15 aprel - 4 may 2019-cu il tarixlərində Türkiyədə böyük nüfuza sahib olan Kayseri 14-cü Beynəlxalq Məktəblərarası Teatr Festivalında Azərbaycan “Aləmin nəfəsi: Nəsimi” tamaşası ilə təmsil olunub. Festivalda Azərbaycanı Türkiyənin Azərbaycandakı Səfirliyinin Mədəniyyət və təbliğat müşavirliyinin dəstəyilə Azərbaycan Milli Konservatoriyası (AMK) nəzdində olan İncəsənət Gimnaziyasının şagirdləri təmsil ediblər. Onların ifasında nümayiş olunan tamaşa böyük rəğbətlə qarşılanıb.
Mayın 18-də isə Bakı Kitab Mərkəzində İmadəddin Nəsiminin 650 illiyinə həsr olunmuş “Aləmin nəfəsi: Nəsimi” tamaşasının təqdimatı və aktyorların mükafatlandırılması baş tutub. Festivalın yekun nəticəsi olaraq, layihənin Azərbaycan üzrə rəhbəri, tərtibatçısı və dekoratoru, rəssam Günay Mehdizadənin rəhbərliyi altında təqdim olunan "Aləmin nəfəsi: Nəsimi" tamaşası Kayseridə 3 nominasiya üzrə - "Ən yaxşı səhnə dekorasiyası", "Ən yaxşı rejissor işi" və "Ən yaxşı aktyor oyunu"na görə mükafatlara layiq görülüb.
Mükafatlandırma gecəsində qalib olan tamaşa bir daha izləyicilərə təqdim olunub. Gecədə çıxış edən Türkiyənin Azərbaycandakı Səfirliyinin Mədəniyyət və təbliğat məsələləri üzrə müşaviri İrfan Çiftçi AMK tərkibində İncəsənət Gimnaziyasının şagirdlərinə uğurlar arzulayıb: "Beynəlxalq festivallar məktəblilərin özlərini realizə etmələri üçün ən ideal bir vasitədir. Kayseridə keçirilən 14-cü Beynəlxalq Məktəblərarası Teatr Festivalında iştirak edən şagirdlər, sözün əsl mənasında, möhtəşəm bir performans sərgilədilər. Məktəblilərin ifasında Nəsiminin fəlsəfəsinin qədim türk, islam fəlsəfəsindən necə təzahür etdiyini görmüş olduq".
BKM-nin direktoru Günel Rzayeva çıxışında Nəsimi ilinin elan olunmasının önəmliliyindən bəhs edib: "Nəsimi dünya klassikasının ən böyük korifeylərindəndir. Sevinirik ki, burada da silsilə tədbirlər keçirilir. Bu gün də bu tədbir bizi çox sevindirdi. Gənclər bu dərəcədə Nəsiminin yaradıcılığına bələddirlər, onu sevərək oxuyurlar. Biz belə tədbirləri ancaq dəstəkləyə bilərik. Şagirdlərin ifasında nümayiş olunan "Aləmin nəfəsi: Nəsimi" tamaşasını çox bəyəndim, yaxşı mənada uşaqların peşəkarlığı məni heyrətləndirdi. Layihə rəhbərinə və gənclərə uğurlar arzulayıram".
Rəssam Günay Mehdizadə çıxışında layihənin uğur qazanmasından məmnunluğunu bildirdi: “Uşaqlar bizim gələcəyimizdir. Onların belə mötəbər bir festivalda məhz Azərbaycanın dahi sənətkarını canlandırması, onu beynəlxalq aləmdə tanıtması Azərbaycan mədəniyyəti üçün bir uğur idi. Nə xoş bizə ki, qarşımıza qoyduğumuz bu amal uğrunda qalibiyyətlərimiz daha çoxdur. Bundan məmnunluq hissi duyuram və qalibiyyətimizi təkcə bizim deyil, Azərbaycan gənclərinin uğuru kimi qiymətləndirirəm".
Sonda nəzərdə tutulan mükafatlar səfirliyin müşaviri tərəfindən iştirakçılara təqdim edilib.
Xəbər xidməti
