Muzeylər tariximizin, mədəniyyətimizin, adət-ənənələrimizin, maddi-mədəni dəyərlərimizin qorunduğu məkandır. Gələcəyimiz olan uşaqların vaxtaşırı olaraq muzeylərə aparılması, onları tariximizlə, maddi-mədəni dəyərlərimizlə tanış etmək, onlara bu barədə bilgilər vermək vacib bir məsələdir.
Əvvəlki dövrlərlə müqayisədə bu gün muzeylərə maraq elə də kütləvi deyil. Bir sıra uşaqların, ümumiyyətlə, muzeylər haqqında təsəvvürləri yoxdur. Bu da ondan irəli gəlir ki, uşaqları muzeylərə aparmırlar. Bunun bir səbəbi məktəblərin, valideynlərin bu məsələyə həvəssiz yanaşması, digər səbəbi isə muzeylərə girişin pullu olmasıdır.
Ümumiyyətlə, 6-12 yaşarası uşaqlar üçün muzeylərə giriş pulsuz olmalıdır ki, onlar istədikləri vaxt muzeylərə gedib buradakı eksponatlarla tanış olsunlar, xalqımızın müxtəlif tarixi dövrlərini əks etdirən maddi-mədəni sərvətləri haqqında məlumatlar əldə etsinlər. Hazırda bütün muzeylərə uşaqların girişi ödənişlidir. Azyaşlı uşaqlar muzeylərə getmək üçün yarım bilet almalıdırlar. Nəzərə alaq ki, hazırda xeyli sayda valideynin uşaqlarına bilet almaq üçün elə də böyük imkanı yoxdur. Elə ailə var ki, bir deyil, üç-dörd uşağı məktəbə gedir.
Muzeylər məktəb yaşlı uşaqlar üçün informasiya almaq, tanışlıq baxımdan daha maraqlıdır. Odur ki, uşaqlar üçün muzeylərə giriş pulsuz olarsa, onların muzeylərə marağı artar. Bu gün muzeylərin təbliği baxımından bu addımın atılması daha məqsədəuyğun olmalıdır.
6-12 yaşlı uşaqlar üçün muzeylərə giriş pulsuz olarsa, bunun nə kimi faydaları ola bilər?
Mədəniyyət Nazirliyi: “Azyaşlı şagirdlərin muzeylərə pulsuz daxil olması üçün məktəblər özləri müraciət etməlidirlər”
Mədəniyyət Nazirliyinin Muzey işi və mədəni sərvətlərə nəzarət şöbəsindən “Bakı-Xəbər”ə bildirdilər ki, bu gün uşaqların muzeylərə girişi ödənişlidir və hər muzeyin də özünəməxsus qiyməti var. Bundan başqa, nazirliyin müvafiq şöbəsindən onu da dedilər ki, Təhsil Nazirliyi ilə Mədəniyyət Nazirliyi arasında bağlanan əməkdaşlıq müqaviləsinə əsasən, bəzi məktəblərin şagirdləri ilin müxtəlif günlərində muzeylərə heç bir vəsait ödəmədən gedə bilirlər. Şöbə əməkdaşlarının sözlərinə görə, həmin şagirdlər muzeylərdə olur, hətta burada onlar üçün açıq dərslər də təşkil edilir. “Məktəblilərin muzeylərə pulsuz daxil olması üçün Təhsil Nazirliyi və Mədəniyyət Nazirliyi arasında müqavilə imzalanıb. Bu müqaviləyə əsasən, bəzi məktəblərin şagirdləri muzeylərə pulsuz giriş əldə edə bilirlər. Azyaşlı şagirdlərin muzeylərə pulsuz daxil olması üçün məktəblər özləri müraciət etməlidirlər. Onlarla müqavilə imzalanmalıdır ki, şagirdlərin muzeylərə ödənişsiz girişi təmin olunsun. Məktəblər nazirliyə müraciət etsə ki, biz şagirdlərimizin muzeyə girişinin pulsuz olmasını istəyirik, onda nazirlik bu məsələni təmin edir. Bizə hansı məktəb müraciət edirsə, həmin məktəblərin şagirdlərinin muzeylərə girişi ödənişsiz olur. Onlar burada açıq dərslər də keçirlər” -deyə şöbə əməkdaşı bildirdi.
Xəyalə Rais: “Azyaşlı məktəblilərin muzeylərə cəlb edilməsi üçün muzeylər və məktəblər birgə maraqlı layihələr həyata keçirməlidirlər”
Mədəniyyətşünas Xəyalə Rais isə bizimlə söhbətində bildirdi ki, ümumiyyətlə, uşaqların muzeylərə kütləvi şəkildə cəlb edilməsi olduqca vacibdir. X.Rais hesab edir ki, bu gün muzeylərə marağın az olması bizi ciddi narahat etməlidir. “Hazırda uşaqlar muzeylərə elə də ciddi maraq göstərmirlər. Bunun da səbəblərindən biri muzeylərə girişin uşaqlar üçün də ödənişli olmasıdır. Düzdür, bəzi tarixi şəxsiyyətlərin, ədiblərin, bəstəkarların ev muzeyinə giriş məktəblilər üçün pullu deyil. Ancaq paytaxtda fəaliyyət göstərən bütün digər muzeylərə giriş ödənişlidir. Azyaşlı məktəblilərin muzeylərə cəlb edilməsi üçün muzeylər və məktəblər birgə maraqlı layihələr həyata keçirməlidirlər. Muzeylər heç olmasa həftənin 1-2 gününü azyaşlı məktəblilər üçün pulsuz elan etməlidirlər. Hesab edirəm ki, bununla muzeylər heç nə itirməz, əksinə, qazanarlar. Bilirsiniz, Sovet dövründə 6-12 yaşarası uşaqlar mədəniyyət ocaqlarına, xüsusən də muzeylərə pulsuz daxil olurdular. Bu gün də bu məsələ aktualdır. Fikrimcə, muzeylər və məktəblər arasında müqavilələr bağlanmalı, bu müqaviləyə əsasən, azyaşlı şagirdlərin muzeylərə ödənişsiz girişi təmin olunmalıdır. Əgər tariximizi, mədəniyyətimizi uşaqlarımıza sevdirmək istəyiriksə, mütləq bu addım atılmalıdır” - deyə X.Rais qeyd etdi.
İradə SARIYEVA
