Qadir Bayramlı: “Ölkədə quşçuluq fabriklərinin sayının çox olmasına baxmayaraq, məhsuldarlıq istənilən səviyyədə deyil”
“Azərbaycanın quşçuluq fabrikləri quş əti istehsalında çətinliklərlə üzləşirlər”. Bunu media nümayəndələrinə "İsmayıllı Quşçuluq" ASC-nin direktoru Zahid Qardaşov deyib.
O qeyd edib ki, bu sahənin aktual problemi damazlıq yumurta tədarükündə dövlət nizamlanmasının olmamasıdır: "Ölkədə fəaliyyət göstərən bir neçə təsərrüfat tərəfindən tədarük olunan damazlıq yumurtalar ikinci nəsil yumurtalardır. Birinci nəsil damazlıq yumurtalar, demək olar ki, tədarük olunmur. Hesab edirəm ki, dövlət bu prosesi nəzarət altına almalıdır, çünki nizamlanmanın olmaması bu sahənin inkişafını ləngidir. Hələlik isə bu sahədə hər hansı bir addım atılmır. Broyler şirkətlərinə tədarük olunan damazlıq yumurtalardan diri quş kütləsinin artımı 1,7 kiloqramdan çox deyil. Bu da biznes üçün səmərəli deyil”.
O əlavə edib ki, bu səbəbdən quş əti istehsalı ilə məşğul olan müəssisələr çətinliklərlə qarşılaşır və əksər hallarda müflisləşmə ilə üz-üzə qalırlar.
Ölkəmizdə quş əti istehsalında vəziyyət, quşçuluq fabriklərinin üzləşdikləri çətinliklər mövzusunda Azərbaycan Quşçular Cəmiyyətinin sədri Aydın Vəliyevlə söhbət etdik. O, “Bakı-Xəbər”ə açıqlamasında qeyd etdi ki, hazırda Azərbaycanın quşçuluq fabrikləri ət istehsalı ilə bağlı problem yaşamır. Eyni zamanda, damazlıq yumurta sahəsində hər hansı çatışmazlıq mövcud deyil. Bu mövzu ilə bağlı səslənən fikirlər həqiqəti əks etdirmir: “Zahir Qardaşovun məlum məsələ ilə bağlı səsləndirdiyi fikirlər tamamilə yanlışdır. Ümumiyyətlə, “İsmayıllı Quşçuluq” ASC-nin Azərbaycan Quşçular Cəmiyyətinə aidiyyəti yoxdur. Ola bilsin ki, adıçəkilən quçşuluq fabriki damazlıq yumurta ilə bağlı problem yaşayır. Ancaq bunu bütün fabriklərə aid etmək düzgün deyil”.
Həmsöhbətimiz onu da vurğuladı ki, damazlıq yumurtanı öncədən sifariş vermək lazımdır. Damazlıq yumurta elə bir məhsuldur ki, qrafik əsasında gətirilir: “İnkubatordan çıxmayan yumurtanı kimsə ala bilməz. Damazlıq yumurta vaxtında safariş olunmayanda ət istehsalında problem yaşanır. Bu səbəbdən də quşçuluq fabrikləri damazlıq yumurtanı vaxtında sifariş verməlidirlər ki, gələcəkdə problem yaşamasınlar”.
Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, hazırda ölkədə quşçuluq fabriklərinin sayı az deyil. Ancaq buna baxmayaraq, məhsuldarlıq istənilən səviyyədə deyil: “Yumurta verən quşlar yetərincə məhsuldar deyil. Bu sahədə yaşanan çatışmazlıqların müxtəlif səbəbləri var. İlk olaraq bildirim ki, yem sahəsində vəziyyət arzuolunan səviyyədə deyil. Məlumat üçün bildirim ki, ölkədə keyfiyyətli yem istehsal edən fabriklərin sayı azdır. Eyni zamanda, quşlar arasında seleksiya işləri zəifdir. Bu da, nəticə etibarilə, yumurta istehsalının həcminə təsir edir”.
Q.Bayramlının sözlərinə görə, damazlıq yumurtanın nə səbəbdən zəif tədarük olunması araşdırılmalıdır. İlk olaraq fermerlərin sıxıntılarının nədən ibarət olması müəyyən olunmalıdır: “Nəzərə almaq lazımdır ki, quşçuluq sahəsi dünyada inkişaf etmiş sahələrdən biridir. Xarici təcrübəni öyrənib ölkəmizdə tətbiq etmək mümkün olar”.
Həmsöhbətimiz onu da vurğuladı ki, Azərbaycanın potensialı imkan verir ki, yumurtanı nəinki ölkədaxili istehsal edək, eyni zamanda, ixracat imkanlarını da artırmaq olar. Sadəcə, bu sahədə görülən işləri genişləndirmək lazımdır.
Ekspertin fikrincə, quşçuluq sahəsini inkişaf etdirmək üçün fermerlərə güzəştli və uzunmüddətli kreditlər verilə bilər.
Günel CƏLİLOVA
