Qobustan açıq səma altında füsunkar bir qoruqdur. Bu qoruqda bircə dəfə olanlar buradan özləri ilə bir ömrə bəs edəcək qədər gözəl xatirələr aparırlar. Hər daşı, qayası, çınqılı belə özündə böyük tarix yaşadır, qədim Azərbaycan insanının tarixini. Minilliklər boyu mövcud olan Qobustan abidəsi Azərbaycanın qədim insan yaşayış məskənlərinin biri olduğunu göstərir.
Mədəniyyət Nazirliyinin təşkilatçılığı ilə 18 may - Beynəlxalq Muzeylər Günü münasibətilə bir sıra media qurumlarının əməkdaşları Qobustan Milli Tarix-Bədii Qoruğunda, Qara Qarayevin ev-muzeyində və Milli İncəsənət Muzeyində oldular.
Səfər zamanı media təmsilçiləri Qobustan Milli Tarix-Bədii Qoruğunda olarkən burada virtual Qobustan muzeyi ilə yaxından tanış oldular. Qədim dövlərlərə aid olan eksponatlar, müqəvvalar, eləcə də digər nümunələr səfər iştirakçılarının marağına səbəb oldu. Biz orada olarkən maraqlı mənzərələrlə qarşılaşdıq, məktəblilərin və xarici turistlərin muzeyə kütləvi axın etdiyinin şahidi olduq. Qoruğun direktoru Vüqar İsayev bildirdi ki, hələ saat 12-ni yeni keçməsinə baxmayaraq, qoruğa 1200 nəfərdən artıq məktəbli gəlib.
Mədəniyyət Nazirliyinin əməkdaşı Türkan Cəfərova bildirdi ki, hər il mayın 18-i dünyanın 150-dən çox ölkəsində, eləcə də Azərbaycanda Muzeylər Günü kimi qeyd olunur. Bu günlə əlaqədar ölkəmizin bütün muzey və qoruqlarında “Açıq qapı” günü elan olunub. Mediaturun təşkilində məqsədin insanların muzeylərə cəlb olunması və bu kimi məkanların tarixi-mədəni önəmini diqqətə çatdırmaqdır.
Qobustan Milli Tarix-Bədii Qoruğunu ziyarət edən ispaniyalı turist Antonio Qarsiya bildirdi ki, muzeylərlə tanış olmaq insanların biliklərinin artmasına kömək edir. Bu, eyni zamanda, çox əyləncəli bir işdir. Turist Qobustan qayaüstü rəsmlərini İspaniyadakı Altamira qaya rəsmləri ilə müqayisə edərək, hər iki regionun qədim olduğunu vurğuladı.
Qobustan qoruğu bizdə böyük təəssüratlar yaratdı. Muzeyin əməkdaşı Arzu Umiyeva bizə Qobustanın kəşfi, burada kəşf edilən ayrı-ayrı mağaraların, daş abidələrin tarixi haqqında danışdı. Presstur iştirakçıları Qobustandan sonra böyük bəstəkarımız Qara Qarayevin ev-muzeyini ziyarət etdilər. Biz orada olarkən məlumat verdilər ki, Qara Qarayevin ev muzeyi 2018-ci il oktyabrın 1-dən fəaliyyət göstərməyə başlayıb. Muzeydə 3 minə yaxın eksponatın nümayiş olunduğunu deyən muzey əməkdaşlarının sözlərinə görə, eksponatlar sırasında Sosialist Əməyi Qəhrəmanı, görkəmli bəstəkarın əlyazmaları, şəkilləri, ona hədiyyə olunan kitablar və digər əşyalar var.
Presstur çərçivəsində Milli İncəsənət Muzeyində də olduq. Bizim ziyarət etdiyimiz bina təmir və bərpadan sonra seyrçilərin ixtiyarına verilib. Ölkəmizin ən zəngin muzeylərindən olan Milli İncəsənət Muzeyinin kolleksiyasının yaranması ötən əsrin 20-ci illərinə təsadüf edir. Bu muzeyə o vaxtlar yerli neft milyonçularının müsadirə olunmuş sənət əsərləri daxil idi. Muzey 1936-cı ildən müstəqil bir muzeyə çevrilib, 2010-cu ildən isə milli status alıb. Bildirildi ki, bina alman memarı tərəfindən tikilib. Muzeyin kolleksiyasına 18 mindən çox eksponat daxil olsa da, onlardan yalnız 3 mini nümayiş olunur, qalanları isə fondda qorunub saxlanır.
Milli İncəsənət Muzeyində həm Azərbaycan, həm də dünya rəssamlarının dünyaşöhrətli əsərləri qorunub saxlanır. Biz orada olarkən bildirdilər ki, bu bina muzey olmamışdan əvvəl Azərbaycana rəhbərlik etmiş Nəriman Nərimanovun və Mircəfər Bağırovun yaşadığı məkan olub. Burada onların şəxsi kabinetlərinin olduğunu deyən muzey əməkdaşlarının qeyd etdiyinə görə muzey yenidən bərpa edilərkən burada hər bir xırda detal nəzərə alınıb.
Mədəniyyət Nazirliyinin təşkil etdiyi bir neçə saatlıq pressturdan hər birimiz maraqlı məlumatlarla, xoş hisslərlə ayrıldıq.
İradə SARIYEVA
