17/09/2019 01:05
728 x 90

Azərbaycanın Qırğızıstandakı səfirliyi Nəsiminin 650 illiyi ilə bağlı Bişkekdə geniş ədəbi-bədii gecə keçirdi - FOTO

img

Mayın 17-də Qırğızstanın Bişkek şəhərində Alıkul Osmonov adına Qırğızstan Milli kitabxanasının böyük salonunda İmadəddin Nəsiminin 650 illiki yubileyinə həsr olunmuş ədəbi-bədii tədbir keçirilib.

Azərbaycanın Qırğızıstandakı səfirliyindən “Bakı-Xəbər”ə bildirildiyinə görə, Qırğız Respublikasının Mədəniyyət, informasiya və turizm naziri Azamat Jamankulov, digər ali vəzifəli şəxslər, səfirlər, diplomatik korpusun məsul əməkdaşları, görkəmli ədəbiyyatçılar, QHT və KİV təmsilçilərinin iştirak etdiyi yubiley Azərbaycan Respublikasınının (AR) Mədəniyyət, Qırğız Respublikasının Mədəniyyət, informasiya və turizm nazirliklərinin, TÜRKSOY-un, AR-ın Qırğız Respublikasında Səfirliyinin birgə təşkilatçılığı ilə baş tutub.

Öncə Qırğızstan Milli Kitabxanasının foyesində Azərbaycan Milli Kitabxanasının fondunda olan Nəsiminin əsərlərindən ibarət kitab sərgisinin açılışı olub.       

Sərginin açılışından sonra İmadəddin Nəsimi haqqında qısa sənədli film nümayiş etdirilib.

Nazir Azamat Jamankulov çıxış edərək, böyük Azərbaycan şairi İmadəddin Nəsiminin 650 illik yubileyinə həsr olunmuş tədbirin keçirilməsinin əlamətdar hadisə olduğunu bildirib. Nəsiminin yaradıcılığının böyüklüyünü və bizim günlərdə də aktual olduğunu deyən natiq səfirliyin nazirliklə hər zaman sıx əməkdaşlıq etməsindən məmnunluq ifadə edib.

Azərbaycanın Qırğızstandakı səfiri Hidayət Orucov qeyd edib ki, məhz Ümummilli Lider Heydər Əliyevin təşəbbüsü ilə əlli il bundan öncə Nəsiminin 600 illik yubileyi UNESCO-nun tədbirlər siyahısına daxil edilib, ölməz əsərləri dünya dillərinə çevirilib. Həmin yubiley tədbirlərinin davamı olaraq, 1979-cu ildə Bakının mərkəzində İmadəddin Nəsiminin möhtəşəm heykəli ucaldıldı, şair haqqında məşhur bədii film çəkildi. Məlumat verib ki, onun layiqli davamçısı Prezident İlham Əliyev İmadəddin Nəsiminin 650 illik yubileyi münasibətilə 2019-cu ilin ölkəmizdə “Nəsimi ili” elan edilməsi ilə bağlı tarixi Sərəncam imzalayıb.

TÜRKSOY-un nümayəndələri Kocogeldi Quliyev və Elçin Qafarlı çıxış edərək, dahi Nəsiminin əsərlərinin hələ sağlığında Azərbaycan, Yaxın Şərq, İraq, Kiçik Asiya və Suriyada, eləcə də Orta Asiyada geniş şöhrət tapdığını bildirib, onun irsinin geniş araşdırılaraq tədqiq edilməsinin və əsərlərinin türk xalqlarının dillərinə tərcümə edilərək nəşr olunmasının vacib olduğunu qeyd ediblər.

Azərbaycan Milli Kitabxanasının direktoru Kərim Tahirov İmadəddin Nəsiminin yaradıcılığı haqqında söhbət açaraq, şairin çox mürəkkəb və ziddiyyətli həyat yolu keçdiyini, Azərbaycan ədəbiyyatında ana dilində yaranan fəlsəfi şeirin əsasını qoyduğunu, XV əsrdən etibarən bütün türk ədəbiyyatına güclü təsir göstərdiyini, əsərlərinin əlyazma şəklində geniş yayılaraq, dünyanın bir sıra mötəbər kitabxanalarında saxlandığını deyib. O, XIV əsrin sonu, XV əsrin əvvəllərində yaşayıb-yaratmış böyük Azərbaycan şairi və filosofu İmadəddin Nəsiminin ərəb, fars və türk dillərində humanist ruhlu əsərlər qələmə alan ən böyük şairlərdən biri, ana dilimizdə yazan ilk şairlərdən olduğunu diqqətə çatdırıb.

