Kriminal aləmdə "Lotu Quli" ləqəbi ilə tanınan Nadir Səlifov Türkiyədə qətlə yetirilib. O, Antalyada şam etdiyi zaman yaxınları tərəfindən sui-qəsdə məruz qalıb. Lotu Qulinin başından 4 güllə yarası aldığı bildirilir. O, xəstəxanaya çatdırılsa da, həyatını xilas etmək mümkün olmayıb.
Türkiyə KİV-i Nadir Səlifovun öldürülməsinin bəzi təfərrüatlarını yayıb. Bildirilir ki, o, Antalyanın Serik rayonundakı otellərdən birində birlikdə yemək yediyi şəxs tərəfindən başından güllələnib. Ətrafdakılar təcili yardım çağırıb, təcili yardım briqadası onu xəstəxanaya çatdırsa da, bütün müdaxilələrə baxmayaraq keçinib. Hadisə yerindən qaçan şəxsin tutulması üçün genişmiqyaslı əməliyyat başlayıb. Son məlumata görə, “Lotu Quli”ni güllələyən şəxs Antalya-Denizli yolunda növbə çəkən polislər tərəfindən saxlanıb. “Lotu Quli”ni güllələyən şəxs “Xan Əhmədlinski” ləqəbi ilə tanınan kriminal avtoritetdir. Bildirilir ki, “Xan” son vaxtlar “Lotu Quli”nin təşəbbüsü ilə onun yaxın ətrafına daxil olubmuş. Sosial şəbəkələrdə “Lotu Quli”nin “Xan Əhmədlinski” ilə birlikdə çəkilmiş fotoları da yer alır. Xatırladaq ki, "Lotu Quli" 2018-ci ildə Azərbaycanda həbsdən buraxıldıqdan sonra Türkiyəyə yerləşmişdi. Lakin daha sonra Türkiyə hüquq-mühafizə orqanları onu saxlayaraq ölkədən deportasiya edib. Kriminal avtoritet bir müddət Birləşmiş Ərəb Əmirliklərində və Balkan ölkələrində olub, yenidən, bu dəfə başqa ad-soyadla Türkiyəyə yerləşib. Onun barəsində Rusiya və Ukrayna hüquq-mühafizə orqanları tərəfindən axtarış elan edilmişdi.
Rusiyanın kriminaldan yazan məşhur saytlarından biri isə baş verən qətl hadisəsini başqa cür təsvir edir. Portal yazır ki, “Quli” qətlə yetirilərkən onunla eyni masa arxasında daha 2 nəfər olub: “Zeynalov içəri daxil olanda arxası qapıya tərəf oturan “Quli” ilə yanaşı otaqda başqa iki nəfər də olub. Onlardan biri “Quli”nin cangüdəni olub, digəri ilə isə “qanuni oğru” kart oynayıb. Qatil içəri girəndə “Quli” çevrilərək ona tərəf baxıb, daha sanra kart oynamağa davam edib. Elə bu vaxt da Zeynalov ona atəş açıb. “Quli”nin cangüdəninin cavab atəşilə yaralanan Zeynalov hadisə yerindən uzaqlaşa bilib. Lakin o, polis tərəfindən Antalya-Dənizli yolunda yaxalanıb”.
Lotu Qulinin öldürülməsində kim və niyə maraqlı ola bilərdi?
