Müslüm İbrahimov: “Bunun sayəsində bir sıra layihələr həyata keçirildi, yeni iş yerləri açıldı və dayanıqlı iqtisadi inkişaf təmin olundu”
“İnvestisiya təşviqi sisteminin tətbiqindən sonra 300-dən çox investisiya təşviqi sənədi verilmişdir. Bu layihələrin icrası nəticəsində 20 min iş yeri yaradılıb. İnvestisiya təşviqi mexanizminin işə düşməsindən sonra icra edilən və nəzərdə tutulan layihələrin ümumi investisiya həcmi 2,7 milyard manatdır. Əgər biz bu sistemi tətbiq etməsəydik, heç kim gəlib bu vəsaiti Azərbaycana qoymazdı. Baxın, bir ciddi islahatın aparılması ilə təxminən 3 milyard manat investisiya cəlb etmişik, 20 min insan üçün isə iş yeri yaratmışıq”. Bu fikirləri Prezident İlham Əliyev Nazirlər Kabinetinin 2018-ci ilin 9 ayının sosial-iqtisadi inkişafının yekunlarına və qarşıda duran vəzifələrə həsr olunan iclasında deyib.
Qiymətlərin tənzimlənməsi, idxala mane olan süni maneələrin aradan qaldırılması istiqamətində görülən tədbirlər sayəsində inhisarçılıq, korrupsiya halları aradan qaldırılır. Xarici investisiyaların ölkəmizə cəlbi istiqamətində də önəmli addımlar atılır. İnvestisiya cəlbediciliyinə görə xarici iş adamlarının maraq göstərdiyi Azərbaycanda ixracın təşviqi sistemi yaradılır, dünya bazarına çıxarılan məhsulların keyfiyyəti beynəlxalq standartlara uyğunlaşdırılır.
İqtisadi və maliyyə sektorunda maksimum şəffaflığın təmin edilməsi ölkə iqtisadiyyatının inkişafını, qeyri-neft sektoruna xarici sərmayələrin daha böyük həcmdə qoyulmasını şərtləndirir. Ənənəvi kənd təsərrüfatı sahələrinin - pambıqçılığın, üzümçülüyün, tütünçülüyün, baramaçılığın və s. inkişafı müsbət nəticə verir. İqtisadiyyatın şaxələndirilməsi və qeyri-neft sektorunun inkişafı hesabına davamlı və sabit iqtisadi inkişafa nail olunub.
Maraqlıdır, bəs ekspertlər bunu necə dəyərləndirirlər? Azərbaycanda investisiya təşviqi sisteminin tətbiqi ölkə iqtisadiyyatına nə verib?
Məsələyə münasibət bildirən iqtisad elmləri doktoru Müslüm İbrahimovun sözlərinə görə, investisiyaların təşviqi sistrminin tətbiqi ölkə iqtisadiyyatının inkişafına ciddi təkan verib: “Əvvəla sözügedən sistemin tətbiqində məqsəd investisiyaları cəlb etmək olub. Bu zaman müəyyən cəlbedici elementlər işə salınıb. Bu elementlər institusional xarakter daşıyan hüquqi məsələləri əhatə edib. Digər tərəfdən, burada əsas məqamlardan biri də iqtisadi səmərəliliyin olmasıdır. Azərbaycan hazırda irimiqyaslı layihələrin həyata keçirilməsində nəinki tərəfdaş, həm də əsas maliyyəçi qismində iştirak edir. Cənab Prezidentin sözlərinə əsaslanaraq deyə bilərik ki, Azərbaycan bu gün inandırıcı, sabit bir partnyor kimi özünü göstərib. Bu o deməkdir ki, Azərbaycanın iştirak etdiyi və təşəbbüskarı olduğu layihələrdə investorlar iştirak etməyə hazırdırlar. Azərbaycan artıq dünya miqyasında, beynəlxalq arenada strateji bir partnyor kimi öhdəliklərini vaxtında yerinə yetirən ölkə kimi özünü tanıdıb. Hesab edirəm ki, investorlar üçün bu çox vacib bir amildir. Bu amil dünya iqtisadiyyatında əsas göstərici kimi qəbul olunur. İnvestisiya təşviqi sisteminin tətbiqi göstərdi ki, Azərbaycanla bağlı gözləntilər hər zaman özünü doğruldur. Bunun sayəsində bir sıra layihələr həyata keçirildi, yeni iş yerləri açıldı və dayanıqlı iqtisadi inkişaf təmin olundu. Davos Forumunda Azərbaycanın tutduğu yer də investisiyaların ölkəyə cəlb edilməsində öz rolunu oynadı. Ən nəhayət, Azərbaycanda makroiqtisadi sabitlik bütün bunlara öz müsbət təsirini göstərdi. İqtisadi artım o deməkdir ki, investorlar üçün çox gözəl və əlverişli mühit yaranır. İnvestisiyaların təşviqində Azərbaycan o layihələri həyata keçirir ki, bu, dünyada fəaliyyət göstərən xarici investorların maraqlarına cavab verir. Bu da sərmayələrin ölkəyə cəlb edilməsinə şərait yaradır. Ona görə də hesab edirəm ki, bu yöndə işlərin düzgün qurulması öz bəhrəsini, səmərəsini verir”.
Vidadi ORDAHALLI