Sonra Qırğız-Rus Slavyan Universitetinin İranşünaslıq Mərkəzinin direktoru Məlahət Məmmədova, türk yazıçı-araşdırmaçı Kenan Çarboğa, qazax şairi Dauletbek Baytursunlu, başqırd şairi Tamara Yuldaşeva İmadəddin Nəsiminin həyat və yaradıcılığı haqqında söz açaraq, onu türk xalqlarının böyük şairi adlandırıblar.

Daha sonra səfir H.Orucov və nazir A.Jamankulov TÜRKSOY tərəfindən xatirə hədiyyəsi ilə mükafatlandırılıb.

Bədii hissədə Nəsiminin şerləri  müxtəlif dillərdə (başqırd, rus, qazax, qırğız və s. ) oxunub, ecazkar Azərbaycan və qırğız musiqisi səslənib.

Ertəsi gün Qırğızıstanın Bişkek şəhərindəki Manas Universitetində İmadəddin Nəsiminin 650 illiyi ilə bağlı daha bir tədbir keçirildi.

Manas Universitetinin rektoru professor Səbahəttin Balcı tədbiri açaraq vurğulayıb ki,  Nəsiminin ədəbi irsi dövrün dərin poetik fikirlərinin və fəlsəfi baxışlarının vəhdətini təşkil edir. Onun yaradıcılıq irsi qədim köklərə və çoxəsrlik ənənələrə malik türk ədəbiyyat tarixində xüsusi mərhələdir. Orta əsrlər türk poeziyasının humanizm ideyaları ilə zənginləşməsində və yeni məzmun kəsb etməsində unudulmaz şairin xidmətləri ölçüyəgəlməzdir.

Səfir H.Orucov çıxışında  türk dünyasının ortaq mədəniyyətinin və ədəbiyyatının təbliğində belə yubiley tədbirlərinin keçirilməsinin böyük əhəmiyyət kəsb etdiyinə diqqət çəkərək, xüsusilə 71 illik sovet dönəmində qardaş xalqlarımızın ədəbiyyatından xəbərsiz olduqlarından indi bu işi çox sürətlə görməyin vacib olduğunu vurğulayıb.

Tədbirdə Manas Universitetinin birinci prorektoru Asılbek Kulmurzayev çıxış edərək, böyük Azərbaycan şairi İmadəddin Nəsimini bütün dövlərin ustad şairi olduğunu deyib. Bildirib ki, şair o dövrün önəmli mədəniyyət mərkəzləri olan Azərbaycan, İran, Türkiyə, İraq, Suriya şəhərlərini gəzərək öz idayelarını bu bölgələrdə şeirləri vasitəsilə insanlara çatdırıb.

Azərbaycan Milli Kitabxanasının direktoru Kərim Tahirov İmadəddin Nəsiminin Azərbaycan xalqının ümumbəşər mədəniyyətinə bəxş etdiyi qüdrətli söz ustadlarından, Şərqin zəngin mədəni-mənəvi sərvətləri üzərində ucalmış və bədii söz sənətinin son dərəcə qiymətli incilərini meydana gətirmiş mütəfəkkir şair olduğunu qeyd edib.

TÜRKSOY-un nümayəndələri Kocogeldi Quliyev və Elçin Qafarlı çıxış edərək, Nəsimi yaradıcılığının nəinki türk dünyasında, ümumiyyətlə, bəşəriyyət üçün dərin məna kəsb etdiyini qeyd edib. Vurğulayıblar ki, Nəsiminin yaradıcılığı millətlər və xalqlar arasında təmas nöqtəsini təşkil edir.

Manas Universitetinin professoru Layli Ukubayeva, Qırğız ədəbiyyatşünası dosent Karlıqaç Cumakatirova, türk yazıçı-araşdırmaçı Kenan Çarboğa, qazax şairi Sayat Kamşiger, başqırd şairi Tamara Yuldaşeva və başqaları Nəsimi yaradıcılığı haqqında geniş söhbət açıb və onu türk xalqlarının böyük şairi adlandırıblar.

TÜRKSOY  adından səfir H.Orucova və rektor S.Balçıya xatirə medalı təqdim olunub.

Tədbirin sonunda səfir H.Orucov bütün iştirakçılara, xüsusilə TÜRKSOY-un nümayəndələrinə və Manas Universitetinin rəhbərliyinə təşəkkürünü bildirib.

Son xəbərlər