Biz bu məsələ ilə bağlı adının çəkilməsini istəməyən krimianl aləmə aid şəxslərdən biri ilə fikir mübadiləsi apardıq. Həmin şəxsin dediyinə görə, bu qətllə bağlı müxtəlif versiyalar irəli sürülsə də, onun ağlına batan ən inandırcısı qisas amildir: “Qulinin bir qrup əslən azərbaycanlı "oğrularla" konfliktinin tarixi 2005-ci ilə gedib çıxır. Həmin vaxt bir neçə Azərbaycan əsilli nüfuzlu "oğru" Qulini titulundan məhrum edən "proqon" ("oğru"ların adından yayılan məktub) vermişdi. “Quli” uzun illər bu qərarla razılaşmayıb, elə “oğru” kimi yaşadığını iddia edib. Bundan sonra həmin "proqona" imza atan bütün "oğrular" Rusiyada və Türkiyədə qətlə yetirildi. Kriminal aləmdə gedən söhbətlərdə “Rövşən Lənkəranski”nin ölümünün də “Quli”nin sifarişi ilə baş verdiyi versiyası çox səslənir. Təsadüfi deyil ki, iki il əvvəl Rövşən Canıyevin qardaşı Namiq Canıyev və onun bir neçə yaxın adamı Türkiyədə “Quli”yə sui-qəsd şübhəsilə həbs edilmişdi. “Quli”nin öldürüldüyü tarix də çox mətləblərdən xəbər verir. İş burasındadır ki, “Rövşən Lənkəranski” də 4 il əvvəl məhz bu tarixdə güllələnərək qətlə yetirilmişdi. Bundan əlavə, Rövşənin qətlinin üstündən 4 il vaxt keçir və Quliyə də 4 il sonra 4 güllə vurulur. 22 ilini məhbəs divarları arasında keçirmiş bir avtoriteti, kriminal aləmə mənsub şəxsi, əlbəttə, mülki cəmiyyətdə sakit güzəran, dinc həyat gözləmədiyi barədə hələ o, həbsdən azad olunan dövrdə söz-söhbətlər dolaşırdı. “Sabirabadlı Hikmət”lə “Lotu Quli”nin düşmənçiliyi ötən əsrin sonlarından məhbəs divarları arasından başlayıb. Gəzən söz-söhbətlərə görə, həmin dövrdə eyni cəzaçəkmə müəssisəsində məhbəs həyatı yaşayan “Lotu Quli” Hikmət Muxtarova əl qaldırıb. “Lotu Quli”nin bu hərəkəti kriminal aləmdə normal qarşılanmayıb. Həmin vaxtdan kriminal aləmin əfsanələri kimi tanınan bu şəxslərin, həmçinin tərəfdarları arasında böyük savaşların başlandığı qeyd olunur. Kriminal aləmdə bu tanınmış şəxslər iki qüvvəyə çevrilib və bir-biri ilə mübarizə aparmağa başlayıblar. “Lotu Quli”nin kriminal aləmdə ən böyük düşməni olan “Sabirabadlı Hikmət” ləqəbi ilə tanınan Hikmət Muxtarov 2006-cı ildə Moskavada qətlə yetirilib.
“Sabirabadlı Hikmət” qətlə yetirilən dövrdə “Lotu Quli”nin Bakıda ağır cinayət işləri üzrə mühakiməsi gedirdi. “Sabirabadlı Hikmət” qətlə yetiriləndən sonra “Lotu Quli” ilə Hikmət Muxtarovun davamçısı olan Rövşən Lənkəranski” ləqəbi ilə tanınan Rövşən Canıyev arasında “müharibə” başlayıb. Uzun sürən davadan sonra “Rövşən Lənkəranski” 2016-cı il avqustun 18-də Türkiyənin İstanbul şəhərində qətlə yetildi. Həmin qətl hadisəsindən bir il iki ay sonra “Lotu Quli” həbsdən azad edilir. Elə həmin vaxtdan da Rövşənin adamlarının onu nə vaxtsa öldürə biləcəyi söz-söhbətləri dolaşırdı. “Quli”ni öldürən Xan bir zamanlar Şüvəlan və Kürdəxanı türmələrində “vəziyyətə baxıb”. Rövşən Lənkəranski 2009-cu ildə Kürdəxanıda olanda bu baş verib. Özü də Rövşənin adamı kimi tanınıb. Həmin vaxt Mamed Masallinski də Kürdəxanıda olub. Rövşənin ölümündən sonra bir çoxları Qulinin tərəfinə keçmişdi. Yəqin ki, “Xan” da bu adla onun yanına yerləşib və əsl simpatiya bəslədiyi Rövşənin qisasını alıb”.
İstənilən halda, nə qədər inandırıcı və məntili olsa da, bunlar hələ ki, versiyalardı. Qətllə bağlı əsl həqiqətlər isə istintaq zamanı ortaya çıxır. Ancaq kriminal dünyada baş verən qətllərin əsl səbəbləri çox vaxt elə gizli də qalır.
Məhəmmədəli QƏRBLİ
