməsi ənənəsinin əsası qoyulub və bu formalaşmaqdadır”
Azərbaycan Rəssamlar İttifaqının üzvü, tanınmış rəssam-dizayner Oqtay Əliyev “Bakı-Xəbər”ə bildirdi ki, bu aksionun keçirilməsinin əhəmiyyəti var. Auksionda hən klassik, həm orta və həm də yeni nəsil rəssamların əsərlərinin satıldığını deyən O.Əliyev hesab edir ki, bu, rəssamlara yaradıcılıq stimulu verəcək. “Bu aksiona məni də dəvət etmişdilər, təəssüf ki, işimin çoxluğundan orada iştirak edə bilmədim. Auksionun əsas məqsədi rəssamlara stimul vermək, onları həvəsləndirməkdir. Bilirsiniz ki, rəssamların hazırda vəziyyəti müsbət deyil, maddi cəhətdən sıxıntı çəkirlər, elə rəssamlar var ki, hətta material almağa pulları yoxdur. Belə auksionların keçirilməsi çox müsbətdir. Artıq Azərbaycanda da auksion keçirilməsi ənənəsinin əsası qoyulub və bu formalaşmaqdadır. Mənə elə gəlir ki, bu auksionun əhəmiyyəti böyük olacaq. Hazırda auksion keçirilir və biz bundan müsbət nəticələr gözləyirik. Bu auksionda hansı rəssamların əsərləri satılarsa, bu onların özlərinə, ailələrinə maddi dəstəkdir. Auksion sahəsi Azərbaycanda da Avropada və digər ölkələrdəki kimi formalaşsa, tez-tez auksionlar keçirilsə, rəssamlara bunun xeyri dəyə bilər. Burada onların həm əsərləri tanınar, həm də satılar. Auksiona əsərləri çıxarılan rəssamların hamısı məşhurdur və onların əsərləri qiymətlidir. Onlar dünya şöhrətli rəssamlardır”.
O.Əliyev qeyd etdi ki, mayın 21-də keçirilən auksionda gənc rəssamların əsərlərinin də olması onların öz sənətlərinə marağını bir qədər də artırır, onlarda sənətlə bağlı gələcəyə inam yaradır. “Bildiyimə görə, bu auksionda gənclər də iştirak edib. Auksionun əsas təşkilatçılardan biri Azərbaycan Dövlət Rəsm Qalereyasıdır. Bu auksiondan sonra başqa bir auksion keçiriləcək. Digər auksion “Expo” sərgi mərkəzində baş tutacaq. Bu auksion isə daha geniş olacaq” - deyə O.Əliyev bildirdi.
İradə SARIYEVA